ភ្នំពេញ៖ កម្លាំងនគរបាលជំនាញ បានស្រាវជ្រាវរកឃើញឃាតក ដែលសម្លាប់បុរសម្នាក់ហើយយកទៅទម្លាក់ចោលនៅក្នុងទឹកប្រឡាយក្នុងភូមិគោក ចំបក់ សង្កាត់ចោមចៅ ខណ្ឌពោធិ៍សែនជ័យកាលពីវេលា ម៉ោង១០និង៣៥ នាទីព្រឹក ថ្ងៃទី១៤ ខែតុលា ឆ្នាំ២០១៦ រហូតមកថ្ងៃទី២០ ខែតុលា ឆ្នាំ២០១៦ សមត្ថកិច្ចបានឈានដល់ការបំបែកសំណុំរឿងឃាតកម្មសម្លាប់អ្នក បើក ឡានឈ្នួលនេះ ជាផែនការ របស់ប្រពន្ធដើមនៃសពក្លាយជាឃាតកសម្លាប់ប្តី ព្រោះគំនុំស្នេហ៍ប្តីមានប្រពន្ធចុង ។

សាកសព ឈ្មោះ កៅ ផា ភេទប្រុស អាយុ៤៨ឆ្នាំ មុខរបរបើកបររថយន្តឈ្មួល ស្វាយ រៀង កំពង់ចាម ភ្នំពេញ រស់នៅភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង ។ មានប្រពន្ធចំនួន២នាក់ ទី១ ជាប្រពន្ធដើមឈ្មោះ សៅ សំអឿន អាយុ៤៦ឆ្នាំ មុខរបរនៅផ្ទះ មានកូន ចំនួន៤នាក់ ប្រុស៣នាក់ ស្រី១នាក់ រស់នៅក្នុងបន្ទុកគ្រួសារ ។

ទី២ ជាប្រពន្ធចុង ឈ្មោះ ចាប សាម៉េត អាយុ៣៣ឆ្នាំ មុខរបរ កម្មកររោងចក្រ រស់នៅភូមិចុងព្រែក ឃុំកំពង់ព្រែកស្រុករមាសហែក មានស្រុកកំណើត ភូមិតាហង់ឃុំអណ្តូងពោធិ៍ស្រុករមាសហែក ខេត្ត ស្វាយរៀង ។ ចំណែកសម្ភារៈពាក់ព័ន្ធ រថយន្តម៉ាក សាំយ៉ុង ពណ៌ស ពាក់ស្លាកលេខ ភ្នំពេញ 2AB-4728 និង ចិញ្ចៀនមាសមួយវង់ទម្ងន់៥ជី ។

បន្ទាប់ពីសមត្ថកិច្ចជំនាញធ្វើការពិនិត្យ កោសល្យវិច័យ ស្រាវជ្រាវ រយះពេល១ថ្ងៃទើបរកឃើញអត្តសញ្ញាណ សាច់ ញាតិ និងបន្តស្រាវជ្រាវទីបំផុត ការស្លាប់របស់បុរសខាងលើជាផែនការរៀបចំ គ្រោងទុកជាមុនរបស់ ស្រ្តីជាប្រពន្ធដើមទាំងអស់ ជួលឃាតករសម្លាប់ ប្តីរបស់ខ្លួនចោល ហើយត្រូវបាន កម្លាំងជំនាញ កងរាជអាវុធហត្ថក្រុងភ្នំពេញ វែកមុខរកឃើញ ឃាត់ខ្លួនបានមនុស្ស៣នាក់ ស្រី២នាក់ ប្រុសម្នាក់ កាលពីវេលាម៉ោង៧និង៣០នាទីយប់ថ្ងៃទី២០ខែតុលាឆ្នាំ ២០១៦ ស្ថិតនៅដីវាលខាងក្រោយ សួន កាណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។

