ស្ថានការនៅក្នុងរដ្ឋ Jummu និងដែនដីនៅតំបន់កាស្មៀរកំពុងតែប្រឈមមុខតានតឹង ដែលកម្លាំងប្រដាប់អាវុធទាំងឡាយឈរជើងនៅតាមបន្ទាត់ព្រំដែនទាំងពីរប្រទេសប៉ាគីស្ថាន និងឥណ្ឌាបានផ្ទុះអាវុធដាក់គ្នាទៅវិញទៅមករយៈពេលច្រើនសប្តាហ៍កន្លងមកហើយ បណ្តាលឲ្យស្លាប់កងទ័ព និងជនស៊ីវិលរៀងៗខ្លួន ។ ពួកគេបានចោទប្រកាន់គ្នាថា បានឆ្លងចូលខ្សែបន្ទាត់ព្រំដែនដែលមិនទាន់មានការបែងចែក ឬកំណត់ច្បាស់លាស់ គឺស្ថិតនៅជាតំបន់សនៅឡើយ ។
ការវាយប្រហារកាលពីពេលថ្មីៗនេះទៅលើរថយន្តក្រុងដែលធ្វើដំណើរតាមបណ្តោយព្រំដែននោះបានបណ្តាលឲ្យអ្នកទេសចរណ៍ម្នាក់បាត់បង់ជីវិត និងអ្នកដទៃផ្សេងទៀតត្រូវបានចាប់ខ្លួន ដោយក្រុមនៅក្នុងតំបន់ និងបាននាំជនរងគ្រោះទាំងនោះទៅធ្វើជាចំណាប់ខ្មាំង ប៉ុន្តែនៅពេលបន្ទាប់ជនរងគ្រោះត្រូវប្រគល់ទៅក្រុមឧទ្ទាមប្រដាប់អាវុធ ។
អ្នកដែលវាយប្រហារទៅលើរថយន្តលើនេះ ក្រោយមកបានប្រកាសអត្តសញ្ញាណខ្លួនឯងទៅកាន់ប៉ូលិសឥណ្ឌាថា គាត់ជាពលរដ្ឋប៉ាគីស្ថានឈ្មោះ Mohd Naved ។ លោកគ្មានវិប្បដិសារីចំពោះទង្វើរបស់គាត់ឡើយ គាត់ថា វាជារឿងសប្បាយ នៅក្នុងការសម្លាប់មនុស្ស(ហិណ្ឌូ)។
ប្រព័ន្ធផ្សព្វផ្សាយរបស់ឥណ្ឌាបានផ្សព្វផ្សាយស្នើឲ្យរដ្ឋាភិបាលប្តឹងទៅថ្នាក់ដឹកនាំប៉ាគីស្ថានពាក់ព័ន្ធបុរសខាងលើនេះ ។ ប៉ុន្តែក្រសួងការបរទេសប៉ាគីស្ថានបានបដិសេធថា ជនវាយប្រហារនោះគឺជាពលរដ្ឋរបស់ប៉ាគីស្ថាន ។ លោក Qazi Khalilullah អ្នកនាំពាក្យក្រសួងការបរទេសប៉ាគីស្ថានបានថ្លែងថា ជាច្រើនលើកច្រើនសារមកហើយ យើងបានប្រកាសថា មិនមែនតែរឿងអ្វីភ្លាមបន្ទោសតែទៅលើប៉ាគីស្ថាននោះទេ ។ មុននឹងបន្ទោសទៅលើប៉ាគីស្ថាន គួរតែផ្អែកទៅលើមូលដ្ឋានជាក់ស្តែង ស៊ើបអង្កេតឲ្យបានច្បាស់លាស់ជាមុនសិនដែរ ។ មិនមែនស្អីបន្តិច ក៏ប៉ាគីស្ថានជាអ្នកធ្វើនោះទេ ។ វាគួរតែផ្អែកទៅលើភស្តុតាងជាក់លាក់ ពិតប្រាកដ។
