ភ្នំពេញ៖ បុរសម្នាក់ដែលគេស្គាល់ថាជាមេអាប៉ោងនិងជាអ្នកកាងល្បែងសុីសងហ្គេមបាញ់ត្រីនៅប្លុកមុខមន្ទីរពេទ្យលោកសង្ឃរួមនិងមនុស្ស៥នាក់ផ្សេងទៀតដែលប្រើប្រាស់គ្រឿងញៀនត្រូវកម្លាំងនគរបាលនៃអធិការដ្ឋានខណ្ឌសែនសុខធ្វើការឃាត់ខ្លួនក្នុងយុទ្ធធនាការបង្ក្រាបគ្រឿងញៀន។

ការចុះបង្ក្រាបនិងឃាត់ខ្លួននេះបានធ្វើឡើងកាលពីវេលាម៉ោង៦ល្ងាចថ្ងៃទី៤ ខែមករា ឆ្នាំ២០១៧ នៅចំណុចមុខមន្ទីរពេទ្យលោកសង្ឃ ភូមិបុរីកម្មករ(អតីតភូមិត្រពាំងឈូក) សង្កាត់ទឹកថ្លា ខណ្ឌសែនសុខ។

ក្នុងប្រតិបត្តិការចុះបង្ក្រាបនេះដឹកនាំដោយលោកវរសេនីយ៍ឯក ម៉ក់ ហុង អធិការនគរបាលខណ្ឌនិងកម្លាំងចម្រុះជាច្រើននាក់ទៀត។

ជនសង្ស័យរូបនេះមានឈ្មោះ ម៉ាប់ ធី ភេទប្រុស អាយុជាង៤០ឆ្នាំ មុខរបរមេអាប៉ោង និងជាអ្នកកាងល្បែងសុីសងហ្គេមបាញ់ត្រីនៅមុខមន្ទីរពេទ្យលោកសង្ឃ ស្នាក់នៅកន្លែងកើតហេតុ។ ចំណែកជនសង្ស័យទាំង៥នាក់ទៀតដែលប្រើប្រាស់គ្រឿងញៀនត្រូវបានសមត្ថកិច្ចកសាងសំណុំរឿងចាត់ការតាមច្បាប់។

ប្រភពពីប្រជាពលរដ្ឋដែលរស់នៅតំបន់មុខមន្ទីរពេទ្យលោកសង្ឃបានឲ្យដឹងថា បុរសឈ្មោះ ម៉ាប់ ធី នេះគឺជាមនុស្សដែលតែងតែដើរបាញ់អាប៉ោងនិងកាងល្បែងហ្គេមបាញ់ត្រីទាំងអស់នៅក្នុងប្លុកភូមិត្រពាំងឈូកនេះ ដែលកន្លងមកគ្មានសមត្ថកិច្ចណាហ៊ានចាប់រូបគេទេ ហើយប្រជាពលរដ្ឋដែលរស់នៅទីនោះមានការសប្បាយចិត្តយ៉ាងខ្លាំងដែលសមត្ថកិច្ចឃាត់ខ្លួនមេកាងល្បែងសុីសងរូបនេះហើយពួកគាត់សំណូមពរដល់មន្ត្រីតុលាការដែលអនុវត្តច្បាប់ត្រូវតែដាក់ទោសជននេះទៅតាមច្បាប់ដែលបានកំណត់ផង។

ជាលទ្ធផលសមត្ថកិច្ចបានដកហូតប្រាក់មួយចំនួនធំ និងសម្ភារសម្រាប់ប្រើប្រាស់គ្រឿងញៀនមួយចំនួនផងដែរ។ បច្ចុប្បន្នជនសង្ស័យទាំង៦នាក់នេះកំពុងឃាត់ខ្លួននៅអធិការរដ្ឋាននគរបាលខណ្ឌសែនសុខនិងកំពុងកសាងសំណុំរឿងបញ្ជូនទៅតុលាករចាត់ការបន្តតាមនីតិវិធី៕

ដោយ៖ តុង សីហា