ភ្នំពេញ៖  ក្រោយពីចាញ់នៅក្នុងទឹកដីហុងកុងក្រុមបាល់ទាត់ជម្រើសជាតិកម្ពុជានឹងត្រូវស្វាគមន៍ក្រុមហុងកុងម្តងទៀតក្នុងជំនួបមិត្តភាពអន្តរជាតិនៅម៉ោង៦ និង៣០នាទីល្ងាចថ្ងៃ៦ ខែតុលា ឆ្នាំ២០១៦នេះ នៅពហុកីឡដ្ឋានជាតិអូឡាំពិក ក្រោយពីកម្ពុជាចាញ់ ៤-២ កាលពីថ្ងៃទី១ ខែកញ្ញា ឆ្នាំ២០១៦ នៅទឹកដីហុងកុងនោះ ។

តាមការប្រកួតកន្លងមកក្រុមហុងកុងមានប្រវត្តិឈ្នះក្រុមកម្ពុជាច្រើនជាង ដោយ៥ប្រកួត កម្ពុជាឈ្នះតែ២ប្រកួតប៉ុណ្ណោះ ។ ចំណែកហុងកុងវិញឈ្នះ៣ប្រកួតឯណោះ ។ ប៉ុន្តែកីឡាករក៏ដូចជាគ្រូបង្វឹកមានសង្ឃឹមច្រើនក្នុងការប្រកួតនៅលើទឹកដីល្ងាចនេះ ជាមួយនឹងសន្ទុះនៃការគាំទ្រកម្ពុជាកាន់តែកើនឡើងខ្លាំង។

ជំនួបប្រកួតមិត្តភាពអន្តរជាតិនេះគឺជាការសមជើងសម្រាប់កម្ពុជា ត្រៀមធ្វើម្ចាស់ផ្ទះនៃការប្រកួតវគ្គជម្រុះពានរង្វាន់ អាស៊ាន AFF Suzuki Cup 2016 ដើម្បីស្វែងរកកៅអីទៅបង្រ្គប់ពូល B ក្នុងជុំផ្តាច់ព្រ័ត្រដែលប្រារព្ធធ្វើនៅចុងឆ្នាំ២០១៦ ខាងមុខ។

គួរបញ្ជាក់ថា កម្ពុជាទើបតែបំបែកកំណត់ត្រាប្រវត្តិសាស្រ្តថ្មី ដោយយកឈ្នះក្រុមសិង្ហបុរី ២-១ ក្នុងមិត្តភាពអន្តរជាតិដូចគ្នាកាលពីខែកក្កដាកន្លងទៅនៅពហុកីឡដ្ឋានជាតិអូឡាំពិក។ ជ័យជម្នះធ្វើឲ្យក្រុមកម្ពុជាកាន់តែមានសង្ឃឹមខ្ពស់ក្នុងការប្រកួតសំខាន់ៗនៅលើឆាកអន្តរជាតិ។

នៅល្ងាចនេះតាមស្ថិតសំបុត្រដែលលក់សម្រាប់ការទស្សនាកម្ពុជាប្រកួតជាមួយនឹងហុងកុងនេះគឺមានរហូតដល់ជាង៥ម៉ឺនសន្លឹកហើយៗនឹងមានការផ្សាយបន្តផ្ទាល់តាមកញ្ចក់ទូរទស្សន៍បាយ័នផងដែរ ៕

ដោយ៖ សារីម