ភ្នំពេញ៖ បុរសម្នាក់ទើបមកពីធ្វើការទុកម៉ូតូនៅមុខបន្ទប់ ហើយចូលទៅងូតទឹកមួយភ្លែតត្រូវបានជនសង្ស័យ២នាក់ធ្វើសកម្មភាពកាច់.កម៉ូតូបានដោយសុវត្ថិភាពហើយភ្លាមៗនោះម្ចាស់ម៉ូតូបានទៅដាក់ពាក្យបណ្តឹងនៅប៉ុស្តិ៍នគរបាលដើម្បីឲ្យសមត្ថកិច្ចជួយអន្តរាគមន៍។

ករណីនេះបានកើតឡើងនៅវេលាម៉ោង៨និង៣០នាទីព្រឹកថ្ងៃទី១៦ ខែកុម្ភៈ ឆ្នាំ២០១៧ នៅចំណុចមុខបន្ទប់ជួល ជិតផ្លូវចូលទៅទួលពង្រ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

ម្ចាស់ម៉ូតូឈ្មោះសៅ យោរី អាយុ៣១ឆ្នាំ មុខរបរជាងឈើ ស្នាក់កន្លែងកើតហេតុខាងលើ មានស្រុកកំណើតភូមិព្រៃធ្នុង ឃុំក្រោលគោ ស្រុកស្វាយជ្រំ ខេត្តស្វាយរៀង រីឯម៉ូតូដែលត្រូវជនសង្ស័យ២នាក់កាច់យកទៅបាត់នោះម៉ាកហុងដាឌ្រីម សេ១២៥ ស៊េរី២០១១ ពាក់ស្លាកលេខភ្នំពេញ1CI-9928។

តាមការរៀបរាប់ពីម្ចាស់ម៉ូតូបានឲ្យដឹងថា មុនពេលកើតហេតុរូបខ្លួនបានត្រឡប់មកពីការទៅបន្ទប់ស្នាក់នៅ ហើយបានចាក់សោ.កម៉ូតូត្រឹមត្រូវដូចរាល់ដង ព្រោះគិតថាចូលទៅងូតទឹកមួយភ្លែតនឹងចេញទៅធ្វើការវិញ ស្រាប់តែលេចមុខជនសង្ស័យ២នាក់ដែលមិនស្គាល់អត្តសញ្ញាណជិះម៉ូតូ១គ្រឿងមកឈប់អែបបន្ទប់របស់គាត់ហើយបានយកដែករឹងមួយមកចាក់ខ្ទោះទ្វារពីខាងក្រៅ ហើយក៏បានធ្វើសកម្មភាពកាច់.កម៉ូតូតែម្តង ភ្លាមនោះគាត់បានឮសូរដែរ ក៏បានស្ទុះចេញពីបន្ទប់ទឹកទៅបើកទ្វារតែបើកមិនរួចបានត្រឹមតែអើតតាមបង្អួចមើលចោរជិតម៉ូតូរបស់ខ្លួនទៅយ៉ាងស្រួល។

យ៉ាងណាមិញក្រោយពីកើតហេតុសមត្ថិកិច្ចប៉ុស្តិ៍នគរបាលចោមចៅបានត្រឹមទទួលពាក្យបណ្តឹងជនរងគ្រឡតែប៉ុណ្ណោះ៕ សុខាសែនជ័យ