ប្រធានសមាគមក្លិបបាល់ទាត់អឺរ៉ុប (EFC) លោក Nasser Al-Khelaifi បានប្រកាសផែនការបង្កើតស្ថាប័នថ្មីមួយ ដើម្បីតំណាងឱ្យក្លិបបាល់ទាត់នៅទូទាំងពិភពលោក កាលពីថ្ងៃអង្គារ ព្រមទាំងបានផ្ញើសាររិះគន់ដោយប្រយោលយ៉ាងច្បាស់ទៅកាន់ប្រធាន FIFA លោក Gianni Infantino ដោយមិនបានបញ្ចេញឈ្មោះផ្ទាល់។

 

ស្ថាប័នដែលត្រូវបានស្នើឡើងក្រោមឈ្មោះ «World Football Clubs» មានគោលបំណងផ្តល់សំឡេងជាផ្លូវការនៅលើឆាកអន្តរជាតិដល់ក្លិបនានា។ ជាក់ស្តែង វាអាចបង្កើតជាតួអង្គសំខាន់ទី៧ នៅក្នុងបាល់ទាត់ពិភពលោក បន្ថែមពីលើសហព័ន្ធបាល់ទាត់ទ្វីបទាំង៦ ប៉ុន្តែស្ថាប័ននេះនឹងតំណាងឱ្យក្លិប មិនមែនសមាគមបាល់ទាត់ជាតិនោះទេ។

 

លោក Al-Khelaifi មិនបានបញ្ជាក់លម្អិតអំពីស្ថានភាពផ្លូវការ រចនាសម្ព័ន្ធអភិបាលកិច្ច សមាជិកភាព ឬកាលវិភាគនៃការបង្កើតស្ថាប័ននេះឡើយ។ លោកក៏មិនបានបង្ហើបថា ស្ថាប័ននេះអាចស្វែងរកអំណាច ឬសិទ្ធិអ្វីខ្លះនៅក្នុង FIFA ដែរ។

 

លោក Al-Khelaifi បានថ្លែងនៅក្នុងមហាសន្និបាត EFC នៅទីក្រុង Copenhagen ថា៖ «EFC បានក្លាយជាបណ្តាញ និងវេទិកាសកល ដែលអនុញ្ញាតឱ្យក្លិបនានាភ្ជាប់ទំនាក់ទំនងជាមួយគ្រប់ភាគី»។

 

លោកបានបន្ថែមថា៖ «យើងបង្កើតអត្ថប្រយោជន៍សម្រាប់ក្លិបទាំងក្នុង និងក្រៅទ្វីបអឺរ៉ុប»។ លោកបានលើកឡើងថា កីឡាករចំនួន ៨៥៧ នាក់មកពីក្លិបអឺរ៉ុប បានចូលរួមក្នុង World Cup ដែលមាន ៤៨ ក្រុមនៅឆ្នាំនេះ ដែលស្មើនឹងជិត ៧០% នៃកីឡាករទាំងអស់ក្នុងព្រឹត្តិការណ៍នេះ។

 

លោកបានបន្តថា៖ «នេះជាមូលហេតុដែលពេលនេះដល់ពេលបង្កើត World Football Clubs ហើយ។ ព្រោះក្លិបគ្រប់ទីកន្លែងនៅលើពិភពលោកសុទ្ធតែសមនឹងទទួលបានការតំណាង មានសំឡេងផ្ទាល់ខ្លួន និងមានឱកាសកាន់តែប្រសើរក្នុងការទទួលបានជោគជ័យ»។

 

