ភ្នំពេញ៖ ពិធីការិនី រូបស្រស់ឆើតឆាយ កញ្ញា ហ៊ិន ច័ន្ទនីរ័ត្ន នៅតែរក្សាបានតំណែងលេចធ្លោនៅទ្រនំប៉ុស្តិ៍បាយ័ន ដោយក្តោបក្តាប់បាន ជាច្រើនកម្មវិធី បើទោះបីពិធីការិនីស្រករក្រោយ បុកចូលជាបន្តបន្ទាប់ក្តី។ ក្រៅពីការរីកចម្រើន ស្នេហារបស់នាងក៏កាន់តែរឹងមាំខ្លាំងជាងមុនដែរ។

ទោះមិនបានហក់ចូលប្រឡូកក្នុងការងារសម្តែងភាពយន្តក្តីក៏ កេរ្តិ៍ឈ្មោះរបស់នាងនៅតែលេចធ្លោនៅក្នុងសង្គមសិល្បៈ។ ដំណឹងចុងក្រោយ នីរ័ត្ន ក៏ល្បីកក្រើកព័ត៌មានស្នេហាផងដែរ ព្រោះsម្ព័ន្ធស្នេហ៍ជាមួយកូនអ្នកមានម្នាក់កាន់តែផ្អែមល្ហែមទោះមិនទាន់បានបណ្តើរគ្នាជាសាធារណៈនៅឡើយក្តី។

តារាស្រីស្រស់សោភារូបនេះនៅមិនទាន់ស្វែងរកការបញ្ជាក់បាននៅឡើងទេ ប៉ុន្តែប្រភពពីអ្នកសិល្បៈលើកឡើងថា ស្នេហា នីរ័ត្ននិងកូនប្រុសអ្នកមានទ្រព្យនោះគឺកាន់តែរីកចម្រើនដោយពួកគេបានបង្កើតឱកាស ផ្អែមល្ហែមជាមួយគ្នាជាញឹកញាប់។ ប្រភពបន្តថា ទោះលាក់លៀមនិងមិត្តរួមអាជីបខ្លះ ប៉ុន្តែពួកគេបានរំលេចភាពល្អូកល្អឺនច្រើនតាមរយៈទូរស័ព្ទដៃ និងបណ្តាញទំនាក់ទំនងសង្គម។ យូរៗម្តងគេឃើញរថយន្ត Range Rover ពណ៌ខ្មៅ របស់សង្សារនាងមកទទួលនាងផងដែរ។ មានការលើកឡើងដែរថា ដោយការស្រលាញ់ នីរ័ត្នខ្លាំងសង្សារនាងបានដាក់បម្រាមមិនឲ្យនាងសម្តែងភាពយន្តទេព្រោះតែបារម្ភពីសុខភាព និងបារម្ភខ្លាចបុរសផ្សេងប៉ះពាល់ខ្លួននាង ។ អ្វីដែលគេគិតថាស្នេហានាងកាន់តែមានស្ថានភាពល្អប្រសើរនិងអាចឈានដល់ចំណងអាពាហ៍ពិពាហ៍ទៀតផង ត្បិតអីក្រុមគ្រួសារទាំងសងខាងបានដឹងឮ អស់ទៅហើយ ។ ជាពិសេសនោះ សង្សាររបស់នាងតែងតែរំអុកសុំនាងរៀបការជាបន្តបន្ទាប់។

ហ៊ិន ច័ន្ទនីរ័ត្ន ជាពិធីការិនីមានមន្តស្នេហ៍ម្នាក់ ដែលល្បីមានទាំងស្រីនិងប្រុសតាមចោមស្រលាញ់ ហើយតាមប្រភពថា ក្រោយពេលលេចជ្រាបដំណឹងស្នេហ៍ បានធ្វើឱ្យបុរសៗអ្នកមានជាច្រើន ដែលធ្លាប់តាមថ្ពក់ស្នេហ៍នាងខកចិត្តជាខ្លាំង។ តាមដំណឹងថា ការដែលពិធីការិនីលេចធ្លោ នៅប៉ុស្តិ៍បាយ័ន រូបនេះមិនទាន់ចង់ដឹកដៃគូសង្សារចូលរោងការ តាមការស្នើសុំ ដោយសារតែនាងចង់ពិសោធន៍ស្នេហ៍មួយរយៈទៀតសិន ត្បិតអីសង្សាររបស់នាង ពូកែប្រចណ្ឌពេក ខ្លាចក្រោយពេលសំពះផ្ទឹម ធ្វើឱ្យនាងរងទឹកភ្នែក។ ម៉្យាងកន្លងមក នាងបានបង្ហើបឱ្យដឹងថា បុរសដែលស្ថិតក្នុងក្តីស្រមៃរបស់នាង ជាបុរសស្លូតបូត ស្មោះត្រង់ យល់ពីជម្រៅចិត្តនាង និងមិនចេះប្រចណ្ឌ ហួងហែងនាងផ្តេសផ្តាសផងដែរ៕ វឌ្ឍនា