ខេត្តបាត់ដំបង ៖ អតីតទណ្ឌិតម្នាក់ក្នុងចំណោម០២នាក់ ដែលធ្លាប់ជាប់គុកចំនួន០៤លើក ហើយទើបចេញពីគុកថ្មីៗនេះ ពេលនេះ ត្រូវសមត្ថកិច្ចចាប់ខ្លួនសារជាថ្មី ជាមួយនឹងបក្ខពួកក្នុងបទល្មើសដដែលៗប្រព្រឹត្ត «អំពើចោរកម្ម» ហើយត្រូវមន្ត្រីការិយាល័យជំនាញបញ្ជូនទៅប្រគល់ជូលតុលាការសម្រេចទោសតន់ នៅព្រឹកថ្ងៃទី០១ សីហា ដើម្បីចូលសម្រាកក្នុងគុកជាលើកទី០៥។
ស្នងការរងទទួលផែនព្រហ្មទណ្ឌ លោក ឈឿង គឹមសុង បានប្រាប់ថា ជនសង្ស័យទាំង០២នាក់ ដែលកម្លាំងអធិការស្រុកសំពៅលូន ឃាត់ខ្លួនពីបទ«ចោរកម្ម» កាលពីប៉ុន្មានថ្ងៃមុននេះ ពេលនេះមន្ត្រីការិយាល័យជំនាញ បញ្ជូនពួកគេទៅកាន់សាលាដំបូងខេត្ត ចាត់ការតាមនីតិវិធីហើយ ។ លោកបានបញ្ជាក់ថា ជនសង្ស័យទាំង០២នាក់ ត្រូវបានឃាត់ខ្លួន ក្រោយពួកគេ និងបក្ខពួកមួយចំនួនទៀត ដែលកំពុងរត់គេចខ្លួន រួមដៃគ្នាគាស់ទម្លុះទម្លាយលួច«ម៉ាស៊ីនភ្លើង» អ្នកភូមិ ។
យោងតាមរបាយការណ៍ ជនសង្ស័យទាំង០២នាក់ ម្នាក់ឈ្មោះ បុន ភិរួន ហៅរុន ភេទប្រុស អាយុ៣២ឆ្នាំ (អតីតទណ្ឌិត ធ្លាប់ជាប់គុក៤ដង) នៅភូមិត្រពាំងព្រលិត ឃុំសន្តិភាព ស្រុកសំពៅលូន និងឈ្មោះ ជិន សារ៉ាក់ ភេទប្រុស អាយុ៤៧ឆ្នាំ នៅភូមិអូរ ឃុំសន្តិភាព ស្រុកសំពៅលូន ។
អធិការស្រុកសំពៅលូន លោក ទឹម វិឆ័យ បានប្រាប់ថា បើតាមចម្លើយសារភាពរបស់ជនសង្ស័យ ក្រុមនេះ មានគ្នាច្រើននាក់ ក្នុងការប្រព្រឹត្តបទល្មើសខាងលើ ។ ប៉ុន្តែក្នុងចំណោមពួកគេ មានជនម្នាក់ដែលចាប់ខ្លួនបានឈ្មោះ បុន ភិរួន ហៅ រុន នេះជាមុខសញ្ញា «លួច»យ៉ាងសកម្ម ហើយថែមទាំងធ្លាប់ជាប់ពន្ធនាគារចំនួន០៤ដងកន្លងមកហើយ លុះចេញពីពន្ធនាគារ ជននេះបបូល បក្ខពួកប្រព្រឹត្តអំពើចោរកម្មទៀត ។
លោកអធិការបានបញ្ជាក់ថា ជនសង្ស័យទាំង០២នាក់ខាងលើនេះ ត្រូវកម្លាំងរបស់លោកឃាត់ខ្លួនកាលពីថ្ងៃទី ៣០ កក្កដា ក្រោយពីក្រុមនេះ គាស់រោងចាំចម្ការមួយកន្លែងចូល «លួចម៉ាស៊ីនភ្លើងមួយគ្រឿង» នៅចំណុចភូមិត្រពាំងព្រលិត ឃុំសន្តិភាព ស្រុកសំពៅលូន ។ ជាមួយនឹងការឃាត់ខ្លួន មន្ត្រីជំនាញដកហូតបានម៉ាស៊ីនភ្លើង ប្រគល់ជូនម្ចាស់វិញ ។
បើតាម លោក ទឹម វិឆ័យ បានបញ្ជាក់ថា ក្រុមនេះ មិនមែនមានតែ០២នាក់ទេ ដែលធ្វើសកម្មភាពគាស់រោងចម្ការលួចម៉ាស៊ីនភ្លើង តែបក្ខពួកប៉ុន្មាននាក់ទៀត ដែលចូលរួមសមគំនិត បានរត់ចោលស្រុកអស់ហើយ ដែលកម្លាំងជំនាញបាននិងកំពុងតាមស្វែងរក ។ យ៉ាងណា ជនសង្ស័យទាំង០២នាក់ ដែលមានអតិតទណ្ឌិតធ្លាប់ជាប់គុក០៤ដងម្នាក់ផង ត្រូវបានមន្ត្រីការិយាល័យជំនាញបញ្ជូនទៅប្រគល់ជូនតុលាការហើយ ៕
ដោយ៖ សុរិយា
