ក្រុមសារិកាព្រៃ Newcastle នៅក្រប ខ័ណ្ឌអង់គ្លេសChampionshipបានឡើងទៅកាន់ក្របខ័ណ្ឌអង់គ្លេស Premier League ក្រោយពីយកឈ្នះក្រុម Preston ៤-១ ក្នុងទឹកដីរបស់ខ្លួនកាលពីរាត្រីថ្ងៃ ចន្ទ។ ជ័យជម្នះនេះធ្វើឲ្យក្រុមសារិកាព្រៃឈរចំណាត់ថ្នាក់លេខ២ក្នុងតារាងអង់គ្លេស Championshipមាន៨៨ពិន្ទុដែលត្រូវឡើងទៅកាន់ក្របខ័ណ្ឌកំពូលអង់គ្លេសដោយស្វ័យប្រវត្តិ ។

ជ័យជម្នះនេះធ្វើឲ្យក្រុម Newcastle ដែលខកខានមិនបានលេងនៅក្របខ័ណ្ឌកំពូលអង់គ្លេសរយៈពេល១រដូវកាលនោះបាន ឡើងមកលេងលីកកំពូលអង់គ្លេសវិញ។ ទាំងអ្នកគាំទ្រ និងគ្រូបង្វឹកមានការសប្បាយរីករាយក្រៃលែង ដោយក្រុម Newcastle ត្រូវប្រកួតជាមួយនឹង Cardiff City នៅថ្ងៃទី២៩ ខែមេសានេះ។ បើទោះបីចាញ់ ឬក៏ឈ្នះក្រុម Newcastle នៅតែមានឱកាសឡើងទៅកាន់ក្របខ័ណ្ឌកំពូលអង់គ្លេស ដដែល ព្រោះក្រុមលេខ៣ Reading មាន តែ៧៩ពិន្ទុប៉ុណ្ណោះ ។

ជ័យជម្នះរបស់ក្រុម Newcastle កាលពីយប់ថ្ងៃចន្ទគឺរកគ្រាប់បាល់បានដោយ កីឡាករ Ayoze Pérez នៅនាទីទី៧ ប៉ុន្តែ នៅនាទីទី១៤ កីឡាករJ. Hugill របស់ក្រុម Preston បានតាមស្មើវិញ ។ រហូតដល់នាទី ទី៤៥ជិតចប់តង់ទី១ កីឡាករC. Atsu បានស៊ុតបាល់បញ្ចូលទី១គ្រាប់ទៀតធ្វើឲ្យចប់តង់ទី១ Newcastle ឈ្នះPreston ២-១។

ចូលដល់តង់ទី២ក្រុម Newcastle បានដាក់សម្ពាធយ៉ាងខ្លាំងទៅលើក្រុមភ្ញៀវធ្វើឲ្យក្រុមភ្ញៀវបង្កើតកំហុសនៅតំបន់គ្រោះថ្នាក់ ក៏ត្រូវអាជ្ញាកណ្តាលពិន័យបាល់១១ ម៉ែត្រដែលស៊ុតដោយកីឡាករM. Ritchie នៅនាទីទី៦៥ និងនៅនាទីទី៦៧ខ្សែប្រយុទ្ធ Ayoze Pérezរកបាន១គ្រាប់ទៀតធ្វើឲ្យចប់ការប្រកួតក្រុមម្ចាស់ផ្ទះយកឈ្នះក្រុមភ្ញៀវក្នុងលទ្ធផល ៤-១ ៕ ដេវីត