ខ្សែប្រយុទ្ធអន្តរជាតិអេស្ប៉ាញ Diego Costa បានសារភាពថាគាត់ប៊ិះនឹងចាក ចេញពីក្រុមតោខៀវ Chelsea វិលត្រឡប់ ទៅកាន់ក្រុម Atletico Madridវិញទៅ ហើយមុនពេលរដូវកាលឆ្នាំ ២០១៦-២០១៧ នេះចាប់ផ្តើម ។

កីឡាករវ័យ២៨ឆ្នាំនេះកំពុងតែមាន ទម្រង់លេងល្អក្នុងរដូវកាលថ្មីដោយស៊ុតបាល់បាន១៤គ្រាប់ច្រើនលើសគេទាំង អស់នៅអង់គ្លេស Premier Leagueហើយ ក្រុមតោខៀវក៏ឈ្នះ១៣ប្រកួតជាប់គ្នាផងដែរ។

ប៉ុន្តែDiego Costa បានប្រាប់គេហទំព័រ The Telegraphរបស់អង់គ្លេសថា “ខ្ញុំប៊ិះ នឹងចាកចេញពី ក្រុមChelseaទៅហើយ កាលពីមុនរដូវកាលចាប់ផ្តើម។ តើខ្ញុំចង់ ចាកចេញពីក្លិបតោខៀវទេ? ចម្លើយគឺចង់ ណាស់ដោយសារតែរឿងរ៉ាវមួយចំនួនដូចជាគ្រួសារ អនុស្សាវរីយិ៍នៅទីនោះ។ តែអ្វីដែលធ្វើឲ្យខ្ញុំសម្រេចចិត្តនៅទីនេះវិញមិនមែនមកពីក្លិប Chelsea ទេ គឺដោយសារតែខ្ញុំទទួលបានការស្រលាញ់ពីអ្នកគាំទ្រនិងមនុស្សជាច្រើនដែលធ្វើឲ្យខ្ញុំសប្បាយចិត្តនៅទីនេះ។”

Diego Costa បានបញ្ជាក់បន្ថែមទៀត ថា “រឿងរ៉ាវតែម្យ៉ាងប៉ុណ្ណោះដែលខ្ញុំចង់ចាកចេញពីក្លិបគឺ គ្រួសារ ប៉ុន្តែមនុស្សជាច្រើនស្រលាញ់ចូលចិត្តខ្ញុំនៅទីនេះ ហើយគ្រូបង្វឹកថ្មីបានបញ្ជាក់ប្រាប់ខ្ញុំពីដំបូងថាគាត់ពឹងផ្អែកមកលើខ្ញុំ”៕

ដោយ៖ ដេវីត