ខេត្តកណ្តាល ៖ រថយន្ត២គ្រឿងបើកក្នុងទិសដៅស្របគ្នាបានបុកគ្នាយ៉ាងពេញទំហឹងបណ្តាលឲ្យស្លាប់ម្នាក់នៅនឹងកន្លែង និង២នាក់ទៀតរងរបួសធ្ងន់និងស្រាលបញ្ជូនទៅសង្គ្រោះនៅមន្ទីរពេទ្យនៅរាជធានីភ្នំពេញ ។
ហេតុការណ៍ខាងលើនេះបានកើតឡើង នៅលើផ្លូវជាតិលេខ៦ ចន្លោះគីឡូម៉ែតលេខ21-22 ស្ថិតក្នុងភូមិក្រោម ឃុំព្រែកអញ្ចាញ ស្រុកមុខកំពូលខេត្តកណ្តាល កាលពីវេលាម៉ោង១១និង១៥នទី យប់ថ្ងៃទី២៤ ខែមេសា ឆ្នាំ២០១៧ ។
អ្នកឃើញហេតុការណ៍នេះបានឲ្យដឹងថា នៅមុនកើតហេតុគេឃើញរថយន្ត២គ្រឿងបើកបរ ក្នុងទិសដៅស្របគ្នា ដោយរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ3D5278 បើកខាងមុខ ទិសដៅពីត្បូងទៅជើង អ្នកបើកបរមិនស្គាល់ឈ្មោះ (រត់គេចខ្លួនបាត់) ។ លុះមកដល់ចំណុចកើតហេតុមិនដឹងយ៉ាងម៉េច ក៏ឈប់លើទ្រូងផ្លូវតែម្តង ។
សាក្សីបានបន្តថា ស្របពេលនោះមានរថយន្ត១គ្រឿងទៀត ម៉ាកសាំងយ៉ុង ពណ៌ខៀវ ពាក់ស្លាកលេខភ្នំពេញ2AK-9832 ធ្វើដំណើរពីក្រោយ បើកបរដោយឈ្មោះ ប៉ិច សំបូរ ភេទប្រុសអាយុ៥១ឆ្នាំ មានទីលំនៅភូមិពាម ក្នុងឃុំព្រែកក្របៅ ស្រុកកងមាស ខេត្តកំពង់ចាម និងមានអ្នករួមដំណើរចំនួនពីនាក់ 1-ឈ្មោះសុវណ្ណ ពិនពិសា ភេទប្រុស អាយុ17ឆ្នាំ មានទីលំនៅភូមិជាមួយគ្នា,2-ឈ្មោះហ៊ួ បុប្ផា ភេទស្រី អាយុ28ឆ្នាំ មានទីលំនៅភូមិជាមួយគ្នា បានបុករថយន្តហ៊ីយ៉ាន់ដាយពីក្រោយយ៉ាងពេញទំហឹងបណ្ដាលឲ្យស្លាប់ឈ្មោះ សុវណ្ណ ពិនពិសា នៅកន្លែងកើតហេតុ និងឈ្មោះ ហ៊ួ បុប្ផា របួសធ្ងន់ និងឈ្មោះ ប៉ិច សំបូរ របួសស្រាល ។
ក្រោយកើតហេតុ សមត្ថកិច្ចបានចុះមកពិនិត្យ និងវាស់វែងតាមជំនាញ និងបានបញ្ជូនអ្នករបួសធ្ងន់បានបញ្ចូនទៅសង្គ្រោះនៅមន្ទីរពេទ្យភ្នំពេញ ។ ចំណែករថយន្តទាំង២គ្រឿងយកមករក្សាទុកនៅអធិការដ្ឋាននគរបាលស្រុកមុខកំពូលដើម្បីដោះស្រាយគ្នាតាមច្បាប់ ៕ ស្អាងជ័យ
