ការកើនឡើងនៃចលនាអ្នកប្រើប្រាស់នៅកាណាដា ដែលចង់ទិញផលិតផលផលិតក្នុងស្រុក និងធ្វើពហិការផលិតផលអាមេរិក កំពុងផ្លាស់ប្តូរមុខមាត់ទំនិញនៅតាមផ្សារទំនើបក្នុងប្រទេស ដោយបង្ខំឱ្យអ្នកលក់រាយបង្កើនការបង្ហាញប្រភពដើមទំនិញ និងស្វែងរកប្រភពផ្គត់ផ្គង់ថ្មីៗ។

 

នៅខេត្ត Ontario លោក Giancarlo Trimarchi ប្រធានក្រុមហ៊ុនផ្សារទំនើបឯករាជ្យ Vince’s Market បានប្រើ Facebook ដើម្បីបង្ហាញដល់អតិថិជនថា បន្លែ និងផ្លែឈើភាគច្រើននៅលើធ្នើរហាងរបស់លោក គឺផលិតនៅកាណាដា បន្ទាប់ពីលោកទទួលបានអ៊ីមែល និងមតិយោបល់ខឹងសម្បារជាច្រើន ពាក់ព័ន្ធនឹងការដាក់លក់បន្លែ និងផ្លែឈើពីសហរដ្ឋអាមេរិក។

 

សង្គ្រាមពាណិជ្ជកម្មដ៏តានតឹងរវាងសហរដ្ឋអាមេរិក និងកាណាដា បានធ្វើឱ្យអ្នកប្រើប្រាស់កាន់តែយកចិត្តទុកដាក់លើប្រភពដើមនៃផលិតផល និងកន្លែងដែលប្រាក់របស់ពួកគេត្រូវបានចំណាយ។

 

ចលនា «ទិញផលិតផលកាណាដា» (Buy Canadian) បានចាប់ផ្តើមកាលពីឆ្នាំមុន បន្ទាប់ពីប្រធានាធិបតីអាមេរិក Donald Trump ដាក់ពន្ធលើទំនិញកាណាដា។ ចលនានេះបានកាន់តែខ្លាំងឡើងក្នុងប៉ុន្មានសប្តាហ៍ចុងក្រោយ បន្ទាប់ពីការចរចាពាណិជ្ជកម្មរវាងប្រទេសទាំងពីរបរាជ័យ ហើយលោក Trump បានចុះហត្ថលេខាលើបទបញ្ជាប្រតិបត្តិមួយដែលពាក់ព័ន្ធនឹងការផ្លាស់ប្តូរឈ្មោះតំបន់ភូមិសាស្ត្រមួយទៅជា Lake America។

 

លោក Trimarchi បាននិយាយក្នុងបទសម្ភាសន៍ថា៖ «លើកនេះ វាមានភាពខ្លាំងក្លាជាងកាលពីឆ្នាំមុនយ៉ាងច្រើន»។

 

លោក Trump បានប្រាប់អ្នកសារព័ត៌មាននៅទីក្រុង Dublin កាលពីថ្ងៃសៅរ៍ថា កាណាដាមានបំណងចង់សម្រេចកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក ហើយកិច្ចព្រមព្រៀងអាចនឹងសម្រេចបាន «ក្នុងពេលឆាប់ៗនេះ»។ លោកក៏បានបន្តរិះគន់ថា កាណាដាបានប្រព្រឹត្តមិនយុត្តិធម៌ចំពោះកសិករអាមេរិក និងគួរតែលុបចោលពន្ធរបស់ខ្លួន។

 

ការរកតុល្យភាពរវាងគុណភាព តម្លៃ និងប្រភពដើម

 

ហាងចំនួន 4 របស់ Trimarchi ដែលស្ថិតនៅតំបន់ Greater Toronto Area បច្ចុប្បន្នមានបន្លែ និងផ្លែឈើផលិតក្នុងស្រុកប្រហែល 90%។

 

លោកបានប្តូរប្រភពផ្គត់ផ្គង់ផ្លែស្ត្របឺរី ដោយទិញពីខេត្ត Quebec ជំនួសការនាំចូលពីសហរដ្ឋអាមេរិក។ លោកក៏បាននិយាយថា ក្រុមហ៊ុនបានកាត់បន្ថយថវិកាផ្សព្វផ្សាយ ដោយសារការផ្លាស់ប្តូរទាំងនេះបានបង្កើនសម្ពាធលើថ្លៃដំណើរការអាជីវកម្ម។

