ខេត្តមណ្ឌលគិរី៖ ប្រជាពលរដ្ឋរស់នៅស្រុកកែវសីមា បាននាំគ្នាចោទប្រកាន់មន្ត្រីបរិស្ថានខេត្តមណ្ឌលគិរីម្នាក់ថា បានបង្ករឲ្យយុវជនម្នាក់ ស្លាប់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់ កំពុងជួយសង្គ្រោះបន្ទាន់នៅមន្ទីរពេទ្យកាលពីវេលាម៉ោង១កណ្តាលអាធ្យាត ថ្ងៃទី១៧ ធ្នូ ២០១៦ ខណៈរថយន្តរបស់ឈ្មោះណាក់ មន្រ្តីបរិស្ថានបានដេញ រថយន្តដឹកឈើមកដល់ត្រង់ចំណុចផ្លូវបំបែកឆ្ពោះទៅព្រំដែនឡាប៉ាខេ តាមបណ្តោយផ្លូវជាតិលេខ៧៦ ស្ថិតក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ។
អធិកាស្រុកកែវសីមាលោក ស៊ុន ប៊ុនធឿន បានឲ្យដឹងថា ករណីគ្រោះថ្នាក់ចរាចរណ៍ ដែលបណ្តាលឲ្យមានមនុស្សម្នាក់ស្លាប់នឹងរបួសម្នាក់នេះគឺ បណ្ដាលមកពីរថយន្ដរបស់មន្ត្រីបរិស្ថាន បើកប្រដេញហើយយក រថយន្តរបស់ខ្លួនទៅបាំងពីមុខរថយន្ដដឹកឈើទើប រថយន្តដឹកឈើបុកគ្នាពេញទំហឹងតែម្តង ។ លោកបន្តថា នៅពេលបើកទៅស្កាត់ពីមុខរថយន្តដឹកឈើ ពេលនោះឈើ ដែលនៅក្នុងរថយន្តបានរុញបុកផ្ទប់ មកលើតៃកុងឡាន និងព្រូ បណ្ដាលឲ្យគាបជាប់ក្នុងឡាន បណ្ដាលឲ្យស្លាប់ព្រូម្នាក់ និងតៃកុងឡានរងរបួសធ្ងន់ ។
ជនរងគ្រោះក្នុងគ្រោះថ្នាក់ខាងលើ ម្នាក់មានឈ្មោះ ញាញ់ ភេទប្រុស អាយុ២៤ឆ្នាំ ជាអ្នកបើកបររថយន្តម៉ាក កាមរីហើម កែច្នៃដឹកឈើ រងរបួសធ្ងន់ម្នាក់ទៀតជាព្រូរថយន្ត ឈ្មោះ ប្រុស ភេទ ប្រុស អាយុ២០ឆ្នាំ(ស្លាប់)។ រថយន្តបង្ករម៉ាកកាមរីហើមដូចគ្នា មិនស្គាល់ស្លាកលេខ។
ជនរងគ្រោះទាំងជាអ្នកស្នាក់នៅបណ្ដោះអាសន្នក្នុងស្រុកកែវសីមា ចំណែករថយន្ដរួមទាំងឈើជាវត្ថុតាងទាំងអស់ត្រូវបានសមត្តកិច្ចអូសយកមករក្សាទុកនៅអធិកានគបាលស្រុកកែវសីមា ហើយមន្ត្រីបរិស្ថាន បានរត់គេចបានស្រមោល ដោយសមត្ថកិច្ចកំពុងស្រាវជ្រាវដើម្បីដោះស្រាយតាមផ្លូវច្បាប់ ៕
ដោយ៖ ឦសាន
