ក្រុងប៉ោយប៉ែត៖ ក្រុមក្មេងស្ទាវ៤នាក់ដែលតែងតែជិះម៉ូតូ ដើរលេងពេលយប់ ត្រូវកម្លាំងនគរបាលវរៈការពារព្រំដែនគោក៩១១ ចុះល្បាតឆែកឆេរឃើញថ្នាំញៀនជាប់ខ្លួន កាលពីវេលាម៉ោង១០ និង៣០នាទីយប់ ថ្ងៃទី២៣ ខែមករា ឆ្នាំ២០១៧ នៅចំណុចកាស៊ីណូផ្កាយ៥ ស្ថិតក្នុងភូមិក្បាលស្ពាន០១ សង្កាត់-ក្រុង ប៉ោយប៉ែត ខេត្តបន្ទាយមានជ័យ។
សមត្ថកិច្ចប្រាប់ឲ្យដឹងថា ការចុះល្បាតនៅពេលយប់នេះដើម្បីការពារសន្តិសុខ ក្នុងភូមិសាស្រ្តក្នុងភូមិក្បាលស្ពាន១ សង្កាត់ក្រុងប៉ោយប៉ែត ខេត្តបន្ទាយ មានជ័យ ពេលនោះក៏ប្រទះឃើញជន សង្ស័យសមត្ថកិច្ចក៏បានឃាត់សួរនាំទើប រកឃើញថ្នាំញៀនតែម្តង។
ប្រភពបន្តថា ជនសង្ស័យត្រូវឃាត់ខ្លួន ទី១.ឈ្មោះ ម៉ែន សុខហៀង ភេទប្រុស អាយុ៣០ឆ្នាំ រស់នៅក្នុងភូមិសាមគ្គីមានជ័យ សង្កាត់ក្រុងប៉ោយប៉ែត ទី២.ឈ្មោះ ឡុង យ៉ន ភេទប្រុស អាយុ២៧ឆ្នាំ ស្នាកនៅក្នុង ផ្សារុងក្លឿ(ថៃ) ទី៣.ឈ្មោះ អែម ភារម្យ ភេទប្រុស អាយុ១៧ឆ្នាំ រស់នៅភូមិសាមគ្គី មានជ័យ សង្កាត់ក្រុងប៉ោយប៉ែត និងទី៤.ឈ្មោះ ឈូ ឈៀក ភេទប្រុស អាយុ៣០ឆ្នាំ រស់នៅក្នុងភូមិក្បាលស្ពាន១ សង្កាត់-ក្រុង ប៉ោយប៉ែត។
សមត្ថកិច្ចបន្តថា នៅពេលឃាត់ខ្លួនជនសង្ស័យសមត្ថកិច្ចឆែកឆេររកឃើញថ្នាំញៀនប្រភេទ WY ចំនួន១២គ្រាប់, ថ្នាំញៀនប្រភេទម៉ាទឹកកកចំនួន៦ថង់តូច, ទូរសព្ទ័ដៃចំនួន២គ្រឿង, បំពង់កែច្នៃ សម្រាប់ជក់ថ្នាំញៀន, ដែកកេះចំនួន៣ និងកូនកាំបិតដៃ១ ផងដែរ។
លោក អុឹម សុភារៈ នាយប៉ុស្ដិ៍ប៉ោយប៉ែត ប្រាប់ថា ក្រុមក្មេងស្ទាវទាំង៤នាក់នេះ លោកបានទួលពីកម្លាំងនគរបាលវរៈការពារព្រំដែនគោក៩១១ហើយ កំពុងកសាងសំណុំរឿងចាត់ការតាមច្បាប់៕ វណ្ណ
