ខេត្តកំពង់ស្ពឺ ៖ ដោយបានការអនុញ្ញាតពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ត និងបានការសម្របសម្រួលនីតិវិធី ពីព្រះរាជអាជ្ញាអមសាលាដំបូងខេត្តកំពង់ស្ពឺ និងការណែនាំបន្ថែមពីលោកឧត្ដមសេនីយ៍ត្រី សម សាក់ ស្នងការរងផែនការងារនគរបាលព្រហ្មទណ្ឌ នៅថ្ងៃទី៣ ខែតុលា ឆ្នាំ២០២៦ លោកវរសេនីយ៍ទោ ជុន ចន្ទដេត អធិការនគរបាលស្រុកភ្នំស្រួច កំលាំងនគរបាលផ្នែកព្រហ្មទណ្ឌបានសហការជាមួយកំលាំងនគរបាលខេត្ដពោធិសាត់ធ្វេីការស្រាវជ្រាវនិងឈានទៅឃាត់បានជនសង្ស័យលួចម៉ូតូ១គ្រឿង។
មន្ត្រីនគរបាលបានឲ្យដឹងថា ជនសង្ស័យឈ្មោះ ស្រស់ លីហុង ភេទប្រុស រស់នៅភូមិកប៉ាស់ ឃុំឈើតុំ ស្រុកក្រគរ ខេត្តពោធិ៍សាត់ និងដកហូតបានម៉ូតូ១គ្រឿងម៉ាកឌ្រីម125cc ពណ៌ខ្មៅឆ្នាំ២០២៦ ស្លាកលេខកំពង់ស្ពឺ 1AC-1209 ជាកម្មសិទ្ធិឈ្មោះ សៅ ពៅ ភេទប្រុស អអាយុ ២២ឆ្នាំ រស់នៅភូមិកណ្ដាល ឃុំតាំងសំរោង ស្រុកភ្នំស្រួច ប្ដឹងពីឈ្មោះ ស្រស់ លីហុង ភេទប្រុស ថា »បានធ្វើសកម្មភាពចូលលួចម៉ូតូរបស់ខ្លួនដែលទុកនៅក្នុង
បន្ទប់ក្រោមផ្ទះ។
ក្រោយឃាត់ខ្លួនឈ្មោះ ស្រស់ លីហុង កម្លាំងសមត្ថកិច្ចនគរបាលបាននាំជនសង្ស័យរួមជាមួយវត្ថុតាងម៉ូតូ
បញ្ជូនមកអធិការដ្ឋាននគរបាលស្រុកភ្នំស្រួច សាកសួរបំពេញនីតិវិធីនិងបានកសាងសំណុំរឿងបញ្ជូនទៅការិយាល័យព្រហ្មទណ្ឌនៃស្នងការដ្ឋាននគរបាលខេត្ដកំពង់ស្ពឺចាត់ការតាមមនីតិវិធីបន្ដ។
រីឯម៉ូតូបានគោលការណ៍ឯកភាពប្រគល់ជូនម្ចាស់ដេីម្បីប្រេីប្រាស់វិញ៕
ដោយ៖ សុរិយា
