ភ្នំពេញ៖ បុរសម្នាក់បានស្លាប់ភ្លាមៗនិង២នាក់ទៀតបានរងរបួសធ្ងន់ស្រាលខណៈពួកគេបានចេញពីផឹកសុីក្លឹបហើយបានជិះម៉ូតូក្នុងល្បឿនលឿនដួលបោកខ្ទប់និងរនាំងថ្មពុះចែកទ្រូងផ្លូវក្នុងបំណងជួនមិត្តភក្តិទៅផ្ទះវិញ កាលពីវេលាម៉ោង៣រំលងអធ្រាត្រថ្ងៃទី២១ ខែកុម្ភៈ ឆ្នាំ២០១៧ ត្រង់ចំណុចមុខផ្សារទឹកថ្លា ស្ថិតតាមបណ្ដោយមហាវិថីសហពន្ធ័រុស្សី ស្ថិតក្នុងសង្កាត់ទឹកថ្លា ខណ្ឌសែនសុខ។

បើតាមមិត្តភក្ដិរបស់ជនរងគ្រោះឆ្លើយប្រាប់ទាំងវង្វេងវង្វាន់ថា ជនរងគ្រោះដែលជាសពមានឈ្មោះវិន ភេទប្រុស អាយុ២៣ឆ្នាំ មុខរបរជាងជួសជុលរថយន្ត ស្នាក់នៅសង្កាត់កាកាប ខណ្ឌពោធិ៍សែនជ័យ ទី២មានឈ្មោះ នី ភេទប្រុស អាយុ៣០ឆ្នាំ មុខរបរលក់កាហ្វេ ស្នាក់នៅសង្កាត់ស្ទឹងមានជ័យ ខណ្ឌមានជ័យ និងទី៣មានឈ្មោះ អេង តាយ ភេទប្រុស អាយុ២០ឆ្នាំ មុខរបរបុគ្គលិកក្រុមហ៊ុន ស្នាក់នៅម្ដំអាងទឹក សង្កាត់ទួលស្វាយព្រៃ២ ខណ្ឌចំការមន។

សាក្សីដដែលបានបន្តថា មុនពេលកើតហេតុរូបគាត់ទាំង៣នាក់ទើបតែចេញពីផឹកសុីក្នុងក្លឹប «អាវ៉ាឡូន» ហើយជនរងគ្រោះបានជូនមិត្តរបស់គេដែលអង្គុយពីក្រោយនោះត្រឡប់ទៅផ្ទះវិញនៅម្ដុំអាងទឹក ខណៈពួកគេកំពុងតែជិះម៉ូតូ១គ្រឿងម៉ាកសុីរុស ពណ៌ក្រហមលាយខ្មៅពាក់ស្លាកលេខភ្នំពេញ 1AF-8162 បើកតាមផ្លូវខាងលើក្នុងទិសដៅពីលិចទៅកើតក្នុងល្បឿនលឿន លុះមកដល់ចំណុចកើតហេតុដោយសារតែម្ចាស់ម៉ូតូស្រវឹងជ្រុលទើបបានជារេចង្កូតជ្រុលទៅបុករបាំងថ្មពុះចែកទ្រូងផ្លូវដែលនៅនិងខាងឆ្វេងដៃបណ្ដាលឲ្យអ្នកបើកបរម៉ូតូហោះទៅបោកក្បាលផ្ទប់និងរបាំងថ្មទ្រូងផ្លូវបោកក្បាលស្លាប់នៅនិងកន្លែងកើតហេតុុំ។ ចំណែកឯអ្នកជិះក្រោយវិញរងរបួសធ្ងន់ធ្ងរស្រាល។ ភ្លាមៗនោះជនរងគ្រោះដែលរងរបួសធ្ងន់ត្រូវបានកម្លាំងសមត្ថកិច្ចជួយទាក់ទងទៅកាន់រថយន្តសង្គ្រោះបន្ទាន់របស់គ្លីនិកឯកជន ហុង ហាក់មកដឹកជនរងគ្រោះយកទៅសង្គ្រោះ។

ក្រោយពេលកើតហេតុសពខាងលើត្រូវបានសមត្ថកិច្ចធ្វើឯកសារប្រគល់សពឲ្យសាច់ញាតិយកទៅចាត់ចេងធ្វើបុណ្យតាមប្រពៃណី៕ តុង សីហា