ភ្នំពេញ៖ ក្រុមកីឡាបាល់ទាត់វ័យចាស់ នៃព្រះរាជាណាចក្រថៃក្លាយជាម្ចាស់ជើងឯកពានរង្វាន់លោក ខៀវ កាញារីទ្ធ លើក ទី២ប្រចាំឆ្នាំ២០១៧ បន្ទាប់ពីក្នុងនេះបានយកឈ្នះទាំង៤ប្រកួតគឺឈ្នះក្រុមវ័យ ចាស់មកពីប្រទេស វៀតណាម ឡាវ កូរ៉េ ខាងត្បូង និងក្រុមវ័យចាស់កម្ពុជា ។
លោក ជា ប្រុសហិន អ្នករៀបចំការ ប្រកួតកីឡាបាល់ទាត់មិត្តភាពអន្តរជាតិ ដណ្តើមពានរង្វាន់ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានលើកទី២ប្រចាំ ឆ្នាំ២០១៧ បានឲ្យដឹងថា ការប្រកួតកីឡា បាល់ទាត់វ័យចាស់នេះគឺក្នុងគោលបំណងលើកស្ទួយវិស័យកីឡាបាល់ទាត់នៅកម្ពុជា និងជាពិសេសរឹតចំណងមិត្តភាពសាមគ្គីភាពប្រទេសជិតខាងតាមរយៈវិស័យកីឡាបាល់ទាត់នៅក្នុងតំបន់អាស៊ាន ។
លោកបានបន្តទៀតថា កាលពីឆ្នាំ ២០១៦ មានតែ៤ប្រទេសចូលរួមប្រកួត ក៏ប៉ុន្តែនៅឆ្នាំ២០១៧នេះ មាន៥ប្រទេស ចូលរួមប្រកួត ដោយមានក្រុមវ័យចាស់ មកពីប្រទេសកូរ៉េខាងត្បូងដែលជា ប្រទេសមានការរីកចម្រើនខាងវិស័យ បាល់ទាត់ផងដែរ ។
សូមបញ្ជាក់ផងដែរថា ការប្រកួតកីឡាបាល់ទាត់វ័យចាស់ជាលក្ខណៈមិត្តភាព អន្តរជាតិ ដណ្តើមពានរង្វាន់ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន លើកទី២ ប្រចាំឆ្នាំ២០១៧ បានចាប់ផ្តើមការប្រកួត តាំងពីថ្ងៃទី៥ ខែមេសា បានបញ្ចប់នៅ ថ្ងៃទី៦ ខែមេសា ដោយក្រុមកីឡាបាល់ទាត់ វ័យចាស់មកពីប្រទេសថៃជាអ្នកលើកពានរង្វាន់នេះ ៕ សារីម
