ភ្នំពេញ៖ ក្មេងស្រីម្នាក់បានបើកម៉ូតូលឿនវ៉ាក់អើនឹងរថយន្តមួយគ្រឿងដែលខូចដាច់កាឡេនៅកណ្តាលផ្លូវ ដោយមិនបានដាក់ស្លាកសញ្ញាចរាចរណ៍បណ្តាលឲ្យក្មេងស្រីម្នាក់អ្នកបើកម៉ូតូចាប់ហ្វ្រាំងមិនទាន់ដួលអូសជាងច្រើនម៉ែត្រ ទៅបុកចូលក្រោមរថយន្ត សំណាងល្អរងរបួសស្រាល។
ករណីនេះកើតឡើងនៅវេលាម៉ោង៧ និង៣០នាទីព្រឹក ថ្ងៃទី១១ ខែតុលា ឆ្នាំ២០១៦ នៅតាមបណ្តោយផ្លូវជាតិលេខ៦ ត្រង់ចំណុចខាងមុខ (ស្រីមុំ ពន្លឺ ) មានលក់បាយ ម្ហូបកម្ម៉ង់ ស្ថិតនៅក្នុងភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វា។
សមត្ថកិច្ចនគរបាលមូលដ្ឋានបានឲ្យដឹងថា ជនរងគ្រោះខាងលើមានឈ្មោះឈ្មោះ ផៃ ស្រីនិច អាយុ ១៦ឆ្នាំ មុខរបរសិស្សថ្នាក់ទី១១ នៅវិទ្យាល័យ ព្រែកលៀប ស្នាក់នៅភូមិបាក់ខែង សង្កាត់បាក់ខែង ខណ្ឌជ្រោយចង្វា រីឯម្ចាស់រថយន្តបានរត់គេចខ្លួនបាត់ ។
ប្រភពព័ត៌មានពីសមត្ថកិច្ចនគរបាលនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្ត មួយគ្រឿង ម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3A-0022 បានខូចដាច់កាឡេកំពុងជួសជុលនៅកណ្តាលផ្លូវ ដោយមិនបានដាក់ស្លាកសញ្ញាចរាចរណ៍ពីក្រោយ ខណៈនោះជនរងគ្រោះបានបើកម៉ូតូម្នាក់ឯងម៉ាកហុងដាស្កុបពី ពណ៌ស ពាក់ស្លាកលេខ ភ្នំពេញ 1CA-7646 ចេញពីផ្ទះទៅរៀនអង់គ្លេសនៅម្តុំផ្សារតូច ស្ថិតនៅក្នុងសង្កាត់ទួលសង្កែ ខណ្ឌឫស្សីកែវ បានបើកតាមបណ្តោយផ្លូវជាតិលេខ៦A ក្នុងទិសដៅស្របទិសគ្នា ពេលបើកម៉ូតូមកដល់ចំណុចកើតហេតុខាងលើ ជនរងគ្រោះក៏បានវ៉ាក់អើនឹងរថយន្តដែលខូចនៅខាងមុខ ក៏បានចាប់ហ្វ្រាំងអូសជាច្រើនម៉ែត្រទៅបុកចូលពីក្រោយក្រោមរថយន្តតែម្តង សំណាងល្អគ្រាន់តែរបួសស្រាល ។
ក្រោយពេលកើតហេតុ សមត្ថកិច្ចជំនាញចរាចរណ៍ចុះមកកន្លែងកើតហេតុនាំយករថយន្ត និងម៉ូតូមករក្សាទុក្ខនៅអធិការដ្ឋាននគរបាលខណ្ឌជ្រោយចង្វា រងចាំដោះស្រាយគ្នាតាមនីតិវិធី៕
ដោយ៖ ជ្រោយពេជ្រ
