ខេត្តកណ្ដាល÷ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមជម្រាបជូនសាធារណជនពាក់ព័ន្ធទៅនឹងគណនីហ្វេសប៊ុកឈ្មោះ Kog Sophea ដែលបានបង្ហោះវីដេអូ អមដោយខ្លឹមសារថា៖ មិនដឹងជាគាត់មានរឿងអ្វីទេ បានជាមានកាំបិតផ្គាក់ជាប់ខ្លួនអញ្ចឹង សាហាវណាស់ គួរឲ្យខ្លាច ប្រភពពីបងប្អូនប្រជាពលរដ្ឋ គាត់ថតទុកជាភស្តុតាង មុនពេលបញ្ជូនទៅព្យាបាលនៅមន្ទីរពេទ្យ។

ក្រោយពីទទួលបានព័ត៌មានខាងលើរួច ដោយអនុវត្តតាមបទបញ្ជាលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល កម្លាំងជំនាញខេត្ត កម្លាំងជំនាញស្រុក និងប៉ុស្តិ៍នគរបាលរដ្ឋបាលតាលន់ ចុះស្រាវជ្រាវករណីខាងលើឈានដល់ឃាត់ខ្លួនជនសង្ស័យ ០១នាក់៖

-ករណី: ហិង្សាដោយចេតនាមានស្ថានទម្ងន់ទោស និងប្រើប្រាស់ដោយខុសច្បាប់នូវសារធាតុញៀន ។
-កើតហេតុ: ថ្ងៃទី១៨ ខែកក្ដដា ឆ្នាំ២០២៦ វេលាម៉ោង២២និង២០នាទី។
-ចំណុចៈ ផ្លូវលំជិតវត្តខន្តី ស្ថិតក្នុងភូមិវាលត្រែង ឃុំតាលន់ ស្រុកស្អាង ខេត្តកណ្តាល។
ជនរងគ្រោះ ចំនួន០២នាក់
១-ឈ្មោះ រស់ រិទ្ធី ភេទប្រុស អាយុ ២០ឆ្នាំ ជនជាតិខ្មែរ មានទីលំនៅ ភូមិ វាលត្រែង ឃុំតាលន់ ស្រុកស្អាង ខេត្តកណ្តាល(អ្នកឌុប)និង២-ឈ្មោះ វ៉ាន ចាន់សល់ ភេទស្រី អាយុ២១ឆ្នាំ ជនជាតិខ្មែរ មុខរបរកសិករ មានទីលំនៅ ភូមិលេខ៤ ឃុំប្រាសាទ ស្រុកស្អាង ខេត្តកណ្ដាល (របួសខ្នងធ្ងន់)។

ជនសង្ស័យ ចំនួន០២នាក់
១-ឈ្មោះ ថុល កន ភេទប្រុស អាយុ២៩ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិទួលក្តី ឃុំត្រើយស្លា ស្រុកស្អាង ខេត្តកណ្តាល (ជនដៃដល់អ្នកយកកណ្ដៀវគប់ជនរងគ្រោះនិងបើកម៉ូតូ)។ មានសារធាតុញៀនក្នុងទឹកនោម(+)និង២-ឈ្មោះ វ៉ាន្នី សុឺ ភេទប្រុស អាយុ២៦ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិវាលត្រែង ឃុំតាលន់ ស្រុកស្អាងខេត្តកណ្ដាល។(អ្នកជិះខាងក្រោយ) គេចខ្លួន។

មុនពេលកេីតហេតុជនរងគ្រោះទាំងពីរនាក់ បានជិះម៉ូតូម៉ាកហុងដាឌ្រីម ពណ៌ឈាមជ្រូក សេរីឆ្នាំ២០២៦ ឌុបគ្នាចេញពីផ្ទះ (ឈ្មោះ រស់ រិទ្ធីជាអ្នកឌុប) ស្ថិតនៅភូមិ លេខ៤ ឃុំប្រាសាទ ដើម្បីទៅហូបបង្អែមនៅ ឃុំត្រើយស្លា។ ពេលហូបរួចបានជិះម៉ូតូត្រឡប់មកផ្ទះវិញ ពេលមកដល់ចំណុចវេលាម៉ោងកើតហេតុ បានជិះជួបជាមួយជនសង្ស័យ ស្របពេលនោះជនសង្ស័យកំពុងជិះរកក្មេងៗដែលជេរពួកខ្លួន រួចបានឃើញម៉ូតូជនរងគ្រោះជិះបញ្រ្ចាស់គ្នា ជនសង្ស័យបានឈប់ម៉ូតូដោយស្មានតែក្មេងទាំងនោះ បានយកណ្ដៀវគប់ បណ្ដាលអោយត្រូវជនរងគ្រោះឈ្មោះ វ៉ាន ចាន់សល់ ចំក្រោយខ្នងជាប់នៅនឹងខ្នងតែម្ដង។ ពេលធ្វើសកម្មភាពរួចជនសង្ស័យទាំងពីរនាក់បានជិះគេចខ្លួនបាត់។ បន្ទាប់មកជនរងគ្រោះបានជិះឌុបគ្នាទៅប្រាប់បងប្អូននឹងប្ដឹងសមត្ថកិច្ចនគរបាលប៉ុស្តិ៍តាលន់ រួចបានបញ្ចូនជនរងគ្រោះទៅមន្ទីរពេទ្យលោកសង្ឃដើម្បីព្យាបាល។

លុះដល់ថ្ងៃទី២០ ខែកក្កដា ឆ្នាំ២០២៦ សមត្ថកិច្ចបានធ្វើការស្រាវជ្រាវឃាត់ខ្លួនជនសង្ស័យឈ្មោះ ថុល កន ចំណែកជនសង្ស័យឈ្មោះ វ៉ាន្នី សុឺ គេចខ្លួន។

តាមចម្លើយ នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានធ្វើសកម្មភាពយកកណ្ដៀវគប់ជនរងគ្រោះត្រូវចំខ្នងពិតប្រាកដមែន។

បច្ចុប្បន្នជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី។ ចំណែកជនសង្ស័យរត់គេចខ្លួនជំនាញកំពុងស្វែងរក៕

ដោយ៖ សុរិយា