ក្រុមបាល់ទាត់ជម្រើសជាតិកាណាដាកំពុងឆ្លងកាត់អារម្មណ៍ចម្រុះនៅក្នុងព្រឹត្តិការណ៍ FIFA World Cup 2026 ខណៈពួកគេទទួលបានទាំងភាពជោគជ័យ និងដំណឹងមិនល្អអំពីស្ថានភាពកីឡាកររបួស មុនការប្រកួតដ៏សំខាន់ជាមួយស្វីស។

កាណាដាបានសម្រេចកំណត់ត្រាប្រវត្តិសាស្ត្ររបស់ខ្លួន ដោយរកបានពិន្ទុដំបូងនៅ World Cup ក្រោយស្មើ 1-1 ជាមួយបូស្ន៊ី និងហឺហ្សេហ្គូវីណា នៅទីក្រុងតូរ៉ុនតូ កាលពីថ្ងៃទី 12 មិថុនា។ បន្ទាប់មក ពួកគេបានបង្ហាញទម្រង់លេងដ៏អស្ចារ្យ ដោយយកឈ្នះកាតា 6-0 កាលពីថ្ងៃព្រហស្បតិ៍ និងកាន់កាប់ឱកាសកំណត់ជោគវាសនារបស់ខ្លួនក្នុងពូល B។

ទោះជាយ៉ាងណា ជ័យជម្នះដ៏ធំនោះបានមកជាមួយការបាត់បង់ដ៏ធ្ងន់ធ្ងរ។ ខ្សែបម្រើស្នូល អ៊ីស្មាអែល កូនេ (Ismael Kone) បានបាក់ជើងអំឡុងការប្រកួតជាមួយកាតា ហើយនឹងអវត្តមានរហូតដល់ចប់ការប្រកួត World Cup។ ការបាត់បង់កីឡាករវ័យ 24 ឆ្នាំរូបនេះ បានធ្វើឱ្យសមាជិកក្រុម និងបុគ្គលិកបច្ចេកទេសមានការព្រួយបារម្ភយ៉ាងខ្លាំង។

បន្ថែមពីនេះ កាលពីថ្ងៃអាទិត្យ មានព័ត៌មានថា អនុប្រធានក្រុម ស្ទីហ្វិន អ៊ូស្តាគីយ៉ូ (Stephen Eustaquio) មិនបានចូលរួមហ្វឹកហាត់ជាមួយក្រុមនៅទីក្រុងវ៉ានខូវើរទេ។ ទោះបីជាគាត់ត្រូវបានរំពឹងថានឹងត្រឡប់មកចូលរួមជាមួយក្រុមនៅពេលក្រោយក្នុងថ្ងៃនោះក៏ដោយ មូលហេតុនៃការអវត្តមានមិនត្រូវបានបង្ហាញឡើយ។

អ៊ូស្តាគីយ៉ូ វ័យ 29 ឆ្នាំ ដែលបច្ចុប្បន្នលេងឱ្យ Los Angeles FC ក្នុងក្របខណ្ឌ MLS បានលេងពេញ 90 នាទីក្នុងជ័យជម្នះលើកាតា និងពាក់ខ្សែក្រវាត់ប្រធានក្រុមក្នុងការប្រកួតទាំងពីររបស់កាណាដា។ សហព័ន្ធបាល់ទាត់កាណាដាក៏មិនបានបញ្ជាក់ថា គាត់មានបញ្ហារបួសអ្វីដែរ។

ជាមួយគ្នានេះ ប្រធានក្រុម អាល់ហ្វុនសូ ដាវីស (Alphonso Davies) ដែលកំពុងស្តារខ្លួនពីរបួសសរសៃពួរខាងក្រោយភ្លៅ (hamstring) បានត្រឡប់មកហ្វឹកហាត់វិញហើយ។

 គ្រូបង្វឹក ជេសស៊ី ម៉ាស (Jesse Marsch) បានបញ្ជាក់ថា ដាវីសកំពុងខិតជិតស្ថានភាពល្អបំផុត។

លោក Marsch បាននិយាយថា៖

“យើងនឹងដាក់គាត់ឱ្យហ្វឹកហាត់ពេញលេញក្នុងសប្តាហ៍នេះ ហើយបន្ទាប់មកវាយតម្លៃថា គាត់អាចចូលរួមប្រកួតជាមួយស្វីសបានកម្រិតណា។ ប៉ុន្តែគាត់កំពុងតែខិតជិតស្ថានភាព 100% ហើយ។”

សម្រាប់ការប្រកួតជាមួយស្វីសនៅថ្ងៃពុធខាងមុខ កាណាដាត្រូវការត្រឹមស្មើ ឬឈ្នះប៉ុណ្ណោះ ដើម្បីធានាកៅអីទៅកាន់វគ្គ 32 ក្រុមចុងក្រោយ។ បច្ចុប្បន្ន ពួកគេឈរនៅលើស្វីសក្នុងពូល B ដោយសារគ្រាប់បាល់ចំណេញ +6 ខណៈស្វីសមាន +3។

ទន្ទឹមនឹងនេះ ខ្សែការពារកណ្តាល អាល់ហ្វី ចូនស៍ (Alfie Jones) ក៏ទំនងជានឹងអវត្តមានជាលើកទី 3 ជាប់គ្នាផងដែរ ខណៈរូបគេនៅបន្តព្យាបាលរបួសកជើង។

ជាមួយនឹងបញ្ហារបួសជាច្រើន មុនការប្រកួតដ៏សំខាន់នេះ កាណាដានឹងត្រូវសាកល្បងសមត្ថភាព និងជម្រៅក្រុមរបស់ខ្លួន ដើម្បីសម្រេចគោលដៅឆ្ពោះទៅកាន់វគ្គបន្ទាប់នៃ World Cup 2026៕