ភ្នំពេញ៖ រថយន្តកុងតឺន័រ២គ្រឿងបុកគ្នាពេញទំហឹង រងការខូចខាតសំណាងល្អគ្មានអ្នករងរបួសនៅចំណុចស្តុបផ្សារដីហុយ កាលពីវេលាម៉ោង៨និង១៥នាទីយប់ថ្ងៃទី១ ខែមករា ឆ្នាំ២០១៦ នៅតាមបណ្តោយផ្លូវភ្នំពេញហាណូយចំណុចមុខផ្សារដីហុយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។

តាមប្រភពពីកន្លែងកើតហេតុបានឲ្យដឹងថា មុនពេលកើហេតុគេឃើញរថយន្តកុងតឺន័រ១គ្រឿងម៉ាក MITSUBISHI ពាក់ស្លាកលេខព្រះសីហនុ4D-1970 បើកបរដោយបុរសម្នាក់ និងព្រូម្នាក់ក្នុងទិសដៅពីត្បូងទៅជើង ខណៈមកដល់ចំណុចកើតរថយន្តបានឈប់រងចាំស្តុបពេលនោះក៏មានរថយន្ត១គ្រឿងទៀតម៉ាកHYUNDAI ពាក់ស្លាកលេខ3A-0371 ជាប្រភេទកុងតឺន័រដូចគ្នាបើកបរដោយបុរសម្នាក់មកពីក្រោយស្របគ្នា ក្នុងល្បឿនលឿន ហើយចាប់ហ្វ្រាំងមិនទាន់ក៏ជ្រុលទៅបុកនិងរថយន្តកុងតឺន័រដែលឈប់រងចាំស្តប់បណ្តាលឲ្យរងការខូចខាតកាប៊ីនរថយន្ត HYUNDAI ខាងមុខស្ទើរទាំងស្រុងតែសំណាងល្អមិនមានអ្នករងរបួស។

ក្រោយពេលកើតហេតុសមត្ថកិច្ចជំនាញខាងចរាចរណ៍មកវាស់វែងតែដោយថៅកែរថយន្តទាំងសងខាងស្គាល់គ្នា ចុងបញ្ចប់ខាងរថយន្ត HYUNDAI ព្រមជួសជុលជូនខាងរថយន្តរងគ្រោះ MITSUBISHI ដើម្បីបញ្ចប់រឿង ៕