តាមការបង្ហើបឲ្យដឹងពីសមត្ថកិច្ចបានឲ្យដឹងថា មនុស្ស៣នាក់ ពាក់ព័ន្ធក្នុងរឿងឃាតកម្មខាងលើ ហើយឃាត់ខ្លួនបាន ទី១ ស្រ្តីជាប្រពន្ធដើម ឈ្មោះ សៅ សំអឿន អាយុ៤៦ឆ្នាំ ។ ទី២ ឈ្មោះ សូរ ផា ហៅអ៊ួក អាយុ៣០ឆ្នាំ មុខរបរ បើកបររថយន្តឈ្នួល មានទីលំនៅក្បែរខាងគ្នា ជាអ្នកប្រើល្បិច ជួល រថយន្តជិះទៅខាងខេត្តសៀមរាប ហើយជាអ្នកវាយសម្លាប់ផ្ទាល់ដៃ ។ ទី៣ ស្រ្តីម្នាក់ មិនទាន់ ស្គាល់ ឈ្មោះ គ្រាន់តែដឹងថា ជាសង្សារ របស់ឈ្មោះ សូរ ផា ហៅអ៊ួក ។

ជនរងគ្រោះក្រោយពី ជនដៃដល់ ឈ្មោះសូរ ផា ជួលរថយន្ត ជិះទៅខាង ខេត្ត សៀមរាប នៅព្រឹកថ្ងៃទី១២ ខែតុលា លុះពេលវិលត្រឡប់មកវិញ ក្នុងថ្ងៃទី១៣ ខែតុលា មកដល់ ក្នុងទឹកដីខេត្តកំពង់ធំ ឃាតករ ឈ្មោះ សូរ ផា ដែលត្រូវបាន ស្រ្តីជាប្រពន្ធដើម ឈ្មោះ សៅ សំអឿន ជួលសម្លាប់ប្តីក្នុងតម្លៃ១០០០ដុល្លា នោះ បានធ្វើសកម្មភាពវាយ ជនរងគ្រោះបណ្តាលឲ្យស្លាប់ រួច ហើយ ដឹកសាកសពតាមរថយន្តផ្សេងមួយគ្រឿងទៀត ចូលមកទីក្រុងភ្នំពេញ ដើម្បីយកសព ទៅទម្លាក់ចោលក្នុងទឹកប្រឡាយ ត្រង់ចំណុចខាងលើ ហើយគេចខ្លួនបាត់ ។

លុះរហូតដល់ ព្រឹកថ្ងៃទី១៤ ខែតុលា សាកសពជនរងគ្រោះ ត្រូវបានប្រជាពលរដ្ឋប្រទះឃើញ ហើប អណ្តែតផុតពីទឹក សមត្ថកិច្ចពិនិត្យនិងកោសល្យវិច័យ ហើយធ្វើការស្រាវជ្រាវ រហូតដល់ ព្រលប់ ថ្ងៃ ទី១៥ ខែតុលា ឆ្នាំ២០១៦ត្រូវបាន លេចមុខ ប្រពន្ធដើម ប្រពន្ធចុង របស់ជនរងគ្រោះ មក ដល់ ប៉ុស្តិ៍ ចោមចៅ សាកសួរ ដំណើររឿងអង្គហេតុ កម្លាំងជំនាញ ទាំងនគរបាល ទាំង កម្លាំង អាវុធ ហត្ថ ក្រុង ភ្នំពេញ ។ លុះដល់ ថ្ងៃទី១៨ ខែតុលា រថយន្តសាំយ៉ុង របស់ជនរងគ្រោះ បើកបរ នោះត្រូវបាន ជន មិន ស្គាល់មុខ យកទៅផ្លុងចោល នៅឯស្រុករមាសហែក ក្បែរផ្ទះ ជនរង គ្រោះវិញឃាតក និងជនពាក់ព័ន្ធ សរុបគ្នា៣នាក់ ត្រូវបាននាំខ្លួនទៅកាន់ការិយាល័យជំនាញ អាវុធ ហត្ថក្រុងភ្នំពេញ ដើម្បីសាកសួរ និងចាត់ការទៅតាមនីតិវិធី ៕

ដសុខាសែនជ័យ