ភ្នំពេញ៖ នារី២នាក់បានរងរបួសធ្ងន់ស្រាលហើយក៏ត្រូវជនឆ្លៀតឲ្យឱកាសមកលួចយកទូរស័ព្ទនិងលុយ១០០០ដុល្លារទៀតខណៈមានរថយន្ដឡិចស៊ីសមួយគ្រឿងបើកមកបុកម៉ូតូរបស់នាងទាំង២ ។

ហេតុការណ៍នេះកើតឡើងកាលពីវេលាម៉ោង២និង១០នាទីរំលងអធ្រាត្រថ្ងៃទី៣ ខែកុម្ភៈ ឆ្នាំ ២០១៧ ត្រង់ចំណុចជិតក្លឹបRCA ផ្លូវព្រះនរោត្ដម កែងនិងផ្លូវលេខ៣៦០ ក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញនារី២នាក់ជិះម៉ូតូ ZOOMER-X មួយគ្រឿងធ្វើដំណើរតាមបណ្ដោយផ្លូវព្រះនរោត្ដមក្នុងទិសដៅពីជើងទៅត្បូង ទើបតែចេញពីញុាំអីហើយជិះទៅផ្ទះវិញ ស្រាប់តែមានរថយន្ដឡិចស៊ីស មួយគ្រឿង ពណ៌ទឹកដោះគោ អត់ចាំស្លាកលេខ បើកដោយបុរសម្នាក់ធ្វើដំណើរតាមបណ្ដោយផ្លូវលេខ៣៦០ ក្នុងទិសដៅពីលិចទៅកើតក្នុងល្បឿនលឿន ខណៈមកដល់ចំណុចកើតហេតុខាងលើក៏ជ្រុលមកបុកម៉ូតូខាងលើពេញទំហឹងបណ្ដោយឲ្យភាគីខាងម៉ូតូ ហោះទៅបោកនិងថ្នល់រងរបួសធ្ងន់ស្រាល ភ្លាមៗនោះភាគីបុរសដែលបើករថយន្ដបង្កបានបើករត់គេចខ្លួចបាត់ស្រមោលតែម្តង។ មួយសន្ទុះក៏ត្រូវជនឆ្លៀតឱកាសមកលួចយកទូរស័ព្ទនិងលុយ១០០ដុល្លារទៀត។

ក្រោយពេលកើតហេតុជនរងគ្រោះត្រូវរថយន្ដសាមុយដឹកទៅមន្ទីរពេទ្យ ចំណែកម៉ូតូខាងលើសមត្ថកិច្ចបានធ្វើការវាស់វែង និងយកទៅរក្សាទុកនៅប៉ុស្តិ៍នគរបាលបឹងកេងកង១រង់ចាំម្ចាស់ម៉ូតូមកទទួល៕ ស រស្មី