សហស្ថាបនិក Google លោក Larry Page, សហស្ថាបនិក Oracle លោក Larry Ellison, ស្ថាបនិក Dell Technologies លោក Michael Dell និងស្ថាបនិក Amazon លោក Jeff Bezos សុទ្ធតែធ្លាប់ឡើងកាន់តំណែងជា មហាសេដ្ឋីមានទ្រព្យសម្បត្តិច្រើនបំផុតទី២លើពិភពលោក នៅក្នុងឆ្នាំនេះ បន្ទាប់ពីលោក Elon Musk។

 

លោក Page បានចាប់ផ្តើមឆ្នាំនេះក្នុងចំណាត់ថ្នាក់ទី២ ដោយមានទ្រព្យសម្បត្តិប្រមាណ ២៧០ពាន់លានដុល្លារ នៅពាក់កណ្តាលខែមករា។

 

ទ្រព្យសម្បត្តិរបស់លោកបានកើនឡើងស្របពេលភាគហ៊ុនរបស់ Alphabet ដែលជាក្រុមហ៊ុនមេរបស់ Google កើនឡើង។ ទ្រព្យសម្បត្តិរបស់លោកបានឆ្លងកាត់កម្រិត ៣០០ពាន់លានដុល្លារ នៅខែមេសា ដែលធ្វើឱ្យលោកក្លាយជាមនុស្សទី៣ ដែលទស្សនាវដ្តី Forbes កត់ត្រាថា មានទ្រព្យសម្បត្តិដល់កម្រិតនេះ បន្ទាប់ពីលោក Elon Musk និងលោក Ellison។

 

ការផ្លាស់ប្តូរលើកដំបូង

 

ការផ្លាស់ប្តូរលើកដំបូងបានកើតឡើងនៅដើមខែមិថុនា។ លោក Ellison បានវ៉ាផ្តាច់លោក Page នៅថ្ងៃទី២ ខែមិថុនា បន្ទាប់ពីភាគហ៊ុន Oracle កើនឡើង ២៨% ក្នុងរយៈពេលជួញដូរ ៥ថ្ងៃ ដែលធ្វើឱ្យទ្រព្យសម្បត្តិរបស់លោកកើនដល់ ២៩៦ពាន់លានដុល្លារ។

 

នៅពេលនោះ លោក Page មានទ្រព្យសម្បត្តិប្រមាណ ២៩៥ពាន់លានដុល្លារ ខណៈលោក Musk នៅតែឈរនាំមុខយ៉ាងឆ្ងាយជាមួយទ្រព្យសម្បត្តិប្រមាណ ៨២៦ពាន់លានដុល្លារ។

 

យោងតាមទិន្នន័យរបស់ LSEG ដែល Reuters បានដកស្រង់ លោក Ellison កាន់កាប់ភាគហ៊ុន Oracle ច្រើនជាង ៣៨% ដែលធ្វើឱ្យទ្រព្យសម្បត្តិរបស់លោកមានភាពងាយរងឥទ្ធិពលពីការឡើងចុះនៃតម្លៃភាគហ៊ុនក្រុមហ៊ុន។

 

Ellison កាន់តំណែងទី២បានរយៈពេលខ្លី

 

ការកាន់តំណែងទី២របស់លោក Ellison មានរយៈពេលខ្លីប៉ុណ្ណោះ។ ភាគហ៊ុន Oracle បានធ្លាក់ចុះ ១៧% ក្នុងសប្តាហ៍បន្ទាប់ ដែលបានលុបចោលទ្រព្យសម្បត្តិរបស់លោកជិត ៥០ពាន់លានដុល្លារ និងធ្វើឱ្យលោកធ្លាក់មកចំណាត់ថ្នាក់ទី៥ នៅថ្ងៃទី៩ ខែមិថុនា។

 

លោក Page បានត្រឡប់មកកាន់តំណែងទី២វិញ ហើយរក្សាតំណែងនេះរហូតដល់រដូវក្តៅ។ Forbes ប៉ាន់ស្មានថា នៅថ្ងៃទី១ ខែកញ្ញា លោក Page មានទ្រព្យសម្បត្តិ ២៧៧ពាន់លានដុល្លារ នាំមុខលោក Bezos ដែលមាន ២៦៨ពាន់លានដុល្លារ។

 

Michael Dell ឡើងកាន់តំណែងទី២ជាលើកដំបូង

 

ការផ្លាស់ប្តូរមួយទៀតបានកើតឡើងជាងមួយសប្តាហ៍ក្រោយមក។

 

លោក Michael Dell បានក្លាយជាមនុស្សមានទ្រព្យសម្បត្តិច្រើនបំផុតទី២លើពិភពលោកជាលើកដំបូង នៅថ្ងៃទី៩ ខែកញ្ញា បន្ទាប់ពីភាគហ៊ុន Dell Technologies កើនឡើង ៤% ដល់កម្រិតខ្ពស់បំផុតថ្មី ដែលធ្វើឱ្យទ្រព្យសម្បត្តិរបស់លោកកើនដល់ ២៧៣.២ពាន់លានដុល្លារ។ នៅពេលនោះ លោក Page មានទ្រព្យសម្បត្តិ ២៧០,៣ពាន់លានដុល្លារ។

 

នេះជាការកើនឡើងយ៉ាងឆាប់រហ័សសម្រាប់លោក Dell ដែលមានអាយុ ៦១ឆ្នាំ។ លោកបានចាប់ផ្តើមឆ្នាំនេះជាមួយទ្រព្យសម្បត្តិប្រមាណ ១៤១ពាន់លានដុល្លារ និងស្ថិតនៅចំណាត់ថ្នាក់ទី១៣លើពិភពលោក។

 

ការកើនឡើងទ្រព្យសម្បត្តិរបស់លោកត្រូវបានជំរុញដោយ តម្រូវការកើនឡើងខ្លាំងសម្រាប់ម៉ាស៊ីន Server ដែលប្រើសម្រាប់បញ្ញាសិប្បនិម្មិត (AI)។

 

យោងតាម Reuters ក្រុមហ៊ុន Dell ទទួលបានការបញ្ជាទិញម៉ាស៊ីន AI Server ជាង ១៣០ពាន់លានដុល្លារ ក្នុងរយៈពេល ១២ខែដល់ខែសីហា ហើយរំពឹងថានឹងរកចំណូលបាន ៧៤ពាន់លានដុល្លារ ពី AI Server ក្នុងឆ្នាំហិរញ្ញវត្ថុនេះ។

 

ភាគហ៊ុន Dell Technologies បានកើនឡើង ច្រើនជាង ៣ដង ចាប់តាំងពីដើមឆ្នាំ។ លោក Dell កាន់កាប់ភាគហ៊ុនប្រមាណ ៤០% នៃក្រុមហ៊ុន។

 

ទោះជាយ៉ាងណា លោក Dell បានធ្លាក់មកចំណាត់ថ្នាក់ទី៤ នៅថ្ងៃទី១៤ ខែកញ្ញា បន្ទាប់ពីភាគហ៊ុនក្រុមហ៊ុនធ្លាក់ចុះជាង ៦% ដែលបានលុបចោលទ្រព្យសម្បត្តិរបស់លោកចំនួន ១៥,១ពាន់លានដុល្លារ និងធ្វើឱ្យលោកនៅសល់ទ្រព្យសម្បត្តិប្រមាណ ២៦១,៤ពាន់លានដុល្លារ។

 

Jeff Bezos ក្លាយជាមហាសេដ្ឋីបច្ចេកវិទ្យាចុងក្រោយដែលឡើងដល់លេខ២

 

នៅថ្ងៃទី១៥ ខែកញ្ញា លោក Jeff Bezos បានក្លាយជាមហាសេដ្ឋីបច្ចេកវិទ្យាចុងក្រោយបំផុតដែលឡើងកាន់តំណែងទី២។

 

Forbes ប៉ាន់ស្មានថា លោក Bezos មានទ្រព្យសម្បត្តិ ៣៦៨,៤ពាន់លានដុល្លារ នាំមុខលោក Page ដែលមាន ២៨២,៨ពាន់លានដុល្លារ និងលោក Dell ដែលមាន ២៦៥,៧ពាន់លានដុល្លារ។

 

ក្រៅពីភាគហ៊ុននៅក្នុង Amazon លោក Bezos ក៏ជាម្ចាស់ក្រុមហ៊ុនអវកាស Blue Origin ផងដែរ ដែល Forbes ប៉ាន់ស្មានថាមានតម្លៃប្រហែល ១៣០ពាន់លានដុល្លារ។

 

Elon Musk នៅតែឈរលេខ១

 

ខណៈមហាសេដ្ឋីបច្ចេកវិទ្យា ៤រូបបានផ្លាស់ប្តូរគ្នានៅពីក្រោយ លោក Elon Musk នៅតែរក្សាតំណែងជា មនុស្សមានទ្រព្យសម្បត្តិច្រើនបំផុតលើពិភពលោក។

 

លោកបានក្លាយជាមនុស្សដំបូងគេដែលមានទ្រព្យសម្បត្តិដល់ ១ទ្រីលានដុល្លារ នៅថ្ងៃទី១២ ខែមិថុនា បន្ទាប់ពី SpaceX បានចូលផ្សារហ៊ុន។

 

ទ្រព្យសម្បត្តិរបស់លោកបានកើនដល់កម្រិតកំពូលជាប្រវត្តិសាស្ត្រ ១,៤៥ទ្រីលានដុល្លារ ត្រឹម ៤ថ្ងៃក្រោយមក ប៉ុន្តែបន្ទាប់មកបានធ្លាក់ចុះក្រោម ១ទ្រីលានដុល្លារ ដោយសារភាគហ៊ុន SpaceX ធ្លាក់ចុះ និងការដាក់កំហិតលើភាគហ៊ុន Tesla មួយចំនួនរបស់លោក។

 

គិតត្រឹមថ្ងៃចន្ទ ទ្រព្យសម្បត្តិរបស់លោក Musk ត្រូវបានប៉ាន់ស្មានថាមាន ៩៤៦,៤ពាន់លានដុល្លារ ដែលស្មើនឹងប្រហែល ២,៥ដង នៃទ្រព្យសម្បត្តិរបស់លោក Bezos៕