ខេត្តកណ្ដាល ៖ បុរសម្នាក់បានគេចខ្លួនពួនអាត្មាជិត១១ឆ្នាំ ពីបទប៉ុនប៉ងមនុស្សឃាតដោយចេតនា ទីបំផុតត្រូវនគរបាលចាប់ខ្លួនតាមដីកាតុលាការខេត្តកណ្ដាល ។
មន្ត្រីតុលាការ បញ្ជាក់ថា បុរសរូបនេះ ត្រូវបានបញ្ជូនទៅឃុំខ្លួនក្នុងពន្ធនាគារខេត្តកណ្ដាល កាលពីថ្ងៃទី២៦ ខែមករា ឆ្នាំ២០១៧ ដើម្បីបន្តនីតិវិធី ។
របាយការណ៍សមត្ថកិច្ច បង្ហាញថា បុរសរូបនេះឈ្មោះ វិន វ៉ៅ អាយុ៣២ឆ្នាំ មុខរបរកសិករ ត្រូវបានចាប់ខ្លួនកាលពីថ្ងៃទី២៥ ខែមករា ឆ្នាំ២០១៧ នៅចំណុចភូមិពុកឫស្សីក្រោម ឃុំពុកឫស្សី ស្រុកខ្សាច់កណ្តាល តាមដីកាបង្គាប់ឲ្យចាប់ខ្លួនរបស់លោក ងួន វុទ្ធី ចៅក្រមស៊ើបសួរសាលាដំបូងខេត្តកណ្ដាល ។
ដីកាបង្គាប់ឲ្យចាប់ខ្លួនរបស់តុលាការ បង្ហាញថា បុរសរូបនេះ ត្រូវបានចោទប្រកាន់ពីបទ ” ប៉ុនប៉ងមនុស្សឃាតដោយចេតនា ” ប្រព្រឹត្តកាលពីថ្ងៃទី១៧ ខែមេសា ឆ្នាំ២០០៦ នៅចំណុចភូមិក្រួចសើច ឃុំពុកឫស្សី ស្រុកខ្សាច់កណ្ដាល តាមមាត្រា៤ ច្បាប់ស្តីពីស្ថានទម្ងន់ទោសនៃបទឧក្រិដ្ឋ ៕ ដោយ ៖ ចេស្តា
