ខេត្តព្រៃវែង ៖ ជារឿងសោកស្តាយបំផុត សម្រាប់តាយាយពីរនាក់ប្ដីប្រពន្ធ នាំគ្នាដាំឈូកនៅក្នុងវាលស្រែពេលមេឃកំពុងភ្លៀង ត្រូវរន្ទះបាញ់ស្លាប់យាយជាប្រពន្ធ ចំណែកតាជាប្ដីនៅក្បែរគ្នា តែគ្មានគ្រោះថ្នាក់ ។
គ្រោះធម្មជាតិនេះ កើតឡើងកាលពីវេលាម៉ោង2 និង40នាទីរសៀលថ្ងៃទី23 មិថុនា នៅចំណុចវាលស្រែត្រកៀបក្តាម ក្នុងភូមិព្រៃមាស ឃុំកំពង់ឫស្សី ស្រុកពោធិ៍រៀង ខេត្តព្រៃវែង ។ ជនរងគ្រោះមានឈ្មោះ យួន ផល ភេទស្រី អាយុ63ឆ្នាំ មានទីលំនៅក្នុងភូមិឃុំកើតហេតុ ។
យោងតាមការរៀបរាប់របស់លោកតា គល់ ម៉ុល អាយុ៦៥ឆ្នាំ ដែលត្រូវជាប្ដីជនរងគ្រោះបានឲ្យដឹងថា នៅម៉ោង1រសៀល មុនពេលកើតហេតុ គាត់បានដឹកប្រពន្ធទៅដាំឈូកជាមួយគ្នានៅវាលត្រកៀបក្តាម ដោយចុះដាំក្នុងស្រែជាមួយគ្នា។ លុះម៉ោងប្រហែល២កន្លះ មេឃក៏ចាប់ ផ្ដើមភ្លៀង។ ដោយយល់ថា មេឃភ្លៀងត្រជាក់ស្រួលធ្វើការ គាត់នឹងប្រពន្ធក៏មិនបានឈប់ដែរ នៅបន្តដាំឈូកធម្មតា លុះមួយសន្ទុះក្រោយមក ស្រាប់តែមានរន្ទះបាញ់គ្រាំងចំប្រពន្ធរបស់គាត់ បណ្ដាលឲ្យដួលស្ដូក ស្ដឹងនៅក្នុងស្រែ។
លោកតាជាប្ដីបានបញ្ជាក់ថា ភ្លាមៗ គាត់បានស្ទុះទៅលើកប្រពន្ធដឹកយកមកផ្ទះ និងហៅគ្រូពេទ្យមកជួយសង្គ្រោះ ប៉ុន្តែពេលពេទ្យមកដល់បានប្រាប់ថា លោក យាយបានស្លាប់បាត់បង់ជីវិតទៅហើយ ទើបរាយការណ៍ប្រាប់សមត្ថកិច្ចចុះមកពិនិត្យ និងរៀបចំធ្វើបុណ្យតាមប្រពៃណីតែម្ដង៕