លោក Al-Khelaifi បាននិយាយថា ក្លិបបាល់ទាត់បានក្លាយជាអង្គភាពសកលកាន់តែខ្លាំង តាមរយៈកីឡាករ គ្រូបង្វឹក ម្ចាស់ក្លិប ដៃគូពាណិជ្ជកម្ម ម៉ាកយីហោ និងមូលដ្ឋានអ្នកគាំទ្រ ខណៈដែលនៅតែមានឫសគល់រឹងមាំនៅក្នុងសហគមន៍មូលដ្ឋានរបស់ខ្លួន។ លោកបានលើកឡើងថា បច្ចុប្បន្នអ្នកគាំទ្រអាចតាមដានក្រុមដែលខ្លួនស្រឡាញ់ពីទីក្រុង Copenhagen ទៅ Cairo ឬពី New York ទៅ Tokyo។

 

ការប្រកាសនេះជាសញ្ញាច្បាស់លាស់បំផុតមួយរហូតមកដល់ពេលនេះ ដែលបង្ហាញថា EFC ចង់ពង្រីកគំរូការងាររបស់ខ្លួនឱ្យលើសពីទ្វីបអឺរ៉ុប។

 

EFC ដែលពីមុនត្រូវបានគេស្គាល់ថា សមាគមក្លិបអឺរ៉ុប (European Club Association) បានរីកចម្រើនយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយនេះ។ លោក Al-Khelaifi បានឱ្យដឹងថា ចំនួនសមាជិកបានកើនឡើងពី ២៤៧ ក្លិបក្នុងឆ្នាំ២០២១ ដល់ជាង ៩០០ ក្លិបនៅក្នុងប្រទេសចំនួន ៥៥ ដោយមានគោលដៅឈានដល់ ១,០០០ ក្លិប។

 

BARCELONA ត្រឡប់មកវិញ ខណៈ REAL កំពុងត្រៀមចូលរួមជាថ្មី

 

លោកក៏បានប្រកាសថា Barcelona បានត្រឡប់មកចូលរួមក្នុងអង្គការនេះវិញ ហើយបាននិយាយថា Real Madrid «កំពុងស្ថិតក្នុងដំណើរការត្រឡប់មកវិញ»។ លោកបានបង្ហាញការវិលត្រឡប់ទាំងនេះថា ជាភស្តុតាងបញ្ជាក់ថា ក្លិបធំៗនៅអឺរ៉ុបកំពុងប្រមូលផ្តុំគ្នាជាថ្មីក្រោមរចនាសម្ព័ន្ធតំណាងតែមួយ។

 

ការគ្រោងវិលត្រឡប់របស់ Real Madrid ដែលប្រភពមួយនៅក្នុងក្លិបបានពិពណ៌នាថា ជា «កាយវិការនៃសុច្ឆន្ទៈ» របស់ក្លិប នឹងក្លាយជាជំហានបន្ថែមទៀតក្នុងការផ្សះផ្សាទំនាក់ទំនងជាមួយ UEFA និង EFC បន្ទាប់ពីមានជម្លោះអស់រយៈពេលជាច្រើនឆ្នាំ ជុំវិញគម្រោង European Super League។

 

កាលពីខែកុម្ភៈ ភាគីទាំងបីបានឈានដល់កិច្ចព្រមព្រៀងជាគោលការណ៍ ដែលពួកគេបាននិយាយថា នឹងជួយដោះស្រាយវិវាទផ្លូវច្បាប់ដែលពាក់ព័ន្ធនឹងគម្រោងបំបែកខ្លួននេះផងដែរ នៅពេលកិច្ចព្រមព្រៀងត្រូវបានអនុវត្ត។

 

លោក Al-Khelaifi ក៏បាននិយាយថា កំណែទម្រង់អភិបាលកិច្ចដែលកំពុងត្រូវបានស្នើឡើង នឹងផ្តល់សិទ្ធិឱ្យសមាជិក EFC គ្រប់រូបចូលរួមដោយផ្ទាល់ក្នុងការសម្រេចចិត្តសំខាន់ៗ។ សមាជិកទាំងអស់ក៏នឹងអាចតំណាងឱ្យអង្គការនេះនៅក្នុងគណៈកម្មាធិការរបស់ UEFA, FIFA និងស្ថាប័នផ្សេងៗទៀត ខណៈដែលការតំណាងរបស់ស្ត្រីនឹងត្រូវបានធានានៅគ្រប់ផ្នែករងនៃក្រុមប្រឹក្សាភិបាល។

