ខេត្តស្វាយរៀង៖ មានការភ្ញាក់ផ្អើលដល់អ្នកភូមិកំពុងដេកលក់ស្កប់ស្កល់ចេញមកមើលយ៉ាងច្រើនកកកុញទាំងពាក់កណ្ដាលយប់ខណៈដែលមានរថយន្តហាយឡែនឌ័រ១គ្រឿងបើកក្រឡាប់ធ្លាក់វាលស្រែបណ្ដាលឲ្យមនុស្សប្រុសស្រីជិះក្នុងរថយន្តរងរបួសធ្ងន់ស្រាល៣នាក់ដោយសង្ស័យអ្នកបើកបរងងុយដេក។

ហេតុការណ៍នេះបានកើតឡើងកាលពីវេលាម៉ោង១និង៣០នាទីយប់រំលងអធ្រាត្រថ្ងៃទី៣ ខែមីនា ឆ្នាំ២០១៧ នៅលើផ្លូវជាតិលេខ១ ត្រង់ចំណុចភូមិត្របែកប្រហោង ឃុំតាសួស ស្រុកស្វាយជ្រំ ខេត្តស្វាយរៀង។

យោងតាមសមត្ថកិច្ចនគរបាលស្រុកបានឲ្យដឹងថា ជនរងគ្រោះជាអ្នកបើករថយន្តមានឈ្មោះសុខ លុច ភេទប្រុស អាយុ២៨ឆ្នាំ និងអ្នករួមដំណើរមានឈ្មោះពេញ សួងឡា ភេទប្រុស អាយុ២៧ឆ្នាំ និងម្នាក់ទៀតឈ្មោះសេង ស្រីម៉ៅ ភេទស្រី អាយុ២៤ឆ្នាំ ដោយអ្នកទាំង៣មានទីលំនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ រីឯរថយន្តម៉ាកហាយឡែនឌ័រ ពណ៌ស ពាក់ស្លាកលេខភ្នំពេញ2AN-0347 ខូចខាតយ៉ាងដំណំ។

តាមសម្តីជនរងគ្រោះជាអ្នកបើករថយន្តបានប្រាប់សមត្ថកិច្ចនគរបាលថា រូបគាត់បានធ្វើដំណើរពីភ្នំពេញមកកាន់ខេត្តស្វាយរៀងដោយបើបរពីទិសខាងលិចទៅកើតលើកំណាត់ផ្លូវជាតិលេខ១ខណៈមកដល់ចំណុចកើតហេតុក៏មានអារម្មណ៍ងងុយដេកក៏ងោកមួយភាំងស្រាប់តែរថយន្តរេចង្កូតក្រឡាប់ធ្លាក់ស្រែតែម្ដង។

បច្ចុប្បន្នជនរងគ្រោះទាំង៣នាក់ត្រូវបានបញ្ជូនទៅព្យាបាលនៅមន្ទីរពេទ្យបង្អែកស្រុកស្វាយជ្រំដើម្បីព្យាបាលមុខរបួស៕ យឹម សុថាន