ខេត្តសៀមរាប៖ ក្រុមការងារប្រតិកម្មរហ័សនៃស្នងការដ្ឋាននគរបាលខេត្តសៀមរាប បានប្រកាសដាក់វិន័យ និងសម្រេចផ្អាកការងារជាបណ្តោះអាសន្ន ចំពោះមន្ត្រីនគរបាលម្នាក់ ដែលបានប្រើប្រាស់កាយវិការ និងពាក្យសម្តីមិនសមរម្យក្នុងពេលបំពេញភារកិច្ច ។
ប្រតិកម្មរហ័សនៃស្នងការដ្ឋាននគរបាលខេត្តសៀមរាប បានប្រកាសនាថ្ងៃទី០៧ ខែកក្កដា ឆ្នាំ២០២៦នេះថា មន្ត្រីនគរបាល ម្នាក់ ដែលតាមឃាត់រថយន្តគេចវេស មិនបង់ភាស៊ី ដោយប្រើកាយវិការ, សម្តី មិនសមរម្យ ត្រូវបានដាក់អោយអនុវត្តវិន័យនគរបាលជាតិហើយ! ។
ប្រតិកម្មរហ័សនៃស្នងការដ្ឋាននគរបាលខេត្តសៀមរាប បានបន្ថែមទៀតថា ស្នងការដ្ឋានបានសម្រេចផ្អាកការងារជាបណ្តោះអាសន្ន និងត្រូវបង្ហាញមុខនៅការិយាល័យបុគ្គលិករៀងរាល់ម៉ោងធ្វើការ ។
ការចេញមុខបកស្រាយ និងចាត់វិធានការនេះ បានធ្វើឡើងបន្ទាប់ពីផេកហ្វេសប៊ុកឈ្មោះប៉ុស្តិ៍ខ្សឹបដំណឹង បានបង្ហោះវីដេអូមួយ កាលពីរសៀលថ្ងៃទី០៦ ខែកក្កដា ក្រោមចំណងជើងថា: “ហេតុអ្វី បើកឡានដឹកទំនិញលើផ្លូវក្រវ៉ាត់ក្រុងសៀមរាប ត្រូវជួបរឿងបែបនេះ!?” ដែលបង្ហាញពីសកម្មភាពមិនសមរម្យរបស់មន្ត្រីនគរបាលរូបនោះ។
អ្នកនាំពាក្យនិងក្រុមការងារប្រតិកម្មរហ័សនៃស្នងការដ្ឋាននគរបាលខេត្តសៀមរាបថា បន្ទាប់ពីបានឃើញហ្វេសប៊ុកផេកប៉ុស្តិ៍ខ្សឹបដំណឹង បានផ្សព្វផ្សាយវីដេអូ នៅរសៀលថ្ងៃទី០៦ ខែកក្កដា ឆ្នាំ២០២៦នេះ ដោយមានសរសេរខ្លឹមសារថា :«(ហេតុអ្វី បើកឡានដឹកទំនិញលើផ្លូវក្រវ៉ាត់ក្រុងសៀមរាប ត្រូវជួបរឿងបែបនេះ)។ ប្រតិកម្មរហ័សនៃស្នងការដ្ឋាននគរបាលខេត្តសៀមរាប បានបន្តថាដោយក្នុងវីដេអូ ដែលបានផ្សព្វផ្សាយនេះ មានជាប់សកម្មភាព មន្ត្រីនគរបាលនៃស្នងការដ្ឋាននគរបាលខេត្តសៀមរាបផងដែរ ។
យោងតាមវីដេអូ ដែលបានផ្សព្វផ្សាយនេះ យើងខ្ញុំសូមជម្រាបជូនថា សកម្មភាពនេះ គឺជាការចូលរួមតាមការស្នើរសុំអន្តរាគម៍ម្ដងម្កាលរបស់ក្រុមហ៊ុន ដែលទទួលសិទ្ធវិនិយោគសាងសង់ចំណតរថយន្ត និងធ្វើអាជីវកម្មភាស៊ីចំណតរថយន្ត នៅប៉ែកខាងកើត និងខាងលិចក្រុងសៀមរាប តាមឃាត់រថយន្តដឹកទំនិញ ពាក់ស្លាកលេខ ភ្នំពេញ 3E-7871 ដែលគេចវេសមិនបង់ភាស៊ី ចំនួន០២លើក នៅវេលាម៉ោង១១ថ្ងៃទី០៦ ខែកក្កដា ឆ្នាំ២០២៦នេះ លើផ្លូវក្រវ៉ាត់ក្រុងសៀមរាប ។
ដោយឡែកចំពោះការប្រើប្រាស់កាយវិការ ,ពាក្យសម្ដី មិនសមរម្យ ខុសវិជ្ជាជីវៈ របស់មន្ត្រីនគរបាល នៅក្នុងវីដេអូនេះ ស្នងការដ្ឋាននគរបាលខេត្តសៀមរាប កំពុង ធ្វើការត្រួតពិនិត្យកំហុសឆ្គង និងអនុវត្តតាមបទវិន័យនគរបាលជាតិ ៕
ដោយ៖ សុរិយា
