ភ្នំពេញ៖ រថយន្តកាមរីបាឡែនមួយគ្រឿងបានបើកបរក្នុងល្បឿនលឿន និងជែងរ៉ឺម៉កម៉ូតូនៅពីមុខផុតបន្តិច ក៏ជ្រុលទៅបុកជាមួយរថយន្តហាយឡែនឌ័រដែលបើកបញ្ច្រាសគ្នា ចំពីចហៀងរួចជ្រុលទៅប៉ះរ៉ឺម៉កម៉ូតូក្រឡាប់ផ្ងារជើងឡើងលើបណ្ដាលឲ្យប្ដីប្រពន្ធ២នាក់រងរបួសធ្ងន់។

ករណីនេះបានកើតឡើងនៅវេលាម៉ោង៧និង២០នាទីយប់ ថ្ងៃទី១៩ ខែធ្នូ ឆ្នាំ២០១៦ នៅតាមបណ្ដោយផ្លូវ៦០ម៉ែត្រ ស្ថិតក្នុងភូមិព្រែងតាគង់ សង្កាត់ចាក់អង្រែលើ ខណ្ឌមានជ័យ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុនោះគឺ រថយន្តបង្កម៉ាកកាមរីបាឡែន ពណ៌ស្ករ ពាក់ស្លាកលេខ ភ្នំពេញ2W-2590 ដែលបើកបរដោយបុរសម្នាក់មិនស្គាល់អត្តសញ្ញាណ បានបើកតាមបណ្ដោយផ្លូវ៦០ម៉ែត្រ ទិសដៅពីជើងទៅត្បួងក្នុងល្បឿនយ៉ាងលឿន ខណៈមកដល់ចំណុចកើតហេតុខាងលើ ក៏បានបើកជែងរ៉ឺម៉កម៉ូតូរងគ្រោះនៅពីមុខ ដែលបើកដោយប្ដីប្រពន្ធ២នាក់ ហើយរថយន្តបង្កក៏បានជែងផុតបន្តិច រួចជ្រុលទៅបុកចំពីមុខចហៀងជាមួយរថយន្តហាយឡែនឌ័រ ពណ៌ខ្មៅ ពាក់ស្លាកលេខភ្នំពេញ2K-0402 បើកបរដោយនារីម្នាក់មិនស្គាល់អត្តសញ្ញាណ ក្នុងទិសដៅបញ្ច្រាសគ្នា បណ្ដាលឲ្យរថយន្តហាយឡែនឌ័ររេចង្កូតចូលផ្លូវបញ្ច្រាសជ្រុលទៅបុករ៉ឺម៉កម៉ូតូដែលបើកពីក្រោយរថយន្តបង្កបន្ថែមទៀត ក្រឡាប់ផ្ងារជើងឡើងលើ និងធ្វើឲ្យប្ដីប្រពន្ធទាំង២នាក់នោះរងរបួសយ៉ាងធ្ងន់ធ្ងរ ចំណែករថយន្តទាំង២គ្រឿងបានដាច់កាងមុខនិងកាឡែកង់មុខក្រោយ រងការខូចខាតយ៉ាងដំណំ តែម្ចាស់រថយន្តទាំង២គ្រឿងសំណាងល្អមិនរងរបួស។

ក្រោយពេលកើតហេតុម្ចាស់រថយន្តបង្កបានចុះគេចខ្លួនបាត់ ចំណែកជនរងគ្រោះប្ដីប្រពន្ធទាំង២នាក់ដែលម្ចាស់រ៉ឺម៉កម៉ូតូត្រូវបានរថយន្តសង្គ្រោះបន្ទាន់ដឹកយកទៅមន្ទីរពេទ្យឯកជនសង្គ្រោះភ្លាមៗ ។ ក្រោយមកសមត្ថកិច្ចមូលដ្ឋានបានចុះមកសម្របសម្រួលចរាចរណ៍ និងទំនាក់ទំនងទៅជំនាញការិយាល័យចរាចរក្រុងឲ្យចុះមកធ្វើការវាស់វែងយករថយន្តទាំង២គ្រឿងនិងរ៉ឺម៉កម៉ូតូស្ទួចយកទៅរក្សាទុក ដើម្បីរងចាំម្ចាស់សាមីខ្លួនចូលមកដោះស្រាយតាមនីតិវិធីនៃច្បាប់៕

ដោយ៖ ភារ៉ា  ដង្កោ