ភ្នំពេញ៖ កម្លាំងនគរបាលប៉ុស្តិ៍ទួលសង្កែបានឃាត់ខ្លួនជនសង្ស័យចំនួន៤នាក់ដែលពាក់ពន្ធ័ករណីហិង្សាដោយចេតនាដាក់គ្នាកាលពីវេលាម៉ោង១០យប់ថ្ងៃទី២ ខែមីនា ឆ្នាំ២០១៦ នៅក្នុងការដ្ឋានសំណង់កាំកូស៊ីធី ស្ថិតនៅភូមិទួលគោក សង្កាត់ទួលសង្កែ ខណ្ឌឫស្សីកែវរាជធានីភ្នំពេញ ។
សមត្ថកិច្ចបានឲ្យដឹងថាជនសង្ស័យចំនួន៤នាក់នោះឈ្មោះ,សុង គឹមនាង ភេទប្រុសអាយុ២១ឆ្នាំជាកម្មករសំណង់ ២-ឈ្មោះ,មុន ឆៃលី ភេទប្រុស អាយុ២១ឆ្នាំ ជាកម្មករសំណង់ ៣-ឈ្មោះ,សុខ ឡា ភេទប្រុស អាយុ២០ឆ្នាំ ជាកម្មករសំណង់ និង៤-ឈ្មោះ សុង ភេទប្រុសអាយុ៤០ឆ្នាំជាកម្មករសំណង់។ អ្នកទាំង៤នាក់ខាងលើនេះមានស្រុកកំណីតនៅភូមិតាឡកឃុំក្សេមក្សាន្តស្រុកឧត្តុង្គខេត្តកំពង់ស្ពឺបច្ចុប្បន្នស្នាក់នៅការដ្ឋានសំណង់ខាងលើ ។
ប្រភពដដែលបានឲ្យដឹងទៀតថា នៅមុនពេលកើតហេតុ កម្មករសំណង់ទាំងអស់មានព្រមាណ១០នាក់ បានទិញស្រាមកផឹកក្នុងការដ្ឋានខាងលើ ហើយពេលពួកគេផឹកស្រវឹងរៀងៗខ្លួន ក៏បង្កទំនាស់និងប៉ះពាក្យសម្តីគ្នា ព្រមទាំងឈានដល់ប្រើអំពើហិង្សាដាក់គ្នា បណ្តាលឲ្យរងរបួសទាំងសងខាង។ បន្ទាប់មក ប្រជាពលរដ្ឋបានទូរស័ព្ទប្តឹងទៅនគរបាលប៉ុស្តិ៍ទួលសង្កែចុះទៅបង្រា្កបទើបឈានដល់ឃាត់ខ្លួនបាន៤នាក់នេះតែម្តង ។
បច្ទុប្បន្នជនសង្ស័យទាំង៤នាក់ខាងលើកំពុងឃាត់ខ្លួនបញ្ជូនទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌឫស្សីកែវដើម្បីសាកសួរនិងកសាងសំណុំរឿងបញ្ជូនទៅសាលាដំបូងរាជធានីចាត់ការតាមនីតិវិធី៕ ប្រាថ្នា
