ខេត្តស្វាយរៀង៖ រថយន្តពាក់ស្លាកលេខរដ្ឋដែលគេស្គាល់ជារបស់លោកអនុប្រធានមន្ទីរសុខាភិបាលខេត្តស្វាយរៀងម្នាក់ជួបគ្រោះថ្នាក់ចរាចរណ៍បុកជាមួយម៉ូតូមួយគ្រឿងដែលបើកបញ្ច្រាសទិសគ្នាពេញទំហឹងបណ្ដាលឲ្យម្ចាស់ម៉ូតូរងរបួសធ្ងន់ត្រូវបានដឹកមកកាន់មន្ទីរពេទ្យបង្អែកស្រុកស្វាយទាបដើម្បីសង្គ្រោះ។

ករណីនេះបានកើតឡើងកាលពីវេលាម៉ោង២រសៀលថ្ងៃទី៧ ខែមីនា ឆ្នាំ២០១៧ នៅលើផ្លូវជាតិលេខ១ ត្រង់ចន្លោះគីឡូម៉ែត្រ១៤០-១៤១ ស្ថិតក្នុងភូមិលៀប  ឃុំកណ្តៀងរាយ ស្រុកស្វាយទាប ខេត្តស្វាយរៀង។

យោងតាមមន្ត្រីនគរបាលស្រុកបានឲ្យដឹងថា បុរសដែលជិះម៉ូតូដែលរងរបួសធ្ងន់មានឈ្មោះឡាយ សុខណា អាយុ២១ឆ្នាំ មុខរបរសន្តិសុខ មានទីលំនៅភូមិទទារ សង្កាត់ចេក ក្រុងស្វាយរៀងខណៈបើកម៉ូតូម៉ាកហុងដាសេឌ្រីម ១២៥ស៊េរី ឆ្នាំ២០១៦ ពាក់ស្លាកលេខស្វាយរៀង1F-1031ខូចខាតយ៉ាងដំណំ។ ចំណែកអ្នកបើករថយន្តឲ្យលោកអនុប្រធានមន្ទីរសុខាភិបាលខេត្តមានឈ្មោះចាន់ ភក្ដី អាយុ២៤ឆ្នាំមានទីលំនៅភូមិសង្កាត់ព្រៃឆ្លាក់ក្រុងស្វាយរៀង។

តាមសាក្សីបានឲ្យដឹងថា មុនកើតហេតុគេឃើញបុរសម្នាក់បានជិះម៉ូតូហុងដាឌ្រីម សេ១២៥ ពណ៌ខ្មៅ ដោយធ្វើដំណើរពីលិចទៅកើត(ពាក់មួកសុវត្ថិភាព) មកដល់កន្លែងកើតហេតុខាងលើ បានបុកជាមួយរថយន្តម៉ាក Ford Ranger ពាក់ស្លាកលេខរដ្ឋ ១២២-០៤២៨8ពណ៌ស ដែលបើកបញ្ច្រាសគ្នាពីកើតទៅលិចយ៉ាងពេញទំហឹងបណ្ដាលឲ្យអ្នកបើកម៉ូតូបែកក្បាលហូរឈាមសន្លប់និងកន្លែង។

ក្រោយមកជនរងគ្រោះត្រូវបានរថយន្តសាមុយរបស់មន្ទីរពេទ្យបង្អែកស្រុកស្វាយទាបជួយសង្គ្រោះនិងដឹកមកកាន់មន្ទីរពេទ្យភ្លាមៗ។

យោងតាមសមត្ថកិច្ចចរាចរស្រុកបានឲ្យដឹងថា ករណីនេះមូលហេតុដោយសារតែអ្នកបើកបរម៉ូតូមិនប្រកាន់ស្តាំទើបជួបគ្រោះថ្នាក់នេះកើតឡើង។ ក្រោយធ្វើការវាស់វែងររួចមធ្យោបាយទាំងពីរគ្រឿងត្រូវបានសមត្ថកិច្ចនគរបាលយកទៅរក្សាទុកនៅអធិការដ្ឋាននគរបាលស្រុកស្វាយទាបចាត់ការបន្តតាមច្បាប់ ៕ យឹម សុថាន