ខេត្តកំពង់ឆ្នាំង៖ យុវជន២នាក់ត្រូវបានដឹកយកសង្គ្រោះបន្ទាន់នៅមន្ទីរពេទ្យបង្អែកខេត្ត បន្ទាប់ពីយុវជនរងគ្រោះទាំង២នាក់បានជិះម៉ូតូបុកគ្នាពេញមួយទំហឹង កាលពីវេលាម៉ោង១៧និង២០នាទី ថ្ងៃទី២២ ខែកញ្ញា ឆ្នាំ២០១៦  នៅលើផ្លូវកៅស៊ូ ស្ថិតនៅសង្កាត់កំពង់ឆ្នាំង ក្រុងកំពង់ឆ្នាំង ។

សមត្ថកិច្ចបានឲ្យដឹងថា ជនរងគ្រោះម្នាក់ឈ្មោះ លី ហៀង អាយុ២២ឆ្នាំ រស់នៅឃុំជ្រៃបាក់ ស្រុករលាប្អៀរ ខេត្តកំពង់ឆ្នាំងរងរបួសធ្ងន់ និង ម្នាក់ទៀតនៅមិនទាន់ស្គាល់អត្តសញ្ញាណនៅឡើយនោះទេរងរបួសធ្ងន់ធ្ងរសន្លប់គ្រូពេទ្យកំពុងសង្រ្គោះបន្ទាន់ ។

សមត្ថកិច្ចបានឲ្យដឹងថា នៅមុនពេលកើតហេតុជនរងគ្រោះឈ្មោះលី ហៀង បានបើកម៉ូតូរបស់ខ្លួនម៉ាកហុងដាវ៉េវ ពាក់ស្លាកលេខភ្នំពេញ 1AW-4581 ក្នុងទិសដៅពីត្បូងទៅជើង នៅពេលមកដល់ចំណុចកើតហេតុ ស្រាប់តែមានម៉ូតូមួយគ្រឿងទៀត ម៉ាកហុងដា សេ១២៥ ពាក់ស្លាកលេខកំពង់ឆ្នាំង1A-7167 បើកយ៉ាងលឿន ធ្វើដំណើរក្នុងទិសដៅផ្ទុយគ្នា នៅពេលមកដល់ចំណុចកើតហេតុក៏ជ្រុលទៅបុកម៉ូតូហុងដាវ៉េវ ពេញមួយទំហឹងបណ្តាលប៉ើងខ្ទាត ជនរងគ្រោះបោកទៅនឹងថ្នល់កៅស៊ូ រងរបួសសន្លប់ស្តូកស្តឹងតែម្តង ។

ក្រោយពេលកើតហេតុជនរងគ្រោះត្រូវបានដឹកយកមកសង្រ្គោះនៅមន្ទីរពេទ្យបង្អែកខេត្តកំពង់ឆ្នាំង ចំណែកមធ្យោបាយបង្កយកទៅរក្សាទុកនៅអធិការដ្ឋាននគរបាលក្រុងកំពង់ឆ្នាំង ដើម្បីរង់ចាំដោះស្រាយតាមនីតិវិធី ៕

ដោយ៖ ចន្ថា