ភ្នំពេញ៖តារាសម្តែងពេជ្រ អាវីហ្សា បានវិលមកពីជួបពិគ្រោះពិភាក្សាជាមួយអ្នកជំនាញកែសម្រស់នៅប្រទេសថៃរួចហើយ។ តារាស្រីដែលធ្លាប់រងកណ្តាប់ដៃពីអតីតសង្សារូបនេះបញ្ជាក់ថា ស្ថានភាពច្រមុះនាងមិនមានអ្វីគួរព្រួយបារម្ភទេក្រោយពីពិនិត្យយ៉ាងដុតដល់រួចមក។
តារាសម្តែងពេជ្រ អាវីហ្សា បានចេញដំណើរទៅដល់ប្រទេសថៃហើយកាលពីថ្ងៃទី១១ខែមករានេះដើម្បីជួបជាមួយអ្នកជំនាញផ្នែកសម្ផស្សដើម្បីត្រូតពិនិត្យខ្ទង់ច្រមុះដែលធ្វើទុក្ខក្រោយរងកណ្តាប់ដៃអតីតគូស្នេហ៍។ ក្រោយជួបជាមួយអ្នកជំនាញផ្នែកសម្រស់ពិសេសការត្រួតពិនិត្យខ្ទង់ច្រមុះរួចមកក្រុមវេជ្ជបណ្ឌិតនៃប្រទេសថៃបានលើកឡើងថាមិនមានអ្វីដែលប៉ះពាល់ធ្ងន់ធ្ងររហូតដល់ដកខ្ទង់ច្រមុះសប្បនិម្មិទ្ធនោះចេញទេ។
ពេជ្រ អាវីហ្សាបញ្ជាក់ថាក្រោយការពិនិត្យ យ៉ាងយកចិត្តទុកដាក់មកគឺមិនមានសញ្ញាបញ្ហាដែលគួរឲ្យព្រួយបារម្ភឡើយ។ នាងបញ្ជាក់ថា ច្រមុះរបស់នាងនឹងវិលមកកាន់ភាពប្រក្រតីឡើងវិញ ក្រោយពីទទួលយកថ្នាំបំបាត់ការឈឺចាប់និងផ្សះរបួសដែលតម្រូវឲ្យនាងលេបប្រមាណត្រឹម១០ថ្ងៃប៉ុណ្ណោះ ហើយពេលនេះការឈឺចុកចាប់នៅត្រង់មុខរបួសហាក់ធូស្រាលច្រើនជាងមុន។ទាក់ទិននឹងស្ថានភាពរស់នៅរបស់នាងបានលើកឡើងថា មិនមានការព្រួយបារម្ភអ្វីទេព្រោះតែនាងនិងអតីតសង្សាបានបញ្ចប់ទំនាក់ទនងទាំងស្រុងជាមួយគ្នាគឺគ្មានអ្វីដែលពាក់ព័ន្ធនឹងគ្នានោះទេ។
ពេជ្រ អាវីហ្សា បញ្ជាក់ដែរថាមុនឡើងទៅប្រទេសថៃថា នាងបានទៅចូលបំភ្លឺ ជុំវិញករណីប្រើប្រាស់ហិង្សាធ្ងន់ធ្ងរមកលើនាងកាលពីពេលកន្លងមក។ នាងបន្តថានាងនៅតែរក្សាជំហរមិនប្តឹងអតីតសង្សា ព្រោះនាងពិត ជាចង់អហោសកម្មឲ្យអតីតគូស្នេហ៍ អ្វីគ្រប់យ៉ាងដែលធ្លាប់មានជាមួយគ្នា ឲ្យចប់ទាំងអស់ កុំឲ្យមានកម្មពៀរជាមួយគ្នាតទៅទៀតហើយក៏ មិនចង់ទទួលបានសំណងអ្វីពីអតីតគូស្នេហ៍ ក្រៅតែពីការចង់បញ្ចប់បញ្ហាខាងលើដោយសន្តិវិធី ។
គួរបញ្ជាក់ដែរថាពេជ្រ អាវីហ្សា ត្រូវបានអតីតគូស្នេហ៍របស់ខ្លួន ដែលត្រូវបានគេស្គាល់ថា ជាប្អូនថ្លៃលោកឧកញ៉ាទ្រីភាព វាយឲ្យមានរបួសយ៉ាងធ្ងន់ធ្ងរកាលពីថ្ងៃទី១៣ វិច្ឆិកាកន្លងទៅនៅខេត្តព្រះសីហនុ។សាលាដំបូងខេត្តព្រះសីហនុ ចេញដីកាសម្រេចឃុំខ្លួនលោក គៀង ហេង ប្អូនថ្លៃអ្នកឧកញ៉ា ទ្រី ភាព និងជាអតីតសង្សានាង ពេជ្រ អាវីហ្សា ដាក់ពន្ធនាគារជាបណ្តោះអាសន្ន ៕ វឌ្ឍនា
