ខេត្តស្វាយរៀង៖ មានការភ្ញាក់ផ្អើលដល់ប្រជាពលរដ្ឋនិងអ្នកធ្វើដំណើរទាំងព្រឹកខណៈមានបុរសស្ត្រី២នាក់បើករថយន្តឡើងស្ពានហើយមានគោយន្តបើកពីត្បូងមកជើងធ្វើឲ្យភ័យស្លន់បួងចង្កូតបុកស្ពានពេញទំហឹងបណ្ដាលឲ្យរថយន្តខូចខាតផ្នែកខាងមុខសំណាងមិនមានអ្នករងរបួស កាលពីវេលាម៉ោង៨ព្រឹកថ្ងៃទី២៣ ខែតុលា ឆ្នាំ២០១៦ ស្ថិតក្នុងភូមិរោងបន្លែ សង្កាត់-ក្រុងស្វាយរៀង ខេត្តស្វាយរៀង។

បើតាមប្រជាពលរដ្ឋបានឲ្យដឹងថា នៅមុនពេលកើតហេតុគេឃើញមានរថយនមួយគ្រឿងម៉ាកបាឡែន ពណ៌ទឹកប្រាក់ ពាក់ស្លាកលេខភ្នំពេញ2AG-8445 ធ្វើដំណើរមានគ្នា២នាក់ក្នុងទិសដៅពីលិចទៅកើតយ៉ាងលឿនហើយក៏បានបត់ស្ដាំឡើងលើស្ពានថ្មគយត្របែក ស្រាប់តែមានគោយន្តបើកពីត្បូងមកជើងបញ្ច្រាស់គ្នាស្រាប់តែស្ត្រីជាអ្នកបើករថយន្តបួងចង្កូតទៅបុកនិងបង្កាន់ដៃស្ពានពេញទំហឹង តែសំណាងល្អមិនមានគ្រោះថ្នាក់ដល់អាយុជីវិតនោះទេ។

ក្រោយមកក៏មានប្រជាពលរដ្ឋនាំគ្នាជួយរុញរថយន្តបាឡែននេះចេញកុំឲ្យមានការកកស្ទះចរាចរណ៍ និងសមត្ថកិច្ចនគរបាលក្រុងក៏មិនបានឃាត់និងធ្វើការវាស់វែងអ្វីនោះដែរព្រោះមិនបង្កឲ្យមានគ្រោះថ្នាក់ដល់អ្នកដទៃក៏ប្រគល់រថយន្តឲ្យម្ចាស់យកទៅជុសជុលខ្លួនឯង៕

ដោយ៖ យឹម សុថាន