ភ្នំពេញ ៖ នៅព្រឹកថ្ងៃទី១៧ ខែធ្នូ ឆ្នាំ២០១៦នេះ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជ ធានីភ្នំពេញ មានការចូលរួមពីលោកអភិបាលរងខណ្ឌសែនសុខ និងខណ្ឌមានជ័យបានចុះពិនិត្យ រុះរើរបងផ្ទះ និងផ្ទះ១កន្លែង ដែលបានសាងសង់កាត់ទទឹងប្រឡាយ និងបិទផ្លូវទឹកប្រឡាយស្ទឹងមានជ័យ ។
លោក សាំ ពិសិដ្ឋ បានមានប្រសាសន៍ឲ្យដឹងថា ការសង់កាត់ទទឹងប្រឡាយបិទផ្លូវទឹកនេះ បណ្តាលអោយតំបន់ទឹកថ្លា ផ្លូវលេខ២០០៤ ផ្លូវណ័រប្រីត តំបន់ខាងត្បូងព្រលានយន្តហោះ រងការលិចលង់ធ្ងន់ធ្ងរ កាលពីថ្ងៃម្សិលមិញ ។ ជាមួយគ្នានេះ គ្រឿងចក្រកំពុងចុះកាយភក់ ស្មៅ តាមទីតាំងដែលអាចជីកបាន ដើម្បីបង្ហូរផ្លូវទឹកសិន ។
លោកបន្តថា ប្រឡាយស្ទឹងមានជ័យប្រវែង១៧០០ម៉ែត្រ ទទឹង៣០ម៉ែត្រទៅ៨០ម៉ែត្រ ត្រូវបានប្រជាពលរដ្ឋ ជាង ១០០០គ្រួសារ បាននិងកំពុងសាងសង់រស់នៅពីលើពោះប្រឡាយ ។ បញ្ហានេះបានប្រឈមទៅនឹងការបិទផ្លូវទឹកហូរបណ្តាលអោយទឹកជន់លិចនៅផ្នែកខាងលើ ៕ ដ្រេហ្គន
