ខេត្តកំពង់ឆ្នាំង ៖ ជនសង្ស័យ២នាក់ត្រូវបានសមត្ថកិច្ចនគរបាលក្រុងកំពង់ឆ្នាំង ធ្វើការឃាត់ខ្លួនដោយចោទប្រកាន់ពីបទចែកចាយ និង រក្សាទុកសារធាតុញៀនខុសច្បាប់ ។
ហេតុការណ៍នេះបានកើតឡើងកាលពីវេលាម៉ោង១៦និង៣០នាទី ថ្ងៃទី២៦ខែមករា ឆ្នាំ២០១៧ ស្ថិតនៅភូមិទី1 សង្កាត់ខ្សាម ក្រុងកំពង់ឆ្នាំង ។
សមត្ថកិច្ចបានអោយដឹងថា ជនសង្ស័យដែលសមត្ថកិច្ចឃាត់ខ្លួននេះ១.ជា ចាន់សុកើន ប្រុស អាយុ២៦ឆ្នាំ មានទីលំនៅភូមិទី១ សង្កាត់ខ្សាម ក្រុងកំពង់ឆ្នាំង និង ទី២.ខាន់ ចាន់មករាប្រុស អាយុ៣០ឆ្នាំ មានទីលំនៅ ភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង ។
អំឡុងពេលឃាត់ខ្លួនសមត្ថកិច្ចបានរកឃើញ ថ្នាំម្សៅក្រាមថ្លាពណ៍ស ១កញ្ចប់ ទូរស័ព្ទដៃ១គ្រឿង ។
សមត្ថកិច្ចបានអោយដឹង នៅក្នុងយុទ្ធនាការបង្រ្កាបគ្រឿងញៀននេះសមត្ថកិច្ចបានសហការជាមួយនិងអាជ្ញាធរមូលដ្ឋាន និង បានធ្វើការឃាត់ខ្លួនជនសង្ស័យដែលប្រើប្រាស់ និង ចែកចាយ និងជួញដូរគ្រឿងញៀនបានជាបន្តបន្ទាប់ ។ ហើយជនសង្ស័យទាំង២នាក់ដែលសមត្ថកិច្ចឃាត់ខ្លួន គឺបានធ្វើសកម្មភាពនៅក្នុងមូលដ្ឋាន ត្រូវបានប្រជាពលរដ្ឋរាយការណ៍ទៅអាជ្ញារមូលដ្ឋាន ហើយអាជ្ញាធរបានផ្តល់ព័តមានមកសមត្ថកិច្ច ដាក់កម្លាំងព័ទ្ធចាប់តែម្តង ។
ជនសង្ស័យត្រូវបានកសាងសំណុំរឿងបញ្ជូនទៅការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តកំពង់ឆ្នាំង ដើម្បីចាត់ការបន្តតាមនីតិវិធី ៕ ចន្ថា
