ភ្នំពេញ៖ កម្លាំងកងរាជអាវុធហត្ថខណ្ឌចំការមនបានធ្វើការឃាត់ខ្លួនជនសង្ស័យ៣នាក់ជាបន្តបន្ទាប់ ដែលជាមុខសញ្ញាចែកចាយគ្រឿងញៀន និងរកឃើញថ្នាំញៀន១កញ្ចប់ធំ ១០កញ្ចប់តូច ។

ក្នុងប្រតិបត្តិការបង្ក្រាបនេះបានធ្វើឡើងនៅវេលាម៉ោង៦ល្ងាច ថ្ងៃទី៥ ខែតុលា ឆ្នាំ២០១៦ នៅក្បែរស្ពានអាកាសក្បាលថ្នល់ ស្ថិតក្នុងសង្កាត់ផ្សារដើមថ្លូវ ខណ្ឌចំការមន ។

បើតាមសម្ដីកម្លាំងកងរាជអាវុធហត្ថមូលដ្ឋានបានប្រាប់ឱ្យដឹងថា នៅមុនពេលកើតហេតុសមត្ថកិច្ចបានធ្វើការស៊ើបអង្កេត មុខសញ្ញាខាងលើអស់រយៈពេលជាច្រើនថ្ងៃ ហើយនៅថ្ងៃកើតហេតុកម្លាំងបានឃើញជនសង្ស័យម្នាក់បាននឹងកំពុងធ្វើសកម្មភាពចែកចាយគ្រឿងញៀន ពេលនោះកម្លាំងបានឃាត់ខ្លួនភ្លាមៗនៅចំណុចច្រមុះជ្រូកក្បាលថ្នល់ ស្ថិតក្នុងភូមិ១២ សង្កាត់ទន្លេបាសាក់ ដោយរកឃើញថ្នាំញៀន២កញ្ចប់ ។ បន្ទាប់ពីធ្វើការសួរនាំរួចមក ជនសង្ស័យខាងលើបានសារភាពថា ខ្លួនបានទិញពីគេយកមកលក់បន្តនៅក្រោយQB ពេលនោះកម្លាំងបានចុះទៅទីតាំងនោះ និងឃាត់ខ្លួនបាន២នាក់ទៀត ដោយរកឃើញថ្នាំញៀន៩កញ្ចប់ និងវត្ថុតាងមួយចំនួនទៀត ។

ក្រោយមកកម្លាំងអាវុធហត្ថបាននាំខ្លួនជនសង្ស័យទាំង៣នាក់ និងគ្រឿងញៀន១១កញ្ចប់ យកទៅទីបញ្ជាការកងរាជអាវុធហត្ថខណ្ឌ ដើម្បីធ្វើការសួរនាំ និងបញ្ជូលទៅបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចាត់ការតាមផ្លូវច្បាប់ ៕

ដោយ៖ ជីម ភារ៉ា ដង្កោ