ភ្នំពេញ៖ នៅវេលាម៉ោងប្រហែល១២និង៣០នាទីរំលងអធ្រាត្រឈានចូលថ្ងៃទី១១ ខែកុម្ភៈ ឆ្នាំ២០១៧ នគរបាលប៉ុស្តិ៍រដ្ឋបាលបឹងសាឡាងបានឃាត់ខ្លួនជនសង្ស័យ២នាក់ ជាក់ស្ដែងពីបទលួចគាស់បន្ទប់ជួលយកសម្ភារ ប្រព្រឹត្តនៅចំណុចផ្ទះជួលលេខ២៥C ( បន្ទប់លេខ១៦) ផ្លូវ២៥១ ក្រុមទី៤២ ភូមិ១៤ សង្កាត់បឹងសាឡាង ខណ្ឌទួលគោក រាជធានីភ្នំពេញ ។

ជនសង្ស័យមានឈ្មោះ ឆាយ ជឿន ហៅ សេង ភេទប្រុស អាយុ៣២ឆ្នាំ និងម្នាក់ទៀតឈ្មោះយឹម ចាន់វណ្ណះ ហៅណាក់ ភេទប្រុស អាយុ៣២ឆ្នាំ ទាំង២នាក់មានមុខរបរជាងភ្លើង និងទឹក ស្នាក់នៅផ្ទះជួល លេខ២៥C ( បន្ទប់ជួលលេខ១៨) ផ្លូវ២៥១ ក្រុមទី៤២ ភូមិ១៤ សង្កាត់បឹងសាឡាង ខណ្ឌទួលគោក រាជធានីភ្នំពេញ ។ ចំណែកជនរងគ្រោះជាម្ចាស់ផ្ទះមានឈ្មោះនូវ កល្យាណ ហៅយ៉ា ភេទស្រី អាយុ២៨ឆ្នាំ មុខរបរលក់គ្រឿងក្រអូប ស្នាក់នៅផ្ទះជួលកន្លែងកើតហេតុ។

សមត្ថកិច្ចរិបអូសវត្ថុតាងរួមមាន៖ ទូណឺវុីសដងជ័រពណ៌លឿង១ដើម, មេសោរចិនពណ៌ខ្មៅ១ មានស្នាមគាស់បំបែកគ្រាប់, ទូរស័ព្ទដៃមួយម៉ាកNokia, កូនសោរម៉ូតូ១។

ប្រភពព័ត៌មានបានឲ្យដឹងថា មុនពេលកើតហេតុនៅវេលាម៉ោងប្រហែល១០យប់ថ្ងៃខែឆ្នាំដដែល ជនរងគ្រោះ ឈ្មោះ នូវ កល្យាណ បានចាក់សោបន្ទប់ និងបិទភ្លើង រួចចេញទៅដើរលេងជាមួយបងប្រុស ឈ្មោះរ័ត្ន ហូបអាហារនៅខាងក្រៅ រហូតដល់ម៉ោងប្រហែល១២និង៣០នាទីរំលងអធ្រាត្រ ជនរងគ្រោះក៏បានត្រឡប់មកផ្ទះវិញ ពេលមកដល់បន្ទប់ក៏ឃើញភ្លើងខាងក្នុងបន្ទប់បើកហើយទ្វារបន្ទប់ របើក។

ប្រភពខាងលើបន្តទៀតថា ពេលនោះជនរងគ្រោះក៏បានឃើញជនសង្ស័យ២នាក់ឈ្មោះ ឆាយ ជឿន និង ឈ្មោះ យឹម ចាន់វណ្ណះ  កំពុងរើកកាយក្នុងបន្ទប់របស់ខ្លួន ភ្លាមនោះជនរងគ្រោះក៏បានស្រែកឆោឡោហៅម្ចាស់ផ្ទះជួលនិងអ្នកក្បែរខាងឲ្យមកជួយឃាត់ខ្លួនជនសង្ស័យទាំង២នាក់យកមកប្រគល់ឲ្យសមត្ថកិច្ចនគរបាលប៉ុស្តិ៍រដ្ឋបាលបឹងសាឡាង ចាត់ការតាមផ្លូវច្បាប់តែម្ដង ៕ ស តារា