ភ្នំពេញ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុនិងយុវជនម្នាក់រងរបួសធ្ងន់ខណៈម៉ូតូ២គ្រឿងបុកចំពីមុខពេញទំហឹង កាលពីវេលាម៉ោង៦ព្រឹកថ្ងៃទី៣ ខែធ្នូ ឆ្នាំ២០១៦ ត្រង់ចំណុចមុខផ្ទះលក់វាំងនង តាមបណ្ដោយផ្លូវលេខ៣១០ ស្ថិតក្នុងសង្កាត់អូឡាំពិត ខណ្ឌចំការមន រាជធានីភ្នំពេញ។

អ្នកស្លាប់មានឈ្មោះ គឹម សិរី ភេទប្រុស អាយុ៤៤ឆ្ នាំមុខរបរសន្តិសុខស្នាក់នៅក្នុងសង្កាត់ច្បារអំពៅ ខណ្ឌច្បារអំពៅ។
ចំណែកសិស្សដែលរងរបួសធ្ងន់មិនទាន់ស្គាល់ឈ្មោះនោះទេតែមានអាយុប្រហែល១៦ឆ្នាំជាសិស្សនៅសាលាព្រះយុគន្ធ។

បើតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់ជិះម៉ូតូមួយគ្រឿងម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1AB-5853បានធ្វើដំណើរតាមបណ្ដោយផ្លូវលេខ៣១០ ទិសដៅពីកើតទៅលិច ក្នុងល្បឿនលឿន ខណៈមកដល់ចំណុចកើតហេតុខាងលើក៏មានយុវជនម្នាក់ជាសិស្សបានជិះម៉ូតូមួយគ្រឿងម៉ាកZoomer-x ពណ៍ស ពាក់ស្លាកលេខ ភ្នំពេញ 1FU-9944 បានបើកបញ្ច្រាសទិសដៅគ្នាក្នុងល្បឿនលឿនដូចគ្នា ក៏បុកគ្នាចំមុខពេញទំហឹងបណ្ដាលឲ្យបុរសម្នាក់ស្លាប់និងយុវជនម្នាក់ទៀតរងរបួសធ្ងន់ ។ បន្ទាប់ពីកើតហេតុរថយន្តសាមុយបានដឹកជនរងគ្រោះទៅមន្ទីរពេទ្យភ្លាមៗ ចំណែកអ្នកស្លាប់ត្រូវបានសមត្ថកិច្ចជំនាញទំទាក់ទំនងទៅក្រុមគ្រួសារឲ្យមកទៅតម្កល់នៅវត្តទួលទំពួងដើម្បីធ្វើបុណ្យតាមប្រពៃណី។

ក្រោយពេលកើតហេតុម៉ូតូទាំង២គ្រឿងត្រូវបានសមត្ថកិច្ចជំនាញវាស់វែងយក យកទៅរក្សាទុកនៅការិយាល័យនគរបាលផ្លូវគោករាជធានីភ្នំពេញ ដើម្បីដោះស្រាយគ្នាពេលក្រោយ៕

ដោយ៖ ស រស្មី