ភ្នំពេញ៖ កម្លាំងនគរបាលប៉ុស្តិ៍ផ្សារដើមគ ឃាត់ខ្លួនបុរសម្នាក់ពេលដែលបុរសរូបនោះ បានធ្វើសកម្មភាព លួច អាយឌី ពីអ្នករត់ម៉ូតូកង់៣បានសម្រេចហើយ ប៉ុន្តែ ត្រូវប្រជាពលរដ្ឋនៅក្បែរនោះឃើញ ក៏នាំគ្នាព័ន្ធចាប់បានរួចវាយម្នាក់ឡើងទ្រាមខ្លួនហើយទើបប្រគល់ជូនសមត្ថកិច្ចចាត់ការតាមច្បាប់ ។
ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង៥ទៀបភ្លឺ ថ្ងៃទី២០ ខែសីហា ឆ្នាំ២០១៥ នៅចំណុចផ្សារដើមគ តាមបណ្ដោយផ្លូវព្រះមន្នីរ៉េត សង្កាត់ផ្សារដើមគរ ខណ្ឌទួលគោក រាជធានីភ្នំពេញ ។
ជនសង្ស័យមាន ឈ្មោះ សុខ តារា ភេទប្រុស អាយុ២៥ឆ្នាំស្នាក់នៅផ្ទះជួលម្ដុំបឹងសាឡាង សង្កាត់បឹងសាឡាង ខណ្ឌទួលគោក មុខរបរមិនពិតប្រាកដ។ រីឯជនរងគ្រោះ មានឈ្មោះ សុន ណារិទ្ធ ភេទប្រុស
អាយុ៣៦ឆ្នាំ ស្នាក់ម្ដុំស្ទឹងមានជ័យ ភូមិឬស្សីសង្កាត់ស្ទឹងមានជ័យ ខណ្ឌមានជ័យ មុខរបរអាជីករលក់ដូរនៅក្នុងផ្សារស្ទឹងមានជ័យ ។
តាមប្រភពព័ត៌មានពីសមត្ថកិច្ច បានឲ្យដឹងថា នៅមុនពេលកើតហេតុ គេឃើញ មានបុរសម្នាក់ ដែលជាម្ចាស់ម៉ូតូកង់បី កំពុងឈប់នៅផ្សារដើមគ ហើយបានលើកបន្លែ ដាក់លើឡើងម៉ូតូកង់បី របស់គាត់ ដោយ(អាយឌី )របស់គាត់ បានដាក់នៅនិងដៃម៉ូតូ ស្រាប់តែភ្លាមនោះជនសង្ស័យបានដើរមកក្បែររួចធ្វើសកម្មភាព លួចយកអាយឌី ពីដៃម៉ូតូតែម្តង ។ បន្ទាប់ពីលួចបានសម្រេចហើយជនរងគ្រោះឃើញទាន់ ក៏ស្រែឆោឡោ បង្កឲ្យភ្ញាក់ផ្អើលដល់ប្រជាពលរដ្ឋនៅក្បែរនោះ បាននាំគ្នាព្រួតចាប់វាយម្នាក់មួយដៃមួយជើងឡើងទ្រមខ្លួន ទើបប្រគល់ឲ្យ នគរបាលប៉ុស្តិ៍ ផ្សារដើមគ ភ្លាមៗផងដែរ ។
បច្ចុប្បន្នជនសង្ស័យកំពុងឃុំខ្លួនបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿង បញ្ជូនទៅសាលាដំបូងរាជធានីភ្នំពេញចាត់ការតាមច្បាប់ ៕
ដោយ៖ ស ដារ៉ា
