ភ្នំពេញ៖ ហេតុការណ៍គ្រោះថ្នាក់ចរាចរណ៍មួយបង្កឡើងដោយសារតែបុរសម្នាក់បើករថយន្តហាយឡែនឌ័រមួយគ្រឿងក្នុងល្បឿនលឿន រេចង្កូតបុកឃឿនសួនច្បាររង្វង់ មូលជ្រោយចង្វាត្រើយខាងកើត បណ្តាលឲ្យក្រឡាប់អូសជាង៣០ម៉ែត្រ ។
ហេតុការណ៍នេះ បានកើតឡើងកាលពីវេលាម៉ោង២និង២០នាទីរំលងអាធ្រាតឈានចូលថ្ងៃទី១៧ ខែសីហា ឆ្នាំ២០១៥ នៅចំណុចរង្វង់មូលជ្រោយចង្វាខាងកើត តាមបណ្តោយផ្លូវជាតិលេខ៦ ស្ថិតក្នុងក្រុម១០ ភូមិដើមគ សង្កាត់ជ្រោយចង្វាខណ្ឌជ្រោយចង្វា រាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តមួយគ្រឿងម៉ាកហាយឡែនឌ័រ ពណ៌សពាក់ស្លាកលេខ ភ្នំពេញ 2W-3334 បើកបរដោយបុរសម្នាក់ធ្វើដំណើរតាមបណ្តោយផ្លូវជាតិលេខ៦ ក្នុងទិសដៅពីកើតទៅលិចក្នុងល្បឿនលឿន ខណៈមកដល់ចំណុចកើតហេតុបានរេចង្កូតបុកឃឿនសួនច្បារបណ្តាលឲ្យហោះផ្លោងអូសជាង៣០ម៉ែត្រ ក្រឡាប់ផ្ងារជើង តែសំណាងល្អម្ចាស់រងរបួសស្រាលដោយសារតែមានផ្ទុះពោងកាលពាសុវត្ថិភាព ។
សាក្សីដដែលបានបន្តថាបន្ទាពីកើតហេតុម្ចាស់រថយន្តបានលូនចេញពីខាងក្នុងរថយន្តហើយបានគេចខ្លួនបាត់ស្រមោលតែម្តងដោយបន្សល់ទុករថយន្តនៅកន្លែងកើតហេតុ ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុនិងសហកាជាមួយជុំនាញយករថយន្តទៅរក្សាទុកនៅការិយាល័យចរាចរណ៍ជើងគោកដើម្បីរង់ចាំម្ចាស់ចូលខ្លួនមកដោះស្រាយតាមផ្លូវច្បាប់ ៕
ដោយ៖ ចាន់ធឿន
