ភ្នំពេញ៖ ភ្លុកដំរីជាច្រើនទម្ងន់ជាង១០០គីឡូក្រាម និងស្រកាពង្រួលផងដែរ ត្រូវបានសមត្ថកិច្ចចម្រុះចាប់បាននៅក្នុងអយស្ម័យយានរ៉ូយ៉ាល់ផែស្ងួតភ្នំពេញ កាលពីរសៀល ថ្ងៃទី ១៧ខែធ្នូឆ្នាំ២០១៦ ដែលមានក្រុមហ៊ុនមួយនេះ មានទីតាំងស្ថិតនៅ តាមផ្លូវបេតុង ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិសែនជ័យ បន្ទាប់ពីឈ្មួញនាំចូលពី បរទេស ។
ប្រតិបត្តិការនេះធ្វើឡើងដោយកម្លាំងសមត្ថកិច្ចចម្រុះ រួមមានកម្លាំងកាំកុងត្រូល កម្លាំងគយចល័ត កម្លាំងរដ្ឋបាលព្រៃឈើ កម្លាំងកងរាជអាវុធហត្ថ និងសមត្ថកិច្ចពាក់ព័ន្ធ ជាច្រើននាក់ ក្រោមការសម្របសម្រួល របស់ព្រះរាជអាជ្ញារងអមអយ្យការសាលាដំបូងរាជធានីភ្នំពេញផង ។
សមត្ថកិច្ចចម្រុះបានឲ្យដឹងថា ភ្លុកដំរីទាំងនេះ ត្រូវបានគេលាក់ទុក នៅក្នុងឈើហ៊ុប ហើយគ្រោងនាំទៅលក់នៅប្រទេសចិន ដោយមានទាំងស្រកាពង្រួលជាជ្រើនគីឡូទៀតផងតែគេមិនទាន់ដឹងថា តើភ្លុកដំរី និងស្រកាសត្វពង្រូលទាំងនេះ ត្រូវបានឈ្មួញនាំចូលពីប្រទេសណានោះទេ ខណៈដែលប្រទេសកម្ពុជា មិនសម្បូរភ្លុកដំរីទេនោះ ។
សមត្ថកិច្ចបានឲ្យដឹងទៀតថា ក្រោយរកឃើញ ភ្លុកដំរី និង ស្រកាពង្រូលច្រើនយ៉ាងនេះសមត្ថកិច្ចចម្រុះបានសម្រេចយកទៅរក្សាទុក នៅកន្លែងរដ្ឋបាលព្រៃឈើរាជធានីជាបណ្តោះអាសន្ន ដើម្បីរង់ស្រាវជ្រាវរកម្ចាស់ឃាត់ខ្លួនចាត់ការតាមច្បាប់ ៕
ដោយ៖ ប្រាថ្នា