តាមការគ្រោងទុក មន្ត្រីទទួលបន្ទុកកិច្ចការព្រំដែនប្រទេសឥណ្ឌា និងប៉ាគីស្ថានបានព្រមព្រៀងគ្នាជួបប្រកជុំថ្នាក់ទីប្រឹក្សាសន្តិសុខជាតិ ដែលគ្រោងធ្វើឡើងនៅក្នុងខែសីហា ឆ្នាំ២០១៥ ប៉ុន្តែដំណើរឆ្ពោះទៅរកកិច្ចជំនួបចរចាដើម្បីសន្តិភាពនេះឡើងហាក់នៅឆ្ងាយដាច់សន្លឹម ដោយសារថា ស្ថានការណ៍មិនស្ងប់ស្ងាត់ទាល់តែសោះនៅតាមបន្ទាប់ព្រំដែន ចេះតែបន្តផ្ទុះហិង្សាដាក់គ្នាជានិច្ច ហើយម្យ៉ាងវិញទៀតខាងបក្ខប្រឆាំងនៅក្នុងប្រទេសទាំងពីរ ក៏បន្តរិះគន់មិនចេញនឿយហត់ទៅលើគម្រោងចរចាសន្តិភាពរវាងរដ្ឋាភិបាលឥណ្ឌា នឹងប៉ាគីស្ថាន ដើម្បីស្វះស្វែងរកសន្តិភាពឲ្យបានពេញលេញនៅតាមបន្ទាត់ព្រំដែនប្រទេសភូមិផងរបងជាប់គ្នានោះ ។
អ្នកជំនាញរបស់ក្រសួងការពារជាតិឥណ្ឌាបានបញ្ជាក់ថា ភស្តុតាងមានគ្រប់គ្រាន់សម្រាប់ផ្តល់ជូនប៉ាគីស្ថាន ។ ប្រភពបន្តថា គម្រោងចរចាសន្តិភាពនាពេលខាងមុខរបស់ NSA (ក្រុមប្រឹក្សាសន្តិសុខជាតិ) ដែលគ្រោងធ្វើឡើងនៅថ្ងៃទី២៣ និងថ្ងៃទី២៤ ខែសីហា ឆ្នាំ២០១៥ ដល់ពេលនោះភស្តុតាងទាំងនេះនឹងត្រូវលើកយកមកបង្ដាញភាគីប៉ាគីស្ថានឲ្យបានឃើញ ហើយជំនួបពិភាក្សានេះទំនងជាមិនទទួលបានផ្លែផ្កានោះទេ ។
ខណៈដែលកិច្ចពិភាក្សាជិតឈានមកដល់នោះ អំពើហិង្សាហាក់គ្មានការស្រាកស្រាននោះទេ ។ កាលពីថ្ងៃទី៦ ខែសីហា មានការវាយប្រហារទៅលើប៉ុស្តិ៍សន្តិសុខរបស់កម្លាំងប៉ូលិសឥណ្ឌា ពីសំណាក់ក្រុមប្រដាប់អាវុធ ស្ថិតនៅតំបន់ព្រៃជ្រៅ Jammu ទីកន្លែងនេះ កាលពីដើមឡើយជាទីតាំងគ្មានយោធា ។
ឥណ្ឌាបានពង្រឹងការពារតំបន់ព្រំដែនបន្ថែមទៀតពីចម្ងាយ៣៥០គីឡូម៉ែត្រទៅ៤០០គីឡូម៉ែត្រស្ថិតនៅព្រំដែនរដ្ឋ Jammu និង កាស្មៀរ ដែលជាវិធានការមួយការពារកុំឲ្យមានការវាយប្រហារភេរវកម្ម បើទោះបីនៅទីនោះមានវត្តមានកងទ័ពឥណ្ឌា និងប៉ាគីស្ថានយាមកាមសន្តិសុខយ៉ាងតឹងរ៉ឹងស្ថិតនៅតំបន់ព្រំដែនប្រឈមមុខដាក់គ្នាក៏ដោយ ។ ប្រសិនបើអំពើហិង្សានៅតាមបន្ទាត់ព្រំដែនប៉ាគីស្ថាន និងឥណ្ឌា គ្មានការស្ងប់ស្ងាត់ ថយកម្តៅទៅវិញទេ នោះដំណើរការចរចាសន្តិភាពរវាងឥណ្ឌា នឹងប៉ាគីស្ថានទំនងមិនសម្រេចបានជាលទ្ធផលឡើយ ៕
ប្រែសម្រួល៖ យ៉ាត
