ខេត្តស្វាយរៀង៖ ជនសង្ស័យម្នាក់ត្រូវបានសមត្ថកិច្ចនគរបាលឃាត់ខ្លួនបន្ទាប់ពីចូលលួចមាន់ហើយត្រូវម្ចាស់ទាន់ស្រែកចោរស្រាប់តែជនសង្ស័យទាញកាំបិតកាប់ម្ចាស់ឲ្យរងរបួស២នាក់ កាលពី៩និង៣០នាទីយប់ថ្ងៃទី១៨ ខែធ្នូ ឆ្នាំ២០១៦ ស្ថិតនៅក្នុងភូមិគោកល្វៀង សង្កាត់ព្រៃអង្គុញ ក្រុងបាវិត ខេត្តស្វាយរៀង។

សមត្ថកិច្ចនគរបាលក្រុងបាវិតបានឲ្យដឹងថា ជនសង្ស័យឈ្មោះកែវ ចាន់ ភេទប្រុស អាយុ២៧ឆ្នាំ មានទីលំនៅភូមិគោកល្វៀង សង្កាត់ព្រៃអង្គុញ ក្រុងបាវិត ។ រីឯជនរងគ្រោះម្ចាស់ផ្ទះមានឈ្មោះ សុខ ពុធមុន្នីរ័ត្ន ភេទប្រុស អាយុ៣០ឆ្នាំ មុខរបរដឹកកម្មករនៅភូមិគោកល្វៀង សង្កាត់ព្រៃអង្គុញ ក្រុងបាវិត ដោយរងរបួសត្រង់ពោះខាងឆ្វេងស្រាល និងឈ្មោះ ជា វិត ភេទប្រុស អាយុ២២ឆ្នាំ មុខរបរកម្មកររោងចក្រទីលំនៅភូមិសង្កាត់ខាងលើខណៈរងរបួសលើស្មាស្តាំស្រាល។

តាមម្ចាស់ផ្ទះឈ្មោះសុខ ពុត្ធមុនីរត្ន័ បានឲ្យដឹងថា មុនកើតហេតុខណៈគាត់ជាប់រវល់នៅក្នុងផ្ទះស្រាប់តែឮសូសំលេងមាន់ស្រែកដោយមានការសង្ស័យក៏ចេញទៅមើលស្រាប់តែឃើញជនសង្ស័យលួចមាន់ក៏ ស្រែកចោរៗរួចទូរស័ព្ទហៅប្តី ខណៈនោះជនសង្ស័យខឹងបានរត់ទៅផ្ទះរបស់ខ្លូនដែលនៅក្បែរភូមិគ្នាហើយបានយកកាំបិតនិងអង្រែបុកគ្រឿង កាប់ទៅលើគាត់ រួចក្មួយប្រុសចូលទៅឃាត់ក៏ត្រូវជនសង្ស័យកាប់ឲ្យរបួសក្រោយមកទើបសមត្ថកិច្ចឃាត់ខ្លួនតែម្ដង។

បច្ចុប្បន្នជនសង្ស័យត្រូវបានឃាត់ខ្លូននៅប៉ុស្តិ៍រដ្ឋបាលសង្កាត់ព្រៃអង្គុញ ដើម្បីបំពេញសំណុំរឿងតាមនីតិវិធីច្បាប់៕

ដោយ៖ យឹម សុថាន