ខេត្តកណ្តាល ៖ រថយន្តសាំយ៉ុងមួយគ្រឿង បើកជែងក្នុងល្បឿនលឿនខ្វះការប្រុងប្រយ័ត្ន ជ្រុលទៅបុកម៉ូតូមួយ គ្រឿងម៉ាកហុងដា បណ្តាលអ្នកជិះនិងអ្នករួមដំណើររងរបួសធ្ងន់៣នាក់ ចំណែកម៉ូតូនិងរថយន្តរងការខូចខាតដូចគ្នា ។ ហេតុការណ៍នេះបានកើតឡើងនៅលើផ្លូវជាតិលេខ៤ ចន្លោះគីឡម៉ែត្រលេខ២៦-២៧ ស្ថិតក្នុងភូមិត្រពាំងពើក ឃុំពើក ស្រុកអង្គស្នួល ខេត្តកណ្ដាល កាលពីវេលាម៉ោង៥និង៤៥នាទី ថ្ងៃទី១០ ខែកុម្ភៈ ឆ្នាំ២០១៧ ។
នគរបាលស្រុកអង្គស្នួលបានឲ្យដឹងថា អ្នកបើករថយន្តបង្កហេតុឈ្មោះ សិម សាន ភេទប្រុស អាយុ៣៩ឆ្នាំ ទីលំនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ ។ ចំណែកអ្នកបើកម៉ូតូឈ្មោះ ឈិម ភក្រ័ត្រា ភេទ ប្រុស អាយុ៤២ឆ្នាំ រស់នៅភូមិត្រយឹង ឃុំពើក ស្រុកអង្គ ខេត្តកណ្តាល ជាកម្មកររោងចក្រ និងអ្នករួមដំណើរ ពីរនាក់ស្រីទៀត ១-ឈ្មោះ សុខ ខេង ត្រូវ ជាប្រពន្ធ អាយុ៣៨ឆ្នាំ ជាកម្មករ និង ២-ឈ្មោះ នី ដាវ ភេទស្រី អាយុ៣២ឆ្នាំ ជារកម្មករ ស្នាក់នៅភូមិឃុំជាមួយគ្នា ។
អ្នកឃើញហេតុការណ៍បាននិយាយឲ្យដឹងថា នៅម៉ោងកើតហេតុខាងលើ គេឃើញរថយន្តមួយគ្រឿងម៉ាក សាំងយ៉ុង១គ្រឿង ពណ៌លឿង ពាក់ផ្លាកលេខភ្នំពេញ២AH-១៤០៩ ក្នុងទិសដៅពីកើតទៅលិច (ភ្នំពេញ-ខេត្ត ព្រះសីហុនុ) ។ លុះមកដល់ចំណុចកើតហេតុ អ្នកបើករថយន្តសាំយ៉ុងបានបើកជែងរថយន្ត១គ្រឿងទៀត ដែលនៅខាងមុខ ក៏ជ្រុលទៅបុកម៉ូតូ១គ្រឿងម៉ាកហុងដាសេ១២៥ ពណ៍ខ្មៅពាក់ ផ្លាក់លេខ១H- ៥៧២៩ ដែលបើកឆ្លងផ្លូវ ពីជើងទៅត្បូង ដែលមានអ្នករួមដំណើរពីរនាក់ស្រីផង ។
សមត្ថកិច្ចជំនាញដែលបានចុះទៅពិនិត្យនិងវាស់វែងបានឲ្យដឹងថា ករណីគ្រោះថ្នាក់ចរាចរណ៍នេះ គឺបង្កឡើង ដោយសារអ្នកបើកបររថយន្តសាំយ៉ុង បើកបរក្នុងល្បឿនលឿន ហើយបើកជែងក្នុងស្ថានភាពគ្រោះថ្នាក់ ខ្វះការប្រុងប្រយ័ត្ន ។
ក្រោយពិនិត្យនិងវាស់វែងរួច សមត្ថកិច្ចជំនាញបានយកសម្ភារៈមធ្យោបាយមករក្សាទុកនៅអធិការដ្ឋាន ដើម្បី កសាងសំណុំរឿងតាមនីតិវិធីបន្តទៀត ។ ដោយឡែកអ្នករងរបួសត្រូវបានបញ្ជូនទៅកាន់មន្ទីរពេទ្យភ្លាមៗផងដែរ ៕ ស្អាងជ័យ
