ភ្នំពេញ៖ ជនសង្ស័យ៣នាក់ត្រូវបានសមត្ថកិច្ចប៉ុស្តិ៍ទំនប់ទឹកធ្វើការឃាត់ខ្លួនពាក់ព័ន្ធករណីប្រើប្រាស់គ្រឿងញៀន។ ករណីឃាត់ខ្លួនជនសង្ស័យខាងលើនេះធ្វើឡើងកាលពីវេលាម៉ោង៤និង៣០ទៀបភ្លឺថ្ងៃទី២២ ខែមេសា ឆ្នាំ២០១៧ នៅត្រង់ចំណុចផ្ទះ៨៥ ផ្លូវលេខ១២៣ សង្កាត់ទំនប់ទឹក ខណ្ឌចំការមន រាជធានីភ្នំពេញ។
ជនសង្ស័យទី១មានឈ្មោះ ឈិន គឹមសេង ភេទប្រុស អាយុ២៩ឆ្នាំ ទី២ឈ្មោះសាង ម៉ារ៉ារិទ្ធ ភេទប្រុស អាយុ២៥ឆ្នាំ និងទី៣ឈ្មោះសុខ ចាន់ណារ៉ា ភេទប្រុស អាយុ២៣ឆ្នាំ ទាំង៣នាក់ស្នាក់នៅសង្កាត់បឹងទំពុន ខណ្ឌមានជ័យ ។
បើតាមសម្ដីពីសមត្ថកិច្ចបានប្រាប់ឲ្យដឹងថា មុនពេលកើតហេតុកម្លាំងប៉ុស្តិ៍ទំនប់ទឹកកំពុងល្បាតក្នុងមូលដ្នានដូចសព្វដង លុះមកដល់ចំណុចកើតហេតុខាងលើក៏ប្រទះឃើញជនសង្ស័យ៣នាក់កំពុងជិះ១គ្រឿងម៉ាកគុប ពណ៌ទឹកប៊ិច គ្មានស្លាកលេខ នៅមុខផ្ទះកើតហេតុខាងលើដោយមានការសង្ស័យកម្លាំងសមត្ថកិច្ចក៏បានធ្វើការឃាត់ខ្លួនដើម្បីត្រួតពិនិត្យនិងឆែកឆេររកឃើញដែកស្រួចមួយនៅក្បែរខ្លួនក្រោយពីសមត្ថកិច្ចឃាត់ខ្លួនជនសង្ស័យទាំង៣នាក់ខាងលើពួកគេបានសារភាពថា ពិតជាបានប្រើប្រាស់គ្រឿងញៀនមែន។
បច្ចុប្បន្នជនសង្ស័យទាំង៣នាក់រួមនឹងវត្ថុតាងត្រូវបានកម្លាំងនគរបាលប៉ុស្តិ៍ទំនប់ទឹកបញ្ជូនទៅឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌចំការមនដើម្បីចាត់ការតាមនីតិវិធី៕ ស រស្មី
