បាល់ទាត់អឺរ៉ុបបានបង្កើតចំណូលសរុបលើស 40 ពាន់លានអឺរ៉ូ (ប្រហែល 46 ពាន់លានដុល្លារ) ជាលើកដំបូងក្នុងរដូវកាល 2024-25 ប៉ុន្តែរបាយការណ៍ប្រចាំឆ្នាំរបស់ Deloitte បានព្រមានថា កំណើនហិរញ្ញវត្ថុកំពុងចាប់ផ្តើមថយចុះ។

 

បាល់ទាត់ទូទាំងទ្វីបអឺរ៉ុបរកចំណូលបាន 40.2 ពាន់លានអឺរ៉ូ កើនឡើងពី 38 ពាន់លានអឺរ៉ូ ក្នុងរដូវកាលមុន។ ក្នុងនោះ លីគធំៗទាំង 5 របស់អឺរ៉ុប (Premier League, Bundesliga, LaLiga, Serie A និង Ligue 1) រកចំណូលសរុបបាន 21.6 ពាន់លានអឺរ៉ូ។

 

ទោះជាយ៉ាងណា អ្នកវិភាគរបស់ Deloitte បានព្រមានថា ការបន្ថែមការប្រកួតកាន់តែច្រើនទៅក្នុងកាលវិភាគដែលរវល់ស្រាប់ មិនមែនជាដំណោះស្រាយសម្រាប់កំណើនរយៈពេលវែងនោះទេ។ ពួកគេព្យាករថា ចំណូលសរុបរបស់ក្លិបអាចនឹងនៅទ្រឹង ឬថយចុះក្នុងរដូវកាល 2025-26 និង 2026-27។

 

លោក Tim Bridge ប្រធានផ្នែកអាជីវកម្មកីឡារបស់ Deloitte បាននិយាយថា៖ «ការពង្រីកការប្រកួតរបស់ UEFA និង FIFA បាននាំមកនូវអត្ថប្រយោជន៍ផ្នែកហិរញ្ញវត្ថុ ប៉ុន្តែបាល់ទាត់មិនអាចពឹងផ្អែកលើការបន្ថែមការប្រកួតតែមួយមុខ ដើម្បីរក្សាកំណើនប្រកបដោយចីរភាពបានទេ។»

 

លោកបន្ថែមថា ទីផ្សារដែលពោរពេញដោយការប្រកួតច្រើនពេក អាចប៉ះពាល់ទាំងកីឡាករ និងអ្នកគាំទ្រ ហើយអាចធ្វើឱ្យគុណភាពនៃការប្រកួតធ្លាក់ចុះ។

 

Premier League នៅតែជាលីគដែលរកចំណូលបានច្រើនជាងគេ

 

ក្លិបនៅ Premier League រកចំណូលបាន 6.8 ពាន់លានផោន (9.1 ពាន់លានដុល្លារ) កើនឡើង 8% ហើយត្រូវបានព្យាករថា នឹងលើស 7 ពាន់លានផោន នៅរដូវកាលក្រោយ។

 

កំណើននេះមកពី៖

 

ក្លិបកាន់តែច្រើនឡើងបានឡើងដល់វគ្គចុងក្រោយនៃការប្រកួតអឺរ៉ុប។

 

តម្លៃសំបុត្រកើនឡើង។

 

ការពង្រីកសមត្ថភាពកីឡដ្ឋាន។

 

ប៉ុន្តែផ្នែកហិរញ្ញវត្ថុមិនសូវល្អទេ ដោយការខាតបង់មុនបង់ពន្ធបានកើនពី 135 លានផោន ទៅ 948 លានផោន ដោយសារចំណាយខ្ពស់លើការផ្ទេរកីឡាករ និងការលក់កីឡាករដែលមិនទទួលបានប្រាក់ចំណេញដូចឆ្នាំមុន។

 

ស្ថានភាពលីគធំៗផ្សេងទៀត

 

Bundesliga៖ រកចំណូលលើស 4 ពាន់លានអឺរ៉ូ ជាលើកដំបូង កើនឡើង 12%។

 

LaLiga៖ រកចំណូលបាន 4.1 ពាន់លានអឺរ៉ូ ដោយ Real Madrid និង Barcelona រួមគ្នាបង្កើត 52% នៃចំណូលសរុប។

 

Serie A៖ កើនឡើងត្រឹម 4% ដល់ 3 ពាន់លានអឺរ៉ូ។

 

Ligue 1៖ ចំណូលធ្លាក់ចុះ 15% មកនៅ 2.2 ពាន់លានអឺរ៉ូ ដោយសារចំណូលពាណិជ្ជកម្មធ្លាក់ចុះ 0.4 ពាន់លានអឺរ៉ូ។

 

ក្លិប Championship ជួបការលំបាក

 

ក្លិបនៅ Championship (លីគទី២របស់អង់គ្លេស) បានជួបការធ្លាក់ចុះចំណូលជាលើកដំបូង ចាប់តាំងពីជំងឺកូវីដ-19។

 

ចំណូលសរុបធ្លាក់ 2% មកនៅ 942 លានផោន។

 

ការខាតបង់មុនបង់ពន្ធកើនឡើង 12% ដល់ 355 លានផោន។

 

មានតែ 3 ក្លិបប៉ុណ្ណោះ ដែលរកប្រាក់ចំណេញបាន។

 

លោក Tim Bridge បាននិយាយថា ក្លិបភាគច្រើននៅលីគក្រោម Premier League នៅតែពឹងផ្អែកលើថវិកាពីម្ចាស់ក្លិប ឬអ្នកវិនិយោគ ដើម្បីរក្សាប្រតិបត្តិការ។

 

បាល់ទាត់នារីបន្តរីកចម្រើន

ផ្ទុយពីបាល់ទាត់បុរស Women’s Super League (WSL) បានបង្ហាញការរីកចម្រើនយ៉ាងខ្លាំង។

 

ចំណូលកើនឡើង 39% ដល់ 90 លានផោន។

 

នេះជារដូវកាលទី២ជាប់គ្នា ដែលក្លិបទាំង 12 រកចំណូលបានលើស 1 លានផោន។

 

ទោះយ៉ាងណា គម្លាតចំណូលរវាងក្លិបដែលរកចំណូលបានច្រើនបំផុត និងតិចបំផុត បានកើនពី 13 ដង ទៅ 16 ដង បង្ហាញថា ភាពខុសគ្នាផ្នែកហិរញ្ញវត្ថុនៅក្នុងបាល់ទាត់នារីក៏កំពុងកើនឡើងផងដែរ៕