 

លោក Trimarchi បាននិយាយថា៖ «ពីមុន យើងតែងតែត្រូវរកតុល្យភាពរវាងគុណភាព និងតម្លៃ។ ប៉ុន្តែឥឡូវនេះ វាក្លាយជាការរកតុល្យភាពរវាង គុណភាព តម្លៃ និងប្រទេសប្រភពដើម»។

 

ក្រុមហ៊ុន Loblaw Cos ដែលជាអ្នកលក់រាយអាហារធំបំផុតរបស់កាណាដា បានដាក់ស្លាកសញ្ញាធំៗដែលមានរូបស្លឹក Maple Leaf ឡើងវិញនៅក្នុងផ្នែកបន្លែ ផ្លែឈើ និងអាហារស្រស់ កាលពីខែសីហា បន្ទាប់ពីផ្អាកប្រើមួយរយៈ ដើម្បីបញ្ជាក់ពីប្រភពផលិតផលកាណាដា។

 

Loblaw ក៏បានដាក់ស្លាក «T» ឡើងវិញ ដើម្បីជូនដំណឹងដល់អតិថិជនថា ផលិតផលណាខ្លះរងផលប៉ះពាល់ពីពន្ធ និងជួយឱ្យអតិថិជនងាយសម្គាល់ផលិតផលដែលផលិតក្នុងប្រទេសកាណាដា។

 

Metro ដែលជាបណ្តាញផ្សារទំនើបធំទី៣របស់កាណាដា បាននិយាយថា ខ្លួននឹងបន្តផ្តល់អាទិភាពដល់ផលិតផលក្នុងស្រុករបស់កាណាដា នៅក្នុងស្ថានភាពបច្ចុប្បន្ន។

 

លោក Gary Sands អនុប្រធានជាន់ខ្ពស់ផ្នែកគោលនយោបាយសាធារណៈ និងការតស៊ូមតិ នៃសហព័ន្ធអ្នកលក់រាយឯករាជ្យកាណាដា បាននិយាយថា៖ «ផ្នត់គំនិតរបស់ប្រជាជនកាណាដាបានផ្លាស់ប្តូរជាអចិន្ត្រៃយ៍»។

 

កាណាដាកំពុងស្វែងរកប្រភពផ្គត់ផ្គង់ថ្មី

 

កាណាដាគឺជាប្រទេសនាំចូលបន្លែស្រស់ធំទី៥លើពិភពលោក គិតតាមតម្លៃ។ សហរដ្ឋអាមេរិកនៅតែជាប្រភពផ្គត់ផ្គង់បន្លែ និងផ្លែឈើស្រស់ដ៏ធំបំផុតរបស់កាណាដា ដោយមានចំណែកជាងពាក់កណ្តាលនៃការនាំចូល ស្របពេលម៉ិកស៊ិកស្ថិតនៅលំដាប់បន្ទាប់។

 

ទោះជាយ៉ាងណា ទិន្នន័យរដ្ឋាភិបាលចុងក្រោយបង្ហាញថា ចំណែកបន្លែដែលកាណាដានាំចូលពីសហរដ្ឋអាមេរិក បានធ្លាក់មកត្រឹម 62.6% ក្នុងខែកក្កដា ពី 69% ក្នុងខែដូចគ្នានៃឆ្នាំ 2023 ដែលជាពេលមុនលោក Trump ឡើងកាន់តំណែងជាប្រធានាធិបតី។

 

គិតត្រឹមខែកក្កដា ផ្លែឈើជាងពាក់កណ្តាលដែលកាណាដានាំចូល ក៏នៅតែមកពីសហរដ្ឋអាមេរិកផងដែរ។

 

បន្ទាប់ពីការចរចាពាណិជ្ជកម្មរវាងប្រទេសទាំងពីរបរាជ័យកាលពីថ្ងៃទី 21 ខែសីហា បានកើតមានការដាក់ពន្ធជុំថ្មី និង ពន្ធឆ្លើយតប (counter-tariffs) ដែលធ្វើឱ្យសម្ពាធលើពាណិជ្ជកម្ម និងខ្សែសង្វាក់ផ្គត់ផ្គង់រវាងកាណាដា និងសហរដ្ឋអាមេរិកកាន់តែខ្លាំង៕