សហព័ន្ធបាល់ទាត់តួកគីបានសម្រេចព្យួរការងារជាបណ្តោះអាសន្នលើមន្ត្រីក្លិបបាល់ទាត់បច្ចុប្បន្ន និងអតីតមន្ត្រីចំនួន ៤៤៨ នាក់ រួមទាំងប្រធានក្លិប Trabzonspor លោក Ertugrul Dogan និងអនុប្រធានក្លិប Besiktas លោក Hakan Daltaban ដែលជាផ្នែកមួយនៃការស៊ើបអង្កេតទ្រង់ទ្រាយធំលើករណីភ្នាល់។

 

យោងតាមសេចក្តីថ្លែងការណ៍របស់សហព័ន្ធបាល់ទាត់តួកគី (TFF) មន្ត្រីដែលត្រូវបានព្យួរការងារទាំងនេះ ធ្លាប់បំពេញតួនាទីនៅក្លិបក្នុងលីគកំពូលទាំងពីររបស់ប្រទេសក្នុងរដូវកាល ២០២៦-២៧ ហើយត្រូវបានរកឃើញថា បានដាក់ភ្នាល់ក្នុងអំឡុងពេលកាន់តំណែងរបស់ខ្លួន ក្នុងរយៈពេល ៥ ឆ្នាំកន្លងមក។

 

មន្ត្រីទាំង ៤៤៨ នាក់ ត្រូវបានបញ្ជូនទៅគណៈកម្មការវិន័យរបស់សហព័ន្ធ ដើម្បីចាត់វិធានការបន្ត។

 

សារព័ត៌មានបានរាយការណ៍ថា បញ្ជីឈ្មោះដែល TFF បានចេញផ្សាយកាលពីថ្ងៃពុធ រួមមានមន្ត្រីប្រមាណ ១៧១ នាក់ ដែលធ្លាប់បម្រើការនៅក្លិបក្នុងលីគកំពូល Super Lig។

 

លោក Dogan បាននិយាយថា លោកធ្លាប់មានគណនីភ្នាល់មួយ ហើយបានជូនដំណឹងអំពីរឿងនេះទៅកាន់អាជ្ញាធររួចហើយ។

 

លោក Dogan បានប្រាប់ស្ថានីយទូរទស្សន៍ A Spor ថា៖ «ក្រុមហ៊ុនទាំងនេះបានឧបត្ថម្ភក្លិប និងរៀបចំព្រឹត្តិការណ៍សម្ពោធផ្សេងៗ។ គ្មាននរណាម្នាក់គិតថា រឿងនេះនឹងបង្កបញ្ហានោះទេ… ប្រសិនបើយើងបានធ្វើខុស យើងសូមអភ័យទោស ប៉ុន្តែយើងមិនបានធ្វើអ្វីខុសឡើយ»។

 

សារព័ត៌មាន Reuters បានទាក់ទងទៅកាន់ក្លិប Trabzonspor និង Besiktas ដើម្បីស្នើសុំការអត្ថាធិប្បាយពីក្លិបទាំងពីរ លោក Dogan និងលោក Daltaban។

 

TFF បានរឹតបន្តឹងការត្រួតពិនិត្យលើសកម្មភាពភ្នាល់ ចាប់តាំងពីរឿងអាស្រូវមួយបានធ្វើឱ្យបាល់ទាត់តួកគីរង្គោះរង្គើកាលពីឆ្នាំមុន។ ជាផ្នែកមួយនៃការស៊ើបអង្កេត សហព័ន្ធបានព្យួរការងារអាជ្ញាកណ្តាលប្រមាណ ១៤៩ នាក់ និងកីឡាករចំនួន ១,០២៤ នាក់ ក្នុងរយៈពេលផ្សេងៗគ្នា។

 

បន្ទាប់មក កីឡាករល្បីៗមួយចំនួននៅលីគកំពូល និងមន្ត្រីជាន់ខ្ពស់របស់ក្លិប ត្រូវបានឃុំខ្លួនក្នុងប្រតិបត្តិការបង្ក្រាបការភ្នាល់ខុសច្បាប់ និងការរៀបចំលទ្ធផលប្រកួតនៅក្នុងលីគបាល់ទាត់អាជីពរបស់ប្រទេស។

 

ដោយឡែក នៅក្នុងការស៊ើបអង្កេតមួយផ្សេងទៀត តួកគីបានឃាត់ខ្លួនប្រធាន និងសមាជិក ៦ នាក់នៃគណៈកម្មការអាជ្ញាកណ្តាលបាល់ទាត់សំខាន់របស់ប្រទេស កាលពីថ្ងៃអង្គារ ពាក់ព័ន្ធនឹងការចោទប្រកាន់ថា មានការជ្រៀតជ្រែកក្នុងនីតិវិធីកាត់សេចក្តីរបស់អាជ្ញាកណ្តាល។