អ.ស.ប.÷លោក កែវ ឈា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ (អ.ស.ប.) បានបញ្ជាក់ពីការព្រួយបារម្ភយ៉ាងខ្លាំងរបស់កម្ពុជាចំពោះការកើន ឡើងគួរឱ្យតក់ស្លុតនៃការរំលោភបំពានយ៉ាងធ្ងន់ធ្ងរទៅ លើកុមារក្នុងជម្លោះប្រដាប់អាវុធ ហើយបានអំពាវនាវឱ្យមានការអនុវត្តឱ្យបានពេញលេញនៃកាតព្វកិច្ចផ្លូវច្បាប់អន្តរជាតិ ដើម្បីការពារកុមារ។
ថ្លែងនៅក្នុងកិច្ចពិភាក្សាបើកចំហរបស់ក្រុមប្រឹក្សាសន្តិសុខអ.ស.ប. ស្តីពីកុមារ និងជម្លោះប្រដាប់អាវុធ តំណាងអចិន្ត្រៃយ៍កម្ពុជាបានមានប្រសាសន៍ថា កុមារជាង៦៤០០នាក់នៅកម្ពុជានៅតែបន្តភៀសសឹក ហើយកម្ពុជាគូសបញ្ជាក់ពីសារៈសំខាន់នៃការការពារការអប់រំ រួមទាំងតាមរយៈគំនិតផ្តួចផ្តើមដូចជា “សាលារៀនបណ្ដោះអាសន្ននៅជំរំ” របស់កម្ពុជា ដែលរៀបចំសម្រាប់កុមារភៀសសឹក និងសារៈសំខាន់នៃការធានាឱ្យបាននូវជំនួយមនុស្សធម៌ដែលយកចិត្តទុកដាក់ចំពោះកុមារ ដែលផ្តល់ជូនកុមាររងផលប៉ះពាល់។
តំណាងអចិន្ត្រៃយ៍កម្ពុជាក៏បានបញ្ជាក់ផងដែរថា កម្ពុជានៅតែប្តេជ្ញាធ្វើការជាមួយដៃគូទាំងអស់ ដើម្បីធានាថាកុមារគ្រប់រូបអាចរស់នៅ សិក្សា និងរីកចម្រើន ដោយគ្មានអំពើហិង្សា និងការភ័យខ្លាច។
សូមរម្លឹកថា នៅក្នុងសង្គ្រាមឈ្លានពានរបស់ថៃ កាលពីឆ្នាំ២០២៥ បណ្តាលឱ្យមានជនភៀសសឹកប្រមាណ ៦៤០ ០០០នាក់ ដែលគិតមកត្រឹមថ្ងៃទី២៥ ខែមិថុនា ឆ្នាំ២០២៦ ម្សិលមិញនេះ នៅមានប្រជាពលរដ្ឋប្រមាណជាង ២១ ៥០០នាក់ ដែលភាគច្រើនជាស្ត្រី និងកុមារ ពុំទាន់អាចវិលត្រលប់ទៅលំនៅឋានវិញនៅឡើយ បន្ទាប់ពីភូមិឋាន និងផ្ទះសម្បែង ត្រូវបានយោធាថៃកាន់កាប់ដោយខុសច្បាប់ និងបំផ្លិចបំផ្លាញ៕
