ក្លិប Tottenham Hotspur បានចុះហត្ថលេខានាំយកខ្សែបម្រើស្លាបជម្រើសជាតិប្រេស៊ីល Savinho ពី Manchester City ក្នុងកិច្ចព្រមព្រៀងមួយ ដែលធ្វើឱ្យការចំណាយរបស់ក្លិបនៅទីផ្សារដោះដូរកីឡាកររដូវក្តៅនេះ កើនលើស 300 លានផោន (ប្រមាណ 409.23 លានដុល្លារ) ក្រោមការដឹកនាំរបស់លោក Roberto De Zerbi បន្ទាប់ពី Tottenham ទើបតែគេចផុតពីការធ្លាក់ទៅលីគទីពីរកាលពីរដូវកាលមុន។

 

ក្លិបទាំងពីរបានបញ្ជាក់ពីការផ្ទេរនេះកាលពីថ្ងៃចន្ទ ប៉ុន្តែមិនបានបង្ហាញព័ត៌មានលម្អិតអំពីតម្លៃផ្ទេរ និងរយៈពេលកុងត្រាឡើយ។ ទោះជាយ៉ាងណា សារព័ត៌មានអង់គ្លេសបានរាយការណ៍កាលពីសប្តាហ៍មុនថា ការផ្ទេរនេះមានតម្លៃ 75 លានផោន និងអាចបន្ថែម 10 លានផោន ទៀតទៅតាមលក្ខខណ្ឌផ្សេងៗ។

 

លោក De Zerbi បាននិយាយក្នុងសេចក្តីថ្លែងការណ៍ថា៖ “Savinho គឺជាកីឡាករដែលនាំមកនូវថាមពល និងគុណភាពនៅតំបន់ស្លាប។ គាត់មានភាពក្លាហានក្នុងការប្រឈមមុខនឹងខ្សែការពារ និងមានសមត្ថភាពផ្លាស់ប្តូរលទ្ធផលការប្រកួតតាមរយៈភាពច្នៃប្រឌិតរបស់គាត់។ យើងពិតជារីករាយដែលបាននាំគាត់មកចូលរួមជាមួយយើង ហើយខ្ញុំទន្ទឹងរង់ចាំធ្វើការជាមួយគាត់ ជួយគាត់បន្តអភិវឌ្ឍសមត្ថភាព និងឃើញបុគ្គលិកលក្ខណៈរបស់គាត់រួមចំណែកដល់ក្រុម។”

 

Savinho មានបទពិសោធន៍នៅ LaLiga និង Manchester City

 

Savinho ចាប់ផ្តើមអាជីពនៅ Atletico Mineiro មុនពេលផ្លាស់ទៅ Troyes ក្នុងឆ្នាំ 2022។ ប៉ុន្តែរដូវកាលដែលគាត់លេចធ្លោខ្លាំង គឺពេលត្រូវបានខ្ចីជើងទៅលេងឱ្យ Girona។

 

នៅ Girona គាត់រកបាន 11 គ្រាប់ ក្នុង 41 ប្រកួត និងជួយក្រុមបញ្ចប់ក្នុងចំណាត់ថ្នាក់លេខ 3 នៅ LaLiga ឆ្នាំ 2024 ដែលជាចំណាត់ថ្នាក់ល្អបំផុតក្នុងប្រវត្តិសាស្ត្រក្លិប និងធ្វើឱ្យ Girona ទទួលបានសិទ្ធិលេង UEFA Champions League។

 

ក្រោយមក Savinho បានផ្លាស់ទៅ Manchester City នៅរដូវក្តៅឆ្នាំ 2024។ ចាប់តាំងពីពេលនោះមក គាត់បានបង្ហាញខ្លួន 84 ប្រកួត ក្នុងការប្រកួតគ្រប់កម្មវិធី និងរកបាន 7 គ្រាប់។ កីឡាករវ័យ 22 ឆ្នាំ រូបនេះក៏បានបង្ហាញខ្លួន 13 ប្រកួត សម្រាប់ក្រុមជម្រើសជាតិប្រេស៊ីលផងដែរ។

 

Tottenham ចំណាយជាង 300 លាន

 

Savinho គឺជាកីឡាករចំណូលថ្មីចុងក្រោយបំផុតក្នុងទីផ្សារដោះដូរដ៏មមាញឹករបស់ Tottenham។

 

កន្លងមក Spurs បាននាំយកកីឡាករខ្សែបម្រើ Sandro Tonali និង Mateus Fernandes ព្រមទាំងខ្សែការពារ Andy Robertson, Marcos Senesi និង Jan Paul van Hecke។

 

ការផ្ទេរ Savinho ធ្វើឱ្យការចំណាយសរុបរបស់ Tottenham កើនដល់ប្រមាណ 322 លានផោន ប្រសិនបើរាប់បញ្ចូលប្រាក់បន្ថែមក្នុងកិច្ចព្រមព្រៀងផងដែរ។

 

ក្លិបនៅភាគខាងជើងទីក្រុងឡុងដ៍កំពុងធ្វើកំណែទម្រង់ក្រុមឡើងវិញ បន្ទាប់ពីបញ្ចប់រដូវកាលមុននៅចំណាត់ថ្នាក់ លេខ 17 ដែលជាលទ្ធផលដ៏ខកចិត្ត។

 

Spurs ចង់បានកីឡាករ Manchester City ម្នាក់ទៀត

 

តាមការរាយការណ៍របស់សារព័ត៌មានអង់គ្លេស Tottenham ក៏កំពុងពិភាក្សាជាមួយ Manchester City អំពីការផ្ទេរខ្សែប្រយុទ្ធជម្រើសជាតិអេហ្ស៊ីប Omar Marmoush ផងដែរ។

 

Tottenham បានចាប់ផ្តើមរដូវកាល Premier League ដោយបរាជ័យ 0-3 ក្រោមស្នាដៃ Brentford កាលពីថ្ងៃសៅរ៍។

 

ពួកគេនឹងបើកទ្វារផ្ទះទទួល Charlton Athletic ដែលលេងនៅ Championship ក្នុងការប្រកួត League Cup ជុំទីពីរ នៅថ្ងៃពុធ មុនពេលទទួល Newcastle United នៅថ្ងៃសៅរ៍៕