ភ្នំពេញ ៖ នៅវិមានសន្តិភាព ព្រឹកថ្ងៃទី២៤ ខែមករា ឆ្នាំ២០១៧នេះ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចកម្ពុជា បានអនុញ្ញាតអោយ លោក Saleumxay KOMMASITH រដ្ឋមន្ត្រីការបរទេស នៃសាធារណរដ្ឋប្រជាធិបតេយ្យ ប្រជាមានិតឡាវ អញ្ជើញចូលជួបសំដែងការគួសម និងពិភាក្សាការងារ។
លោក Saleumxay KOMMASITH បានពាំនាំការសាកសួរសុខទុក្ខពីនាយករដ្ឋមន្ត្រីឡាវ ថងលូន ស៊ីសូលីត ជួនចំពោះសម្ដេចតេជោ ហ៊ុន សែន ហើយក្នុងនាមរដ្ឋាភិបាល និងប្រជាជនឡាវ លោកបានថ្លែងអំណរគុណចំពោះសម្ដេចតេជោ ដែលបានអញ្ជើញទៅសម្ពោធច្រកទ្វារអន្តរជាតិត្រពាំងក្រៀល-ណងណុខៀន កាលពីពេលថ្មីៗនេះ និងបានអរគុណចំពោះសម្ដេចតេជោដែលបានជួយគាំទ្រដល់ការរៀបចំកិច្ចប្រជុំអាស៊ានកន្លងមកអោយទទួលបានជោគជ័យ។ លោក Saleumxay KOMMASITH ក៏បានជម្រាបជួន សម្ដេចតេជោនាយករដ្ឋមន្ត្រី អំពីដំណើរទស្សនកិច្ចមកកាន់ប្រទេសកម្ពុជានាពេលនេះ គឺដើម្បីពង្រឹង និងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការរវាងប្រទសទាំងពីរកាន់តែល្អប្រសើរឡើងថែមទៀត។
លោកបានជម្រាបជួនសម្ដេចតេជោដែរថា នៅក្នុងជំនូបរវាងលោកជាមួយឯកឧត្ដម ប្រាក់ សុខុន រដ្ឋមន្ត្រីក្រសួងការបរទេសកម្ពុជា គឺភាគីទាំងពីរបានយល់ស្របគ្នា ក្នុងការជម្រុញកិច្ចខិតខំប្រឹងប្រែងធ្វើអ្វីៗគ្រប់បែបយ៉ាងដើម្បីអោយបានសម្រេចទៅតាមអ្វី ដែលប្រមុខរដ្ឋាភិបាលទាំងពីរបានព្រមព្រៀងគ្នារួចមកហើយ។ លោក Saleumxay KOMMASITH បានធ្វើការប្ដេជ្ញាចិត្តថា លោកនឹងខិតខំប្រឹងប្រែងអោយអស់ពីកម្លាំងកាយចិត្ត ដើម្បីធ្វើយ៉ាងណាពង្រីក និងពង្រឹងទំនាក់ទំនងប្រទេសទាំងពីរផង និងលើកកម្ពស់កិច្ចសហប្រតិបត្តិការប្រទេសទាំងពីរផង។
សម្ដេចតេជោនាយករដ្ឋមន្ត្រី បានថ្លែងអំណរគុណចំពោះការសាកសួរសុខទុក្ខរបស់នាយករដ្ឋមន្ត្រីឡាវ និងបានសម្ដែងនូវការរីករាយចំពោះការលើកឡើងរបស់លោករដ្ឋមន្ត្រីក្រសួងការបរទេសឡាវ ពាក់ព័ន្ធនឹងទំនាក់ទំនង កិច្ចសហប្រតិបត្តិការប្រទេសទាំងពីរ។ សម្ដេចបានមាន ប្រសាសន៍ថា សម្ដេចមានការរីករាយយ៉ាងខ្លាំង ដោយបានអញ្ជើញទៅចូលរួមក្នុងពិធីសម្ពោធបើកអោយប្រើប្រាស់ច្រកទ្វារអន្តរជាតិ និងអគារត្រួតពិនិត្យត្រពាំងក្រៀល-ណងណុកខៀន និងបានសម្ដែងការរីករាយចំពោះទំនាក់ទំនងជាប្រពៃណីរវាងកម្ពុជា និងឡាវ ដែលមានការរីកចម្រើនជាបន្តបន្ទាប់។
សម្ដេចតេជោ ហ៊ុន សែន ក៏បានផ្ដល់អនុសាសន៍ដល់ប្រមុខការទូតប្រទេសទាំងពីរ អោយបន្តធ្វើកិច្ចសហប្រតិបត្តិការជាមួយគ្នាជម្រុញរាល់ការងារទាំងឡាយដែលនៅសេសសល់អោយសម្រេចបានជោគជ័យជាបន្តទៀត៕