 

សំណើបង្កើតស្ថាប័នក្លិបពិភពលោកនេះ កើតឡើងនៅចំពេលមានភាពតានតឹងជុំវិញការបែងចែកអំណាចក្នុងបាល់ទាត់ពិភពលោក រវាង FIFA សហព័ន្ធបាល់ទាត់ទ្វីប លីគ ក្លិប និងភាគីពាក់ព័ន្ធផ្សេងទៀត។

 

លោក Al-Khelaifi បានប្រើសុន្ទរកថានេះ ដើម្បីផ្ញើសារដែលហាក់ដូចជាចំៗទៅកាន់លោក Infantino ទោះបីលោកមិនបានបញ្ចេញឈ្មោះប្រធាន FIFA រូបនេះក៏ដោយ។

 

លោកបានថ្លែងថា៖ «វាពិតជាគួរឱ្យសោកស្តាយណាស់ដែលបានឃើញស្ថានភាពនាពេលបច្ចុប្បន្ន»។

 

លោកបានបន្តថា៖ «ជំនួសឱ្យការធ្វើឱ្យបាល់ទាត់របស់យើងកាន់តែប្រសើរឡើង យើងបែរជាខ្ជះខ្ជាយពេលវេលាដោះស្រាយបញ្ហា និងវិវាទផ្សេងៗ។ បាល់ទាត់ដំណើរការបានល្អ នៅពេលយើងស្តាប់គ្នាទៅវិញទៅមក នៅពេលយើងមានតម្លាភាពរវាងគ្នា។ ប៉ុន្តែអ្វីដែលសំខាន់បំផុត គឺភាពស្មោះត្រង់ចំពោះគ្នា»។

 

សារព័ត៌មាន Reuters បានទាក់ទងទៅ FIFA ដើម្បីស្នើសុំការឆ្លើយតប។

 

លោក Al-Khelaifi បានប្រៀបធៀបភាពតានតឹងទាំងនេះជាមួយនឹងទំនាក់ទំនងរបស់ EFC និង UEFA ម្តងហើយម្តងទៀត ដោយលោកបានពិពណ៌នា UEFA ថាជា «ដៃគូដ៏សំខាន់ និងគួរឱ្យទុកចិត្តបំផុត» របស់អង្គការ។

 

លោកបានឱ្យដឹងថា ក្រុមហ៊ុនបណ្តាក់ទុនរួម UC3 របស់ EFC និង UEFA នឹងបង្កើតចំណូលលើសពី ២០ ពាន់លានអឺរ៉ូ (៥.៦៧ ពាន់លានដុល្លារ) ក្នុងវដ្តបួនឆ្នាំបន្ទាប់ ឬលើសពី ៥ ពាន់លានអឺរ៉ូក្នុងមួយរដូវកាល។

 

លោកបានបញ្ជាក់ថា ក្នុងចំណោមនោះ ប្រមាណ ២ ពាន់លានអឺរ៉ូ នឹងត្រូវចែកចាយដល់ក្លិបដែលមិនចូលរួមការប្រកួតក្នុងក្របខណ្ឌអឺរ៉ុប ព្រមទាំងវិស័យបាល់ទាត់យុវជន និងបាល់ទាត់នារី។ ចំណែកទឹកប្រាក់ ២៣៣ លានអឺរ៉ូ ត្រូវបានចែកចាយដល់ក្លិបចំនួន ៩០១ ដើម្បីជាថ្នូរនឹងការអនុញ្ញាតឱ្យកីឡាកររបស់ពួកគេចូលរួមការប្រកួតរបស់ក្រុមជម្រើសជាតិ UEFA ក្នុងចន្លោះឆ្នាំ២០២០ ដល់ឆ្នាំ២០២៤៕