ភ្នំពេញ ៖ បុរសជនជាតិចិនពីរនាក់បើករថយន្ដឡិចសុីសRX330មួយគ្រឿងក្នុងល្បឿនលឿនមិនប្រយ័ត្នជ្រុលបុករបាំងថ្មពុះចែកទ្រូងផ្លូវពេញទំហឹងបណ្ដាលអោយរថយន្ដខូចខាតផ្នែកខាងមុខស្ទើរតែទាំងស្រុងចំណែករបាំងថ្មពុះ ចែកទ្រូងផ្លូវរងការខូចខាតបន្តិចបន្ទួច។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង២៣និង២០នាទីយប់ថ្ងៃទី៤ ខែមករា ឆ្នាំ២០១៧ នៅចំណុចខាងមុខហាងលក់គ្រឿងបណ្លាស់រថយន្ដ សុខ ដារ៉ា តាមបណ្ដោយផ្លូវលេខ២៧៣ ស្ថិតក្នុងសង្កាត់ទួលសង្កែរ ខណ្ឌឬស្សីកែវ រាជធានីភ្នំពេញ។

រថយន្ដបង្កម៉ាកឡិចសុិសRX330 ពណ៍ស្ករ ពាក់ស្លាកលេខ ភ្នំពេញ2N-9163 បើកបរដោយបុរសជនជាតិចិនពីរនាក់។

ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្ដបង្កធ្វើដំណើរតាមបណ្ដោយផ្លូវលេខ២៧៣ដោយធ្វើដំណើរទិសដៅពីកើតទៅលិច ពេលមកដល់កន្លែងកើតហេតុដោយស្ថានភាពផ្លូវមានភាពងងឹតក៏ជ្រុលបុករបាំងថ្មពុះចែកទ្រូងផ្លូវពេញទំហឹងបណ្ដាលរថយន្ដរងការខូចខាតផ្នែកខាងមុខស្ទើរតែទាំងស្រុងបន្តដំណើរទៅមុខលែងរួចតែមិនបង្កអោយមានអ្នករងរបួសនោះទេ។

ក្រោយកើតហេតុកម្លាំងសមត្ថកិច្ចមូលដ្ឋានបានចុះដល់កន្លែងកើតហេតុនិងបានសហការណ៍ជាមួយកម្លាំងជំនាញចុះធ្វើការវាស់វែងយករថយន្ដបង្ករទៅរក្សាទុកនៅការិយាល័យចរាចរណ៍រាជធានីភ្នំពេញរងចាំដោះស្រាយតាមនិតិវិធីច្បាប់ ៕ ព្រែកជ័